“Ali Samaritano” shimitaca ayudajta minishtijucunata ayudanata yachajtami shina nin. Ali Samaritano shimica Jesuspa chimbapuraipi parlashca shimimi can. Gentecunata juyashcata ricuchingapaca maijan llactamanda cajpipash ayudanalla cashcata yachajuchunmi Jesusca chai chimbapuraitaca parlarca.

Cai temapica caitami yachajupashun:

•  Samaritanomanda chimbapuraipica ¿imatata ningapaj munarca?

•  Jesusca ¿imamandata cai chimbapuraitaca parlarca?

•  Cai chimbapuraipica ¿imatata yachachin?

•  ¿Samaritanocunaca picunata carca?

•  ¿Jesús parlashca samaritanomanda chimbapuraica ciertopachachu pasashcanga?

Jesús parlashca chimbapuraipica shuj judío runagu Jerusalén llactamanda Jericó llactaman rijujpi shuhuacuna tuparishpa yapata macashpa ñanbi shitashpa saquishcatami parlaj.

Shuj runagu ñanbi macai tucushca sirijujta ricushpapash shuj sacerdote judío chaillatata yalijushpapash imatapash na rurarcachu. Cutin jipaman shuj levita runa yalishpapash chai runapash na ayudarcachu. Macai tucushca jari paicuna purashnallata judiocuna cajpipash chai ishcandi jaricunaca na ayudarcachu.

Jipamanga shuj samaritano runagumi yalijurca (Lucas 10:33; 17:16-18). Macai tucushca runagu sirijujta ricushpaca chai samaritano runaguca ninanda llaquirishpami chai runagu chugrishcata jambirca. Chai jipaca mingarishca huasiman apashpami tucui tuta cuidashpa pacarirca. Cayandi punllaca huasi dueñomanga macai tucushca jariguta cuidachunmi culquita pagarca. Shinallata culqui faltajpica cutin tigramushpa pagashallami nishpami mingashpa saquirca (Lucas 10:30-35).

Jesusca cai chimbapuraitaca shuj jariman yachachingapaj munaimandami parlarca. Chai jarica paipa llactacunamandalla shinallata paipa religiondallata catijcunallami cumbacunaca can yuyarcami. Chaimi Jesús chai chimbapuraita chai jariman parlashpaca na judío gentecunalla paipa cumba cashcata yachajuchun parlarca (Lucas 10:36, 37). Cai chimbapuraitaca taita Diospa ñaupapi ali ricuringapaj munajcuna yachajuchunmi Bibliapi escribishpa saquishca (2 Timoteo 3:16, 17).

Shuj ali cumbagu shujcunata juyashcata llaquishcataca ruraicunahuan ricuchina cashcata yachachingapami Jesusca chai chimbapuraitaca yachachirca. Shuj ali cumbaguca maijan llactamanda cajpipash ima costumbrecunata charijpipash llaqui apajujpi paicunata ayudanata yachajmi cana can. Shinallata paita aliguta tratachun munanshnallatami shujcunatapash aliguta tratan (Mateo 7:12).

Samaritanocunaca Judea llactapa jahua ladomanmi causarca. Samaritano puracunapica judiocunahuan na judiocunahuan cazarashca gentecunami tiarca.

Apostolcunapa punllacunapica samaritanocunaca paicunapa propio religiondaca ñami charirca. Bibliapa callari 5 librocunatallami alicachin carca cutin Bibliapa shuj librocunataca nalicachinllu carca.

Jesús cai alpapi causajuj punllacunapica ashtaca judío gentecunami samaritano gentecunataca na ricunayachin carca. Shinallata paicunahuanga tandanajungapajllapash na munanllu carca (Juan 4:9). Judiocunaca samaritanocuna nishpaca nalicunata ningapajllami chai shimitaca nin carca (Juan 8:48).

Bibliapica samaritanomanda chimbapuraica ciertopacha chashna pasashca cajtaca na ningapaj munanllu. Shinapash Jesús yachachishpaca casi siempremi gentecuna aliguta yachajuchun munashpa gentecuna imata rurajta ricushpami chimbapuraicunata churashpa yachachin carca.

Cai chimbapuraipi parlashca ashtaca yuyaicunaca chai tiempopi causashca gentecunashnallata cashcatami ricuchin. Cati yuyaicunata ricupashun:

• Jerusalenmanda Jericó llactaman ringapaca 20 kilometrocunata yalimi (12mi) uraiman purina carca. Jerusalén llactaca Jericó llactahuan ricushpaca shuj kilometrotami (0,6mi) alto carca. Jerusalenmanda Jericó shuti puebloman urai rijurca nishpaca Jesusca na pandarircachu (Lucas 10:30).

• Jericó llactamanda sacerdotecuna levitacunaca Jerusalén llactaman ringapaca casi siempremi chai ñandalla purin carca.

• Chulunlla ñanda ricushpami shuacunaca chaita purijcunata shuhuangapaj chapan carca.