Bibliapica cunan punllapi gentecunaca nalicunata rurashpa, nali causashpami ashtahuan peor tucunga nishcarcami (2 Timoteo 3:1-5). a Shinallata Bibliapica huaquin gentecunaca Taita Diospa ayudahuan pai pensashcashna y pai munashcashna causangapami esforzaringa nishcarcami (Isaías 2:2, 3).

Cai temapica cai tapuicunatami yachajugripanchi:

•  Bibliapica cunanbi gentecuna ¿imashina canatata nirca?

•  Egoísta gentecuna ashtahuan tiaimandaca ¿imashinata shujcunataca afectan?

•  Gentecunaca ¿imamandata cada vez ashtahuan peor tucunajun?

•  Ñucanchi causanajushca pushtupi gentecuna ashtahuan nalicuna tucujpica ¿imatashi rurana canchi?

•  ¿Gulpi gentecunachu nalicuna tucuna carca?

•  ¿Gulpi gentecunachu tucuchi tucuna can?

 Bibliapica cunan tiempopi mayoría gentecuna imashina canataca ñami nishcarca. Por ejemplo chai gentecunaca egoistacuna, paicunapilla pensarijcuna, na controlarinata yachajcuna, Taita Diosta juyanapa randica, paicunapa munaicunatalla rurajcunami canga nircami (2 Timoteo 3:2-4).

 Chai profeciaca shutillami cunan tiempopica pactarijun. Cunanbi gentecunaca mayoriami paicuna convenienciapilla, paicuna cushilla causanapilla, paicunapa rurashcacunapilla pensarishpa causan. Shina gentecunataca generación yo nishpami shutichishca porque chai solo paicunapillami pensarishpa causan. Chaimandami ima ali cajtaca na valichin y ali persona imashina cajtaca ni yachaitallapash na yachanllu. Chashna gentecunaca mal agradecidocunami can. Chaimi shujcuna paicunata ayudajpipash agradicinataca yaitallapash na yanllu (2 Timoteo 3:2, 3).

 Bibliapica gentecunaca egoistacuna caimandami ashtahuan nalicuna tucun nishcarcami. Cunanbica cashna gentecunami ricurina carca:

•   Ambiciosocuna. Ashataca gentecunami culquitaca ninanda juyashpa causan. Paicunaca ashtaca culquita y ashtaca cosascunata charimandami alipachami causanchi nin (2 Timoteo 3:2).

•   Orgullosocuna. Ashtacacunami “jariyashpa parlajcuna, cridoyashcacuna” y “ninanda jariyashcacuna” can (2 Timoteo 3:2, 4). Paicunaca imatapash rurai ushaimanda, culquita charimanda y shuj cosascunamandapashmi jariyashpa parlan.

•   Cuenterocuna. Tucui ladocunapimi shujcunamanda llullacunata parlashpa purij gentecunaca tian (2 Timoteo 3:2, 3). Paicunaca shuj gentecunata y Taita Diosta insultashpa y llullacunata parlashpami purin.

•   Neciocuna. Ashtacacunaca “shujcunata na juyajcuna”, “de acuerdo cangapaj na munajcuna”, ‘amigocunatallata nalita rurajcuna y nimamanda na uyangapaj munajcunami’ can (2 Timoteo 3:2-4). Chashna gentecunaca shujcuna imata nijta uyanapa randica paicunapa nishcahuan yalingapaj munashpami neciocuna cashcataca ricuchin. Y shina gentecunaca paicunapa nishcataca nimamanda na cumplingapaj munanllu.

•   Millai millaicuna. Ashtaca gentecunami millai millai caimandaca jaicata culiran y huaquinbicarin shujcunataca maipash cachun maltratan (2 Timoteo 3:3).

•   Na cazujcuna. Jesusca cuna punllacunapi ‘nalita ruraj gentecunaca mirangami’ nircami. Shina nishpaca leycunata na cazuj ashtahuan gentecuna tianatami nijurca (Mateo 24:12). Jesusca ‘problemacunapash’ o huelgacunapash tianga nircami (Lucas 21:9).

•   Familiata na juyajcuna. Ashtaca gentecuna “taitamamatapash na cazujcuna” y ‘shujcunata na juyajcuna’ cajpimi, familia ucupica ashtahuan gentecuna maltratai tucushpa, macai tucushpa, violai tucushpapash causan (2 Timoteo 3:2, 3).

•   Taita Diosta adoranchi nij tucushcacuna. Cunanbica cada punllami ‘Taita Diosta catijunshnalla ricurij’ gentecunaca ashtahuan mirajun (2 Timoteo 3:5). Paicunaca Taita Dios munashcata ruranapa randica, paicuna munashcata rurachun saquijpimi paicunaca paicunapa líderes religiosocunatara cazun (2 Timoteo 4:3, 4).

 Ashtahuan egoísta gentecuna tiajpimi, problemas mentales y emocionalesta charij gentecunaca ashtahuan mirashca (Eclesiastés 7:7). Por ejemplo, culquita yapata juyaimandami ashtaca gentecunaca shuj gentecunata umachishpa paicunamanda aprovecharishca. Familiata na juyaimandami paicunapa propio familiarcunatallata violashpa llaquichishca. Chaimi llaquichij tucushca gentecunaca depresionhuan sufrin y hasta suicidaringapapash munashca. Y shujcunata traicionaj gentecunaca shujcunataca emocionalmentemi ninanda llaquichishca.

 Bibliapi gentecuna imamanda ashtahuan peor tucushcatami nijun:

•   Gentecunaca Taita Diostapash y shujcunatapash ñana sinceramente juyanllu. Chaimi ashtahuan gentecunaca paicunapilla pensarishpa causan (Mateo 24:12).

•   Satanás Diabloca, jahua cielomandami cai alpaman shitai tucurca (Apocalipsis 12:9, 12). Diabloca cai alpaman shitai tucushca punllamandapachami gentecuna paicunapilla pensarishpa causachun imacunatapash rurashca (1 Juan 5:19).

 Bibliapica nijunmi: “Chashna gentecunamandaca caruyanami cangui” nishpa (2 Timoteo 3:5). Bibliapi shina nijushpapash, gulpi gentecunamanda completamente caruyana cashcataca na nijunllu. Sino que egoísta gentecunahuan y Taita Diosta na juyaj gentecunahuan nimamanda na amigo tucuna cashcatami nijun (Santiago 4:4).

 Na. Porque Bibliapica huaquin gentecunaca paicunapa “tucui millanayaicunata rurashcamanda” ninanda llaquirishpa arripintirina cashcatami nijun (Ezequiel 9:4). Paicunaca paicunapa munashcatalla rurashpa causanata saquishpami, Taita Diospa mandashcacunata cazushpa causagrinajurca. Paicunaca paicunapa parlocunahuan, ruraicunahuanmi diferentecuna cashcata ricuchina carca (Malaquías 3:16, 18). Por ejemplo, shujcunahuan en paz causangapaj, guerracunapi y shuj macanajuicunapi ama participangapami ninanda esforzarina carca (Miqueas 4:3).

 Na, na gulpi gentecunachu tucuchi tucuna can. Taita Diosca solo paita na cazungapaj munaj gentecunatallami ñalla gulpita tucuchinga (Salmo 37:38). Jehová Diosca ‘shuj mushuj alpata’ rurasha nin. Shina nishpaca, solo ali gentecunalla para siempre y en paz causanatami nijun (2 Pedro 3:13; Salmo 37:11, 29). Chai shimicuna pactarinataca seguromi caita ushapanchi. Porque cunanbillatami Bibliaca ashtaca gentecunataca paicunapa causaita cambiashpa Taita Dios munashcashna causachun ayudashca (Efesios 4:23, 24).