YAQA llapa runakunan sasachakuykunapi tarikuqtinchis amigonchispa yanapayninta maskhanchis. Astawanqa chhayna sasachakuykunapi tarikuq amigonchista. Huk allin amigoqa khaynan: experienciayoq, khuyapayakuq ima.

Chhaynallatataqmi ruwanku Diosmanta mañakuy munaq runakunapas. Diostaqa ancha atiyniyoqta sinchi karupipas kashanman hinatan qhawarinku, chaymi santokunaman mañakuspa allin sientekunku. Chaymantapas yuyaykunkun: “Santokunaqa ñoqanchis hinan sasachakuykunapi tarikurqanku chaymi paykunaqa entiendewanchis mañakusqanchista”, nispa. Wakinkunaqa ima munakusqankuta chinkachiqtinku otaq suwachikuqtinkun san Antonio de Padua nisqa santoman mañakunku, hukkunataq onqosqa animalninkunata qhaliyachinankupaq san Francisco de Asís nisqa santoman, sasachakuykunapi tarikuq runakunataq Judas Tadeo nisqa santoman.

¿Bibliapi yachachinchu santokunaman mañakunapaq? ¿Uyarinchu Dios chay mañakusqankuta? ¿Imatan Dios nin santokunaman mañakuymanta? Sichus munanchispuni Dios uyariwananchista chayqa, yachananchismi imatan Dios munan chayta.

Catecismo de la Iglesia Católica qelqaq nisqan hina, católico religionpiqa yachachinku santokunaman mañakuyta, chaymi khaynata ninku: “Kay hallp’api kashaqtinku imaymana allinkunata ruwasqankurayku Dioswan allinta qhawarichikunku chaymi paykunalla Diosman chayachinku mañakusqanchista”, nispa. Chaymi pikunachus santokunaman mañakuqkunaqa saminchaykunata chaskinankupaq ruwanku, ¿imarayku? Santokunaqa Diospa ñawpaqenpi kasqanrayku.

¿Chaytachu Biblia yachachin? Wakinkunaqa ninku: “Bibliapipunin kashan chay yachachikuyqa”, nispa. ¿Imaraykun chhaynata yuyaykunku? Roma llaqtapi cristianokunaman apóstol Pablo qelqarqan: “Valekuykichismi, wawqe-panaykuna, Señorninchis Jesucristorayku, Santo Espirituq munakuyninwan ñoqawan kuska Diosmanta tukuy sonqo mañapuwanaykichispaq”, nispa; chay textota hap’ikusqankuraykun chhaynata yuyaykunku (Romanos 15:30). ¿Nisharqanchu apóstol Pablo iñiqmasinkunarayku Dioswan uyarichikunanta? Manan. Aswanpas nisharqanmi mayqen iñiqmasipas payrayku Diosmanta mañapunankupaq. Chhaynaqa, ¿imaraykun mana santokunaman  mañakunanchischu Dioswan uyarichikunanchispaq?

Evangelio Juan qelqapin Jesús nirqan: “Ñoqan kani ñanpas, cheqaq-kaypas, kawsaypas. Pipas ñoqallantapunin Yayamanqa chayanqa”, nispa (Juan 14:6). Nillarqantaqmi: “Yayamanta sutiypi mañakuqtiykichis pay qosunkichis”, nispa (Juan 15:16). Jesusqa manan payman mañakunanchismantachu rimasharqan nitaq rantinchispi Dioswan parlananmantachu. Aswanpas paypa sutinpi Diosman mañakunanchismantan rimasharqan.

Huk kutinmi Jesuspa qatikuqninkuna nirqanku mañakuyta yachachinanpaq, hinan Jesusqa nirqan: “Mañakuspaykichisqa kay hinatan ninkichis: Yayayku, sutiyki yupaychasqa kachun”, nispa (Lucas 11:2). Jesuspa nisqanman hina Diosllamanpuni mañakunanchis Jesuspa sutinpi manan santokunamanchu.

Mañakuyqa Jehová Diosta yupaychananchispaqmi, santokunaman mañakuyqa Diospa yachachikuynin contrapi kashan (Juan 4:23, 24; Apocalipsis 19:9, 10).

Jesusqa orqo patapi yachachishaspan nirqan: “¿Mayqenniykichistaq wawaykichis t’antata mañakushaqtin rumita qowaqchis? Challwata mañakushaqtinpas, ¿mach’aqwayta qowaqchis?”, nispa (Mateo 7:9, 10). Manan mayqen taytapas wawanta munakuspaqa chayta ruwanmanchu.

Chayta allinta entiendenapaq kaywan rikch’anachisun. Yaqapaschá tayta hina kallpachakurqanki wawaykiwan sumaqpi kanaykipaq ima nisqasuykitapas makilla uyarirqanki. Ichaqa qanta manchakusqanraykun huk runawan imachus munasqanta mañachisunki. ¿Imaynatan sientekuwaq? Hinaspapas sapa kutillan chay runawan mañachisunkiman, ¿gustasunkimanchu chay ruwasqan? Manan riki. Huk allin taytaqa munanmi wawankuna ima munasqankutapas paymanta mañakunankuta.

Mikhunata mañakuq wawamanta yachasqanchista yuyarisunchis, Jesusmi khaynata runakunata yuyaymanachirqan: “Qankunapas mana allin millay runa kashaspa, allin kaqkunata wawaykichiskunaman qoyta yachankichismi, chaymantapas astawanraqmi hanaq pachapi kaq Yayaykichisqa allin kaqkunata mañakuqtiykichis qosunkichis”, nispa (Mateo 7:11). Arí, huk taytaqa munanpunin wawankunaman allin kaqkuna qoyta, chay hinallataqmi Jehová Diospas astawanraq mañakusqanchista uyariwanchis.

Ima huchataña ruwasqanchismanta sinchi llakisqa tarikunchis chaypas Diosqa munanpuni paymanta mañakunanchista. Payqa manan pitapas kamachinchu mañakusqanchista uyariwananchispaq. Chayraykun Biblia nin: “Señor Diosman llakipakuyniykikunata saqey, paymi qaqata sayachisunki”, nispa (Salmo 55:22). Chaymi santokunaman mañakunamantaqa kallpachakunanchis Jehová Dioswan allinpi kananchispaq, chhaynapin mana manchakuspa payman asuykusunchis.

Diosninchisqa sapankanchispin interesakun. Chaymi yanapawananchispaq kashan ima sasachakuypiña tarikuqtinchispas, payman asuykunapaqtaqmi invitawanchis (Santiago 4:8). ¡May kusisqan kashanchis ‘mañakusqata uyariq’ Diosman asuykusqanchismanta! (Salmo 65:2).