¿Wakmantachu nacena salvasqa kanapaq?

SICHUS pipas tapusunkiman: “¿Wakmantachu naceranki?” nispa chayqa, ¿imanispan kutichiwaq? Waranqanpi religionniyoq runakunan ninkuman: “Arí, wakmantan nacerayku”, nispa. Paykunaq nisqanman hinaqa cheqaq cristianokunaqa llapankus wakmanta nacenanku, chayta ruwaqtillankus salvakunkuman. Chhaynallatataqmi wakin religionpi umalliqkunapas ninku, hukninmi Robert Sproul sutiyoq teólogo runa, paymi khaynata qelqaran: “Pipas mana wakmanta naceqqa manan cristianochu”, nispa.

Sichus qanpas chhaynata piensanki chayqa, munashankichá familiaykikuna amigoykikunapas wakmanta nacenankuta. ¿Imaynatan paykunata yachachiwaq imachus wakmanta nacey kasqanta?

Askha runakunaq nisqanman hinaqa, pipas wakmanta nacenanpaqqa Diosman Cristoman imas promesata ruwanan servinanpaq, chhaynapis chay promesa ruwaqqa iñiyninpi wañusqa kasqanmanta kawsaripunman Diospa qhawarinanpaq. Huk diccionariopipas khaynatan nin: “Wakmanta naceq cristianoqa promesata ruwaspa Diosman kutirikapuqmi”, nispa.

Chhaynataña ninku chaypas, Bibliaqa manan chhaynatachu yachachin. ¿Munawaqchu Bibliaq yachachisqanta yachayta? Allinniykipaqmi kanqa chaymanta yachayqa. Sichus allinta yachanki wakmanta nacey imachus kasqanta chayqa, yachallankitaqmi imatachus kay tiempopi ruwanaykita hinallataq imachus qhepa tiempoman sucedenantawan.

¿Imaninmi Biblia wakmanta naceymanta?

Juan 3:1-12 textopin rikhurin ‘wakmanta nacey’ nisqa rimay. Chay textopin willashan Jesuswan Nicodemowan parlasqankumanta. Nicodemoqa karan Jerusalén llaqtapi huk umalliqmi. Chay parlasqankumanta willakuymi qatiqnin paginapi copiasqa kashan.

Chay willakuypin Jesusqa sut’incharan ‘wakmanta nacey’ imachus kasqanta. Chayman hinan kutichisunchis kay phisqa tapuykunata:

▪ ¿Necesariochu kanman wakmanta nacey?

▪ ¿Sapankachu chayta akllakunman?

▪ ¿Pikunan wakmanta nacenku?

▪ ¿Imaynapin wakmanta nacenku?

▪ ¿Iman pasan wakmanta naceqkunata?

Huk-hukmantan chay tapuykunata kutichisun.

 [4 dibujo recuadropiwan]

“Wakmantan nacenaykichispuni”

“Huk runan karqan fariseokunamanta Nicodemo sutiyoq, judío runakunaq umallin. Paymi Jesusman tutalla rispa nirqan: –Yachachikuq, yachaykun yachachinaykipaq Diospa kachamusqasuykita. Manan pipas ruwasqayki milagrokunataqa ruwayta atinmanchu manachus Dios paywan kanman chayqa, nispa. Jesustaq payta nirqan: –Cheqaqtapunin niyki, pipas Diospa qhapaqsuyunpi kananpaqqa wakmantan nacenan, nispa. Nicodemotaq kutichirqan: –¿Imaynataq runari machuña kashaspa wakmanta nacenman? Icha, ¿mamanpa wiksanman kutiykuspachu wakmanta nacemunman? nispa. Jesustaq nirqan: –Cheqaqtapunin niyki, pipas Diospa qhapaqsuyunpi kananpaqqa unumantawan Diospa Espiritunmantawanmi nacenan. Runamanta naceqqa runallan, Espiritumanta naceqpas espiritun. Ama musphaychu: “Wakmantan nacenaykichispuni” nisqaymantaqa. Wayraqa may munasqanmantan wayramun, suenasqallantan uyarinki, manataqmi yachankichu maymanta hamusqantapas, maymanchus risqantapas, chay hinallataqmi Espiritumanta pipas naceqqa, nispa. Nicodemotaq payta tapurqan: –¿Imaynataq kayri kanman? nispa. Chaymi Jesusqa kutichirqan: –¿Israel runakunata yachachiq kashaspachu qanqa chayta mana yachanki? Cheqaqtapunin niyki, ima yachasqaykutan rimayku, ima rikusqaykutataqmi willaykupas, willasqaykutataqmi mana chaskinkichischu. Kay pacha kaqkunamanta qankunaman nishaqtiy mana iñinkichischu chayqa, ¿imaynatataq iñiwaqchis hanaq pacha kaqkunamanta niykichisman chayqa?” (Juan 3:1-12.)