¿Hayk’aqkaman ñak’arisun?

Jayne sutiyoq warmin cáncer onqoywan kasharqan, sinchitan ñak’arisharqan, chaymi qaparispa nirqan: “¡Manañan aguantayta atinichu, yanapaykuwaychisyá!” nispa. Familianpas amigonkunapas manaña imatapas ruwayta atispan Diosta valekurqanku yanapaykunanpaq. ¿Uyarinmanchu karqan Dios mañakusqankuta?

DIOSQA yachanmi runaq maytukuy ñak’arisqanta. Chaymi Biblia nin: ‘Diospa tukuy imaymana kamasqankunaqa kunankaman waqashanku’, nispa (Romanos 8:22). Kay pachapiqa waranqa-waranqanpi runakunan imaymana onqoywan ñak’arishanku. 800 millón runakunan yarqaymanta muchushanku, chaymantapas millonninpi familia ukhupi maqanakushanku, askha tayta-mamakunataq wawankumanta hamuq tiempopi imayna kanankumanta sinchi llakisqa kashanku. Tukuy chaykunatan Diosqa qhawamushan. Chhaynaqa, tapukushankipaschá: “¿Chinkachinqachu Dios chaykunata? Runakunapas yanapanakunchismi, ¿imaraykun Dios mana yanapawanchischu?” nispa.

Ñawpa tiempopipas chhaynatan wakinqa tapukuqku. Habacuc sutiyoq profetapas iskay waranqa soqta pachak watakunañan Diosman khaynata nisqa: “Señor Diosnilláy, ¿hayk’aqkamataq waqyakamusqayki, manataq uyariwankichu? ¿Hayk’aqkamataq: ¡Sarunchashawankun! nispa qaparimusqayki, manataq qespichiwankichu? ¿Imanaqtintaq mana chaninkaqta rikuchiwanki? ¿Imanaqtintaq ñak’arichiytaqa ch’inlla qhawanki? Runa ch’utiqllatan runa maqaqllatan rikushani, quejanakushankun churanakushankun”, nispa (Habacuc 1:2, 3). Chhaynan kawsay kashan kay tiempopipas.

¿Uyarirqanchu Dios profeta Habacucpa mañakusqanta? Arí, uyarirqanmi, iñiynintapas kallpacharqanmi, prometerqantaq ñak’ariykunata chinkachinanpaq. Kay tiempopipas Diospa prometesqanta yachaymi kallpachawanchis, suyakuyninchispipas allinta sayachiwanchis. Chhaynan sucederqan Jaynewan familianwanpas. Chayraykun allinta leenanchis qatiqnin paginakunata, chaypin yachasun Dios ñoqanchispi maytukuy interesakusqanta, imaynatachus hayk’aqchus ñak’ariyta chinkachinantapas.