Centroamérica a nisqapi Mexicopi iman Jehová Diospa testigonkunaqa 1999 watamantapacha 2015 watakama 5.000 juñunakuna wasikunata otaq salonkunata ruwaranku. Chaywanpas 700 más salonkunaraqmi faltashan, chhaynapi chaypi kaq Testigokuna visitamuq runakuna ima juñukunankupaq.

Ñaupa tiempopiqa manan chay partekunapiqa salonkunata ruwayta atikuqchu. Chaymi wasikunallapi testigokunaqa juñukuqku, chaymi pasaran Mexicopipas. Ichaqa, ¿imaraykun mana juñunakuna wasikunata ruwayta atikuranchu? Chay partekunapiqa unay watakunan prohibisqa kasharan ima religionpas allpata rantinanpaq. Ichaqa 1990 watakunapi jinan cambiapuran chay ley, chay leypa cambiasqanwanmi Testigokunaqa allpata rantispa juñunakuna wasikunata otaq salonkunata ruwayta qallariranku. Chaywanpas manan ratuchu chaykunaqa ruwakuq, askha killakunapiraqmi tukukuq.

1999 watamantapachan ichaqa astawan yapakuran salonkunata ruway, ¿imaynapi? Chay watapin askha Testigokunata ajllakuran, jinaspa t’aqa-t’aqapi churakuran maykunapichus pisi qolqeyoq kanku chaykunapi juñunakuna wasikunata ruwanankupaq. Paykunaqa llapa Mexicopi, Centroamérica nisqapi kaq qanchis nacionkunapi iman chaykunata ruwaranku. 2010 watamantapachan Mexicopi sucursal qhawarishan llapa chay partekunapi salonkunaq ruwakusqanta.

Chay nacionkunapi wakin llaqtakunaman chayayqa sasan, chaymi salonkunata ruwaqkunaqa imaymanakunapi tarikunku. Panamá nacionpin kinsa horata botepi viajananku karan maypichus juñunakuna wasi ruwakusharan chayman chayanankupaq. Mexicopi kaq Chiapas llaqtapipas salonta ruwasqanku llaqtamanqa juj juch’uy avionpin apananku karan tukuy imatapas.

Lliu Testigokunan mayta kusikunku llaqtankupi juj salón ruwakuqtin, wakinqa manaña Testigochu kanku chaypas chhaynatan kusikunku. Honduras nacionpin juj runa willakun chay tiyasqan partepi imachus pasasqanmanta, manaraq salonta ruwakushaqtinsi chay allpata juj runakuna rantiyta munasqaku chaypi “discoteca” ninku chayta ruwanankupaq. Manas paymanqa gustasqachu chayta ruway munasqanku. Testigokuna: “Salontan chaypi ruwasaqku”, niqtinkus ichaqa may kusisqa nisqa: “¡Juj bendicionmá kayqa!” nispa.

Wakin partekunapiqa Testigokunaq imaynachus llank’asqankuta rikuspan admirakunkuraq. Guatemala nacionpin juj runa niran: “Warmikunaqa cocinallapin mastaqa kanku, salonninkuta ruwaypin ichaqa warmipas qharipas igualta llank’anku. Maytan admirakuni warmikunata fierrokunata armaqta rikuspa, perqakunatapas estucaqta rikuspay. Manan ni creeytapas atiniraqchu”, nispa. Wakin wasimasikunaqa mijunata, refrescota imaraqmi rantiyapunku llank’aqkunapaq.

Wakin runakunamanqa chay salonkuna imaynachus ruwasqa kasqanmi gustan. Nicaragua nacionpis juj ingeniero juj alcaldeta nisqa: “Chay salón ruwasqankuqa munaychan, allin ruwasqan kashanpas. Manamá kay llaqtapiqa ima wasipas chhayna ruwasqaqa kanchu”, nispa.

Jehová Diospa testigonkunaqa kusisqan juj munay wasipi Diosta adoranku. Bibliata estudiaqkunapas contenton jamunku juj munay ruwasqa salonmanqa. Mexicopi juj salonta ruwaypi yanapakuq testigokunan kusisqa ninku: “Maytan Diosta ‘gracias’ niyku kay ancha munay wasita ruwaypi yanapakusqaykumanta”, nispa.