Bibliapin kashan imaynatachus Cristoq wañusqanta yuyarina chayqa, chayman jinan noqaykuqa chayta ruwayku; chaytan nikullantaq “Señorpa cenan” nispa (1 Corintios 11:20). Kunan tiempo runakunaq imaynachus ruwasqankun ichaqa mana Bibliaq nisqanman jinachu kashan, aswanmi chaykunaqa paykunaq costumbrenkuman jinalla kashan.

 Señorpa cenantaqa ruwayku noqanchisrayku Jesuspa wañusqanta yuyarinaykupaqmi, chaymantapas chayta ruwaspan rikuchiyku agradecido kasqaykuta (Mateo 20:28; 1 Corintios 11:24). Chay Señorpa cenanta yuyariyqa manan juj sacramentochu, manataqmi chayta ruwaspachu pipas juchanmanta perdonasqa kanqa. a Bibliaq nisqan jina Diosqa pitapas perdonanqa Jesuspi iñillaqtinmi, manan ima costumbreta ruwaqtinchu (Romanos 3:25; 1 Juan 2:1, 2).

 Jesusmi kamachiran chay Cenata ruwanapaqqa, ichaqa manan niranchu sapa jayk’as chayta ruwana chaytaqa (Lucas 22:19). Wakin runakunaq nisqanman jinaqa sapa killas chayta ruwana, jujkunaq nisqanman jinataq sapa semanan, wakinñataq ninku “sapa p’unchaymi kanan” nispa. Wakintaq sapa raton chayta ruwanku. Ichaqa chayta ruwanapaqqa allintan yachana imaynatas ñaupa tiempopi ruwaqku chayta. Chaymantan kunan yachasun.

 Jesusmi ñaupaqtaqa chay cenataqa ruwaran, paymi chaytaqa qallarichiran. ¿Jayk’aq? Judiokuna Pascua fiestata ruwasqanku p’unchaypi; chay qhepallamanmi Jesusqa wañuchisqapas karan (Mateo 26:1, 2). Chayraykun Bibliapiqa paymanta nin: “Pascua fiestapaq corderonchis”, nispa (1 Corintios 5:7, 8). ¿Ichaqa sapa jayk’ataq Pascua fiestatari ruwaqku? Sapa watanmi chay fiestataqa ruwaqku, ichaqa watapi juj kutillata (Éxodo 12:1-6; Levítico 23:5). Chaymi ñaupa cristianokunapas Jesuspa wañusqantaqa watapi juj kutillata yuyariqku, manan sapa ratochu. Chay ejemplota qatikuspan Jehová Diospa testigonkunapas watapi juj kutillata Jesuspa wañusqantaqa yuyariyku. b

 Yachamusqanchis jina, Jesusmi chay cenataqa qallarichiran, ima p’unchaytachus ima horatachus chayta ruwaran chayta yachaspan yachallasuntaq ima p’unchayta ima horata ruwana kasqanta. Payqa 33 watapin 14 p’unchay nisán killapi chay cenata ruwaran ¿Ima horata? Inti chinkaykuy qhepata (Mateo 26:18-20, 26). Chaymi noqaykuqa ima p’unchaymanchus chay tupamun, chayman jina sapa watan chayta ruwayku. Chhaynatan ñaupaq cristianokunapas ruwallaqkutaq. c

 33 watapi nisán killapi 14 p’unchayqa juj viernesmi karan, ichaqa manan sapa watanchu kasqan p’unchayllaman tupamun. Kay tiempopi jayk’aqmanchus tupamunqa 14 p’unchay nisán killa chayta yachanaykupaqqa manan kunan tiempo judío runakunaq imaynachus ruwasqankuman jinachu chaytaqa orqoyku, aswanpas Jesuspa tiemponpi imaynatachus ruwaqku chayman jinan. d

 Chayraqmi Pascua fiesta mijuna mijuyta tukusharanku, chayllamanmi Jesusqa puchusqan t’antata, puchusqan vinotawan usaspa “Señorpa cenan” nisqata qallarichiran, chay t’antaqa mana levadurayoqmi karan (Mateo 26:26-28). Chaymi noqaykuqa Señorpa cenanta yuyarinaykupaqqa mana imayoq t’antata ruwayku, vinopas manan uvas jugochu, manataqmi imawan chhaqrusqachu, aswanpas vino purollan.

 Wakin religionpiqa levadurayoq t’antawanmi chayta ruwanku. Ichaqa Bibliaq nisqan jina juchawan, mana allin ruwaywan iman levadurataqa masta comparakun (Lucas 12:1; 1 Corintios 5:6-8; Gálatas 5:7-9). Chhaynaqa, ¿atinmanchu levadurayoq t’anta Jesuspa ch’uya cuerponta representayta? Manan atinmanchu, chaypaqqa mana levadurayoq t’antan kanan (1 Pedro 2:22). Chaymantapas wakinqa vinota usanankumantaqa uvas jugowanmi chayta ruwanku, ¿imarayku? Paykunaqa prohibinkun juj chikachallantapas vino tomayta, ichaqa manan Bibliaq nisqanman jinachu chaytaqa ruwashanku (1 Timoteo 5:23).

 T’antapas vinopas manan Jesuspa cheqaq cuerponchu ni cheqaq yawarninpaschu; manataqmi wakinpa nisqan jinachu t’antaqa chay ratopi Jesuspa cuerponman tukun nitaq vinopas Jesuspa yawarninmanchu tukun, nitaqmi chay iskayninchu chhaqrukun. Aswanmi t’antaqa Jesuspa cuerponta representan, vinotaq yawarninta. ¿Ima ninmi Biblia chaykunamanta? Chayta kunan yachasun.

•   Jesuschus discipulonkunata kamachinman karan yawarninta tomanankupaq chayqa Diospa kamachisqan contrapichá chaytaqa ruwashanman karan; payqa prohibiranmi yawar mijuytaqa (Génesis 9:4; Hechos 15:28, 29). Ichaqa manapunin Jesusqa chaytaqa ruwanmanchu karan, payqa anchatan respetaq Diostaqa, yawartapas respetaqmi (Juan 8:28, 29).

•   Apostolkunaqa manan Jesuspa yawarnintachu tomaranku, chaymantapas Jesusqa manaraqmi chay ratopaqqa wañuchisqaraqchu karan. Chaymantañan paypa yawarninqa jich’arisqa kanan karan (Mateo 26:28).

•   Jesusqa “juj kutillata rijurimuspan sacrificiopi entregakuran” (Hebreos 9:25, 26). Sichus t’antapas vinopas sapa Señorpa cenan kaqtin cuerponman yawarninman tukushanman chayqa, sapa chayta ruwakuqtinpas sacrificiota jaywakushanman jinachá kanman.

•   Jesusqa manan: “Kaytan ruwankichis jujmanta sacrificasqa kanaypaq” nispachu niran, aswanmi niran: “Kaytaqa ruwallankichispunin noqata yuyariwanaykichispaq”, nispa (1 Corintios 11:24).

 Wakinpa nisqan jinaqa, t’antas Jesuspa cheqaq cuerponman tukun, vinopas cheqaq yawarninmansi tukun, chaytan nillankutaq “transubstanciación”, nispa. Ichaqa, ¿imaraykun paykuna chayta ninku? Wakin Bibliakuna imayna t’ijrasqachus kasqanrayku, juj Bibliapin Mateo 26:28 textopi nin: “Cayka yawarniymi” nispa. Chayta rikuspan wakinqa piensanku cheqaq yawarmanta rimananpaq. Ichaqa chay textopi Jesuspa rimasqantaqa “kayqa yawarniytan representan” nispapas nikullanmantaqmi. e Jesusqa comparacionkunata churaspa, ejemplokunata churaspa iman yachachiq; chay kutipipas juj comparaciontan payqa churasharan (Mateo 13:34, 35).

 Jehová Diospa testigonkuna ukhupi Señorpa cenanta yuyarispaqa pisillan t’antataqa mijunku vinotapas ujanku, ¿imaraykun pisilla participanku?

 Jesuspa yawarninta jich’asqanwanmi juj ‘mosoq acuerdota’ ruwakuran, chay acuerdo ruwakusqanmi jaykuran Israel llaqtawan Diospa rimanakusqanpa rantinta (Hebreos 8:10-13). Pikunachus chay mosoq acuerdopi o rimanakuypi kashanku, chay runakunallan Señorpa cenanpiqa t’antatapas mijunku vinotapas ujanku. Manan llapa cristianokunaqa chayta ruwankumanchu, aswanpas pikunatachus Dios ‘wajan chaykunallan’ (Hebreos 9:15; Lucas 22:20). Paykunan Cristowan kuska janaq pachamanta gobiernamunqaku. Chaymantapas Bibliaq nisqan jina 144.000 runakunallan chay jatun regalotaqa chaskinqaku (Lucas 22:28-30; Apocalipsis 5:9, 10; 14:1, 3).

 Cristowan gobiernamuq runakunaqa ‘pisi t’aqa ovejakunallan’ kanku. Yaqa llapa Diosta serviqkunan ichaqa kay pachapi wiñaypaq tiyanqaku, paykunamantan Bibliapi nin: “Mana piqpa yupay atinan ancha askha runakuna”, nispa (Lucas 12:32; Apocalipsis 7:9, 10). Kay pachapi wiñay kausayta suyakuqkuna manaña t’antatapas mijuykuchu ni vinotapas ujaykuchu chaypas, riykun Jesuspa wañusqanta yuyariqqa, chhaynapin rikuchiyku Jesús vidanta qosqanmanta mayta agradecekusqaykuta (1 Juan 2:2).