Paulmi casarasqa kashan iskay wawayoqtaqmi kanpas, paymi nin: “Llaqtaypi tukuy imaymana wicharuqtinmi mikhuy pisiyapurqan nishutataqmi valepurqan. Sapa kutillanmi filata ruwaq kayku mikhuyta rantinapaq, chayaykushaqtiykutaq tukurqapuq. Runakunaqa tullullañan puriqku, mayninqa yarqaymantan callekunapi desmayaqku. Mikhuymi sapa p’unchay astawan valepurqan, chaymi qolqeykupas manaña imapaqpas valepurqanchu. Bancopi waqaychakusqay qolqe, seguroypaq pensionniypaq kaq qolqepas lliwmi chinkapurqan”, nispa.

Paulqa allinta yuyaykuspan imatapas ruwanan karqan (Proverbios 3:21). Paymi nin: “Ñoqaqa profecionalmi kani, ichaqa manan manchakurqanichu imapipas llank’ayta, pisillataña pagawarqanku chaypas. Chaymi wakinqa mikhuykunawan otaq imawanpas pagawaqku. Tawa jabonwan pagawaqtinkun iskayta qhepachikuspa wakinta vendeq kani. Huk kutinmi 40 chiwchikunata rantispa uywarqani. Wiñaruqtinkutaq vendespa 300 rantirqani. Chaykuna wiñaruqtintaq 50 wallpata iskay saco sara hak’uwan cambiarqani. Chaykunawanmi familiayta huk runakunatapas unay tiempota uywarqani”, nispa.

Hinaspapas Paulqa Diospin confiarqan. Diospi confiaspa payta kasukunchis chayqa, yanapawasunmi. Chaymi imaña faltawasunman chaypas, mana sinchitaqa llakipakunachu. Jesusmi nirqan: “Yayaykichisqa yachanmi chaykuna pisisqasuykichista”, nispa (Lucas 12:29-31).

Ichaqa Diospa enemigon Satanasmi llapa runata engañashan. Chaymi runakunaqa askha qolqeyoq kaspalla allin kanankupi yuyaykunku. Chaymi ima hinaraq qolqe maskhaypi afanakunku, mana necesitasqankuta rantinankupaqraq. Wakinqa manukuspa  imaraqmi imatapas rantinku hinaspa ‘manukuqninkuq kamachin’ rikukapunku (Proverbios 22:7).

Wakinqa mana allinta yuyaykuspan imatapas decidinku. Paulmi nin: “Askha reqsisqaykunan huk nacionta ripurqanku aswan allin kawsayta maskhaspa. Ichaqa manas llank’anata tariqkuchu mana documentoyoq kasqankurayku. Guardiamantas pakakuqku, callekunapis puñuqku ima. Diospi mana confiasqankuraykun chaykunapi rikukurqanku. Ñoqaykuqa Diospa yanapayninpi confiaspan sasachakuykunata kuska aguantarqayku”, nispa.

Paulmi nin: “Jesusmi nirqan: ‘Ama llakipakuychischu paqarinmantaqa, paqarinpas llakikuyqa kallanqapunin. Sapa p’unchay llakikuyqa chay p’unchayllapaq kachun’, nispa. Chaymi ñoqapas sapa p’unchay mañakuq kani chay p’unchaypaq t’antata qowanankupaq. Mañakusqaykuman hinataqmi Diosqa uyariwaqku. Mayninqa manan gustasqaykutapunichu tariq kayku. Huk kutinmi mana tapuykuspa filapi sayaykurqani, hinan yogurta vendeshasqaku. Manapunin yogurqa gustawaqchu, ichaqa mikhunataq chayqa hinatan rantirqani cenanaykupaq. Maytan Diosta agradecekuni chay sasa tiempopi manapuni huk tutallapas mikhuna faltachiwasqankumanta. *

”Kunanqa aswan allinñan kashayku. Jehová * Diospi confiasqaykun yanapawarqanku sasa tiempokunapi aguantanaykupaq. Ñoqaykupunin rikurqayku munayninta ruwaq runakunata yanapasqanta. Salmo 34:8 textopin nin: ‘Reqsiykuychis, hinaspa rikuychis may sumaqchus Señor Diosqa kashasqanta. ¡Kusisamiyoqmi payman hap’ipaykukuq runaqa!’, nispa. Manañan llakipakuykuchu hukpi chhayna yarqaypi kanaykumanta.

”Runakunaqa llank’anamanta qolqemantapas astawanqa mikhunatan necesitanku kawsanapaq. Chaymi mayta munanchis hallp’api ‘askhallaña mikhuykuna kananmanta’ Diospa promesan hunt’akunanta. Chay p’unchay chayamunankamaqa imachus necesitasqallanchista maskhasun. Biblian nin: ‘Ama qolqe sonqo kaychischu, kunan imachus kapusunkichis chayllawan kusisqa kawsaychis. Diosmi nirqan: “Manan saqerparisqaykichu, manataqmi wikch’urparisqaykipaschu’”, nispa. * Chay promesan ñoqaykutapas anchata kallpachawanku”, nispa.

Diospa nisqanman hina imatapas ruwanapaqqa allin iñiyniyoqmi kananchis chaytan Paulpas familianpas ruwarqanku sasachakuykunapi tarikuqtinku (Génesis 6:9). Paulmanta yachasqanchisqa yanapawasunmi chhayna llakikuypi tarikuqtinchis.

Ichaqa, ¿iman yanapawasunman familianchismanta llakipakuqtinchis?