Bibliapica Jesús ima fechapipacha nacirishcataca na villajunllu. Cai librocunapash Jesús ima fechapipacha Jesús nacirishcata na yacharinllu ninmi:

•   “Jesús ima fecha exacto nacirishcataca na yacharinllu” (Comentario Bíblico Moody).

•   “Ima quillapi, ima punllapi Cristo nacirishcata yachangapaca, ima alipacha pruebapash na tianllu” (Diccionario de historia de la Iglesia).

 Shinaca ¿ima horata Jesusca nacirirca? Bibliapica ima punllapipacha Jesús nacirishcataca na villajunllu. Pero Bibliapi ishcai situaciongunata ricushpami ashtacacunaca, Jesusca na 25 de diciembretachu nacirishca nin.

Jesusca invierno o tamia temporadapica na nacirircachu

1.   Gobierno shuj leytami churarca. Jesús nara nacirijpillatami Roma llactapa rey Augustoca chai llactamanda ‘tucuilla gentecuna paicunapa shutita anotachingapaj richun mandarca’. Tucuilla gentecunaca ‘paicuna nacirishca llactapillata’ anotachingapami rina carca. Chaimandami José y Mariaca shuj semana enterota o ashtahuan yalitapash rina carca (Lucas 2:1-3). Roma llactapa reyca, impuestocunata cobrangapaj o macanajuchun jari gentecunata tandachingapami chai leytaca churashcanga. Ima temporadapi shina nishpa mandashca cajpipash, gentecunaca na alicachishpa uyashcangachu. Rey Augustopash, gentecunata tamia temporadapi caruta cachashpa paicunata ashtahuan culirachingapapash na munashcangachu.

2.   Llamagucunataca pambapimi pacarichinajurca. Bibliapica ‘llamagucunata michij runacunaca paicunapa llamagucunata cuidashpami, tutacunaca pambapi pacarishpa causanajurca’ ninmi (Lucas 2:8). La vida cotidiana en Palestina en tiempos de Jesús nishca libropica ninmi, llamagucunaca, “Pascuapa shuj semana faltajuj punllamanda [marzo quilla tucurimanda] callarishpa, noviembre chaupi quillacamanmi, pambacunapi pacarin carca. Tamia tiempocunapica, llamacuna ama chiripi cachunmi, llamacunapa segurashca pushtucunapi llamacunataca pacarichin carca. Chaimandami Nochebuena tutapica, nimamanda na llamacunaca canllacunapi pacarin cashcanga. Pero Bibliapica, llama michijcunaca pambapimi llamacunandi pacarinajurca ninmi. Bibliahuan comparashpa ricujpica na cabal ricurinllu” ninmi.

Jesusca más o menos octubre callari punllacunapimi nacirirca

 Jesús ima temporadapi nacirishcata yachangapaca, Jesús huañushcamanda huashamanmi cuentaita ushapanchi. Jesusca, Pascua punllapi, 14 de Nisán, huata 33​pi, más o menos 1 de abriltami huañurca (Juan 19:14-16). Shinallata, Jesusca más o menos 30 huatacunata charishpami predicai callarirca. Y quimsa huata y chaupitami predicarca. Chaita cuentata rurajpica, más o menos octubre quilla callari punllacunapi, año 2 antes de la era comunbimi nacirirca (Lucas 3:23).

 Si Jesús na 25 de diciembreta nacirishca cajpica ¿imamandata Jesús nacirishcataca 25 de diciembreta yarin? Enciclopedia de la Religión Católica libropi nishcashnaca, chai Iglesiapi ñaupaman pushajcunaca, ‘yanga dioscunata adorana fiestacunatami, cristiano fiestacunaman tigrachingapaj munarca. Roma llactapi yanga dioscunata adoraj gentecunaca, 25 de diciembretami “na mishai tucuna Indi” nacirishcata celebran carca’ nin. The Encyclopedia Americana nishcashnaca, yanga dioscunata adorajcuna cristiano tucushpa, cristiano canata alicachichunmi shina rurarca nin.