Munakuyqa huk runata tukuy sonqowan munakuymi. Huk runata munakuspaqa manan simillawanchu ninchis “munakuykin” nispa, aswanmi ruwayninchiswan rikuchinchis, chay ruway sasaña kanman chaypas.

Moisesqa Jehová Diostan munakurqan, chay munakusqantan rikuchirqan sapa kutilla kasukusqanpi. 1 Juan 5:3 texton nin: “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu”, nispa. Egiptopi ancha respetasqa Faraonwan rimananpaqña otaq Puka lamar-qocha ladoman tawnanta haywarinallanpaqña kamachirqan chaypas, Moisesqa Diospa tukuy kamachisqanman hinapunin ruwarqan (Éxodo 40:16).

Moisesqa llaqtamasinkunatapas munakurqanmi. Paykunaqa yacharqankun Moisesqa Diospa rantinpi kasqanta, chaymi sasachaykunapi tarikuspaqa payman riqku. Biblian nin: “Paykunan Moisespa qayllanpi tutamanta ch’isiyaykuykama sayasharqanku”, nispa (Éxodo 18:13-16). ¡May sayk’usqachá Moisesqa tarikuq p’uncha-p’unchay llaqtamasinkunata sasachakuyninkupi yanapaspa! Ichaqa tukuy sonqomantan chayta ruwaq paykunata munakusqanrayku.

Hinaspapas Moisesqa paykunaraykun Diosmanta mañakuq. Pay contra kaqkunapaq imaraqmi mañakuq. Huk kutinmi kikin panan María (Míriam) mana allinta rimarqan umalli kasqanmanta. Chaymi Jehová Diosqa Mariapaq phiñakuspa lepra onqoywan castigarqan. Moisesqa manan chaywan kusikurqanchu, aswanmi pananrayku Diosta mañakurqan: “Diosníy, valekuykin Mariata kunan qhaliyachinaykipaq”, nispa (Números 12:13). Chhayna mañakusqanpin Moisés rikuchirqan munakuq sonqo kasqanta.

Ñoqanchispas Moisés hinan Diosta tukuy sonqowan munakunanchis, chhaynata munakuspaqa ‘tukuy sonqowanmi’ kamachikusqanta kasukusun (Romanos 6:17). Diosqa kusikunmi tukuy sonqowan kasukuqtinchis (Proverbios 27:11). Munakuywan payta servisun chayqa allinkaqtan ruwasun kusisqataqmi kasunpas (Salmo 100:2).

Hinaspapas runamasinchistan tukuy sonqowan munakunanchis. Sichus huk amigonchis otaq mayqen familianchispas sasachakuypi kashan chayqa, munakuyninchistan rikuchinanchis: 1) willawasqanchista makilla uyarispa, 2) imayna sientekusqanta entiendespa, 3) atiskusqanman hina imallapipas yanapaykuspa ima.

Chaymantapas Moisés hinan munakusqanchis runakunapaq mañakunanchis. Mayninpiqa manapaschá yanapayta atisunchu, hinaspa nisun: “Pampachaykuwan, manan yanapayta atiykimanchu, Diosllamantachá mañanpusayki”, nispa. Ichaqa kayta yuyariy: “Chanin runaq tukuy sonqowan Diosmanta mañakusqanqa ancha atiyniyoqmi” nisqata (Santiago 5:16). Hukpaq mañakuqtinchisqa Diosmi payrayku imatapas ruwanman, manaña chayta ruwananpaq yuyaykusharqanchu chaypas. ¡Manan ima yanapaypas kanmanchu paykunapaq Diosmanta mañakuy hinaqa! *

Moisesmantaqa imaymanatan yachasunman. Ñoqanchis hina pantaq runaña karqan chaypas, payqa allin iñiyniyoq, huch’uyyaykukuq, munakuq runan karqan. Sichus pay hina kanapaq kallpachakusun chayqa, askhatan imaymanata chaskisun ñoqanchispaq hukkunapaqpas (Romanos 15:4).