Shuj huarmica paipa cusa pornografiata ricuj cashcatami yachaj chayarca. Chaimandami paipa cusaca cutin cutin perdonda mañarca. Ñana chaita cutin rurashachu nircami. Paipa nishcataca shuj tiempotaca pactachircami. Shinapash jipamanga cutinmi pornografiata ricuna viciopi urmarca. Chaimi cutin problemacuna callarirca.

 ¿Talvez quiquinbashchu cai problemahuan shina pasajupangui? Shina cashpaca, quiquin pornografiata ricujpi quiquinba huarmita imashina llaquichijtami intindina capangui. Shinallata, chai viciota saquitapacha saquingapaj imata rurana cashcata ricupai. a

Cai temapica caicunatami yachajushun:

•  Caitami yachana cangui

•  Caitami rurai ushangui

•  Quiquinba cusa pornografiata ricujpi

 Pornografiaca matrimoniota tucuchi ushanmi. Llaquichi tucushca cusa o huarmica, paipa cusapi o paipa huarmipica ñana confianzata charinllu. Risintirishcami sintirin. b

 Shuj huarmica paipa cusa pornografiata ricujpica, cashnami sintiri ushan:

•   Traicionadami sintirin. Sarah shuti huarmica: “Ñuca cusa cutin cutin traicionajushcashnami sintirircani” ninmi.

•   Imapapash na valinshnami sintirin. Shuj huarmica paipa cusa pornografiata ricujpica, ñucaca na juyailla cashcata, ñucata na valichishcatami sintin carcani ninmi.

•   Confianza illajmi sintirin. Helen shuti huarmica: “Ñuca cusapica tucui horasmi desconfiani” nin.

•   Catherine shuti huarmica: “Ñuca cusa pornografiata ricuna viciopi urmashcamandami preocupada sintirishpa shungu ucucaman nanan carca” ninmi.

 Caipi pensapai: Bibliapica cusaca paipa huarmitaca juyanami can ninmi (Efesios 5:25). Shinapash, quiquinba culpamanda canba huarmi cai llaquicunata pasajujpica ¿quiquinba huarmita juyashcata ricuchijunguichu?

 Pornografía viciota saquinaca na facilchu can. Stacey shuti huarmica: “Ñuca cusaca machanata, tabacota, marihuanata chupana viciocunatami saquirca. Shinapash, pornografiata saquina na facilchu cashca” ninmi.

 Quiquinbash shina pasajushpaca, cai cati consejocunami pornografiata saquitapacha saquichun ayudanga.

•   Pornografiata ricuna imamanda nali cajtami intindina cangui. Pornografiaca shuj persona paipa nali munaicunatalla rurashpa cushijuchunmi animan. Chai nali munaimandami juyai, confianza, respetopash tucurin. Chaimandami matrimoniopica ñana cushilla causai usharin. Ashtahuanbash, matrimoniota callarichij Jehová Diosta na respetashcatami ricuchin.

   Bibliapica ninmi: “Tucuicunami cusahuarmi causaitaca respetana can” (Hebreos 13:4).

•   Quiquinba ruraicunamandaca na shujcunata juchachinachu cangui. Na cashna ninachu cangui: “Ñuca huarmi ashtahuan juyaita ricuchijpica, na pornografiata ricuimanllu cani” nishpa. Huarmita juchachinaca na alichu can. Quiquinba huarmi imapi pandarijpipash pornografiata ricungapami yangata cashna juchachijungui.

   Bibliapica ninmi: “Cada unomi paicunapa propio munaicunata ninanda alicachimanda o munaimanda tentai tucun” (Santiago 1:14).

•   Quiquinba huarmihuanga imatapash na pacashpami parlana cangui. Kevin shuti cusaca ninmi: “Tucui punllacunami ñuca huarmimanga punllapi ima pasashcataca tucuita parlani. Imatapash munanaita ricushpaca ¿cutin ricungapachu munarcani o jaicatachu anchurircani? Shina parlashcamandami, ñuca huarmica imatapash na pacajushcata sintin” nin.

   Bibliapica ninmi: “Tucuipi honrado cangapapashmi munapanchi” (Hebreos 13:18).

•   Chai viciopi cutin ama urmangapami rijchariashna cana cangui. Ashtaca huatacunata pornografiata saquishca cashpa, ñana pornografiapi cutin urmashachu yashpapash cutinmi urmai ushangui. Kevinga ninmi: “Pornografiata 10 huatacunatami ñana ricuimandami, chai viciotaca saquitapachami saquishcani yarcani. Shinapash chai vicioca shuj millai animalshnami cutin atacangapaj listo carca” ninmi.

   Bibliapica ninmi: “Shinllimi shayajuni yajcunaca, ama urmangapami cuidarina can” (1 Corintios 10:12).

•   Pornografiata ricuna tentacionda sintishpaca controlarinami cangui. Huaquinbica shuj nali munaita umamanda llujchitaca na usharinllu. Shinapash, chai nali munaita ruranata o na ruranataca decidi ushangui. Chai nali munaica yalingami. Shinallata chai nali munaita shuj ali munaiman cambianata yachajujpica, chai nali munaica talvez jaicatami chingaringa.

   Bibliapica ninmi: “Quiquinguna limpio cangapaj y Taita Diospa ñaupapi ali ricuringapaca cada unomi quiquingunapa cuerpotaca imashina controlanataca yachana capanguichi. Taita Diosta na rijsij na judío gentecunashnaca na canachu capanguichi. Porque chai gentecunaca, huarmihuan o jarihuan canataca ninanda ansia munashpami purinajun” (1 Tesalonicenses 4:4, 5).

•   Pornografía viciopi urmachij cosascunamandami caruyana cangui. Querer no es poder libropi nishcashnaca, “viciopi urmachij pushtupi canaca, fosforota japichishcashnami can. Ninata japichishpa gasolinata shitajpica shuj jatun incendiomi tucui ushan” (Gloria Vitale nishcami traducishca).

   Bibliapica ninmi: “Ñucataca, ima nalipash ama mandashpa charihuachun” (Salmo 119:133).

•   Esperanzataca siempremi charina cangui. Quiquinba huarmipa confianzata cutin charingapaca ashtaca tiempo o ashtaca huatacunami minishtirin. Shinapash ashtaca cusahuarmicunami confianzata cutin chari ushashca.

   Bibliapica ninmi: “Juyaita charijcunaca pacienciata charinmi” (1 Corintios 13:4).