Éxodo 15:1-27
15 Chai jipaca Moisespash y israelitacunapashmi cai cancionda Jehová Diosman candarca:
“Jehová Diosmanmi candagrini. Porque shuj jatun macanajuipimi paica vincishca.
Caballota y caballopi tiajujtapashmi mar yacuman shitarca.
2 Ñuca fuerza, ñuca poderca Jehová* Diosmi can. Porque paimi salvahuan.
Paimi ñuca Taita Dios can. Paitami alabasha. Paimi ñuca punda taitacunapa Taita Dios can. Ñucaca paitami alabasha.
3 Jehovami paipa shuti can. Jehová Diosca alipachami macanajunata yachan.
4 Faraonba carretacunata, paipa soldadocunata mar yacuhuanmi taparca.Faraonba alipacha soldadocunapash Mar Rojopimi pambarirca.
5 Yacu olacunami paicunataca taparca. Chaimi paicunaca rumishna ucu ucuman huashajurca.
6 Jehová Dioslla, quiquinba ali lado maquica ashtaca podertami charin.Jehová Dioslla, quiquinba ali lado maquica contracunatapash tucuchinllami.
7 Ashtaca poderta charimandami canba contracunataca tucuchinata yachangui.Quiquinba culirashcaca ninashnami can. Chai ninami contracunataca jupatashna rupachin.
8 Quiquin fucujpimi yacucunaca pircashna quidarca.Yacucunataca casillami quidachircangui. Yacucunataca jarcarcanguimi.Mar chaupipimi millai yacucunaca congelarishcashna quidarca.
9 Contracunaca ninajurcami: ‘Paicunataca catigrinimi. Paicunataca japigrishami.
Paicunapa cosascunataca ñucami quichusha. Ñuca munashcatami japisha.
Ñuca espadahuanmi huañuchisha. Ñuca maquihuanmi paicunataca tucuchisha’ ninajurcami.
10 Quiquinba huairahuan fucujpimi mar yacucunaca paicunata taparca.Millai yacucunapimi paicunaca llashaj fierroshna pambarirca.
11 Jehová Dioslla, quiquinshna Taita Diosca ni shuj diosllapash na tianllu.
Quiquinga santopacha santomi cangui. Quiquinshnaca nipi na tianllu.
Candashpami quiquindaca alabana y manllana canchi. Quiquinmi sumaj sumaj cosascunata rurangui.
12 Quiquinba ali lado maquitami alzarcangui. Chaimi alpaca paicunata langarca.
13 Salvangapami israelitacunataca juyashpa* pushamushcangui.Quiquinba ninan fuerzata utilizashpami israelitacunataca quiquin separashca pushtuman pushagringui.
14 Gentecunaca can imacunatalla rurashcataca uyangami. Uyashpaca manllaringami.Filistea llactapi gentecunataca ninan nanaimi* japinga.
15 Edom llactamanda jefecunaca chai ratopimi ninanda manllanayachinga.Moab llactapi poderoso gobernantecunaca chujchuitami chujchunajunga.
Canaán llactamanda tucuilla gentecunami manllaringa.
16 Paicunaca ninandami manllanayachinga.
Quiquinba ninan podermandami rumishna casilla quidanga.Jehová Dioslla, quiquinba llacta yalingacamanmi paicunaca shina quidanga.Quiquin formashca llacta yalingacamanmi shina quidanga.
17 Quiquinba llactataca quiquinmi apamungui. Quiquinba urcupimi* shayachigringui.Jehová Dioslla chai urcutaca quiquinba causana pushtu cachunmi alistashcangui.Jehová Dioslla chai sagrado pushtutaca quiquinllatami quiquinba cachun agllashcangui.
18 Jehová Diosca para siempremi mandanga.
19 Faraonba caballocuna, guerra carretacuna y caballopi tiarishca soldadocuna mar yacuman yaicujpica,Jehová Diosmi yacucunataca cutin paicunapa pushtuman tigrachirca. Yacucunaca tapashpami saquirca.Shinapash israelitacunaca mar chaupitami chaquishca alpata yalirca” nishpa candanajurca.
20 Chaipimi Aaronba pani Miriamga, shuj panderetata japirca. Paica profetami* carca. Tucuilla chaishuj huarmigucunapashmi panderetacunata tocashpa, bailashpa Miriamdaca catiria llujshirca.
21 Miriamga candashpami jaricunataca cashna nishpa contestarca:
“Jehová Diosman candaichi. Porque shuj jatun macanajuipimi paica vincirca.
Caballota y caballopi tiajuj soldadocunatapash marmanmi shitashpa saquirca” nishpami contestarca.
22 Jipamanmi Moisesca israelitacunataca Mar Rojomanda apashpa rirca. Sur shuti desiertomanmi apashpa rirca. Quimsa punllatami yacutapash na tarishpa desiertopi purinajurca.
23 Chai jipaca Mará* pushtumanmi chayarca. Shinapash Mará pushtumanda yacutaca na ufiai usharcachu. Porque chai yacuca jaya jayami carca. Chaimandami chai pushtutaca Mará shutita churarca.
24 Chaipimi israelitacunaca Moisesmanda quejari callarirca. Paicunaca “¿imatata ufiashunyari?” ninajurcami.
25 Moisesca ayudahuai nishpami Jehová Diostaca mañarca. Chaimi Jehová Diosca Moisesmanga shuj yurata ricuchirca. Moisesca chai yurata japishpami yacuman shitarca. Shinami chai yacuca ali yacu tucurca.
Chai Mará pushtupimi paicuna imashina causanata yachachun Taita Diosca shuj mandamientota paicunamanga curca. Taita Diosca paicunapa shungupi imata charishcata yachangapami munarca.
26 Chaimi paicunataca nirca: “Ñucaca cangunapa Taita Dios Jehovami cani. Ñuca imata nijta aliguta cazujpi, shinallata ñucapa ñaupapi ima ali cajta rurajpi, ñuca mandamientocunata aliguta uyajpi y ñucapa tucui leycunata cazujpica, egipciocunaman cachashca unguicunataca ni shujta na cangunamanga cachashachu. Jehová Dios ñucami, cangunataca jambisha” nirca.
27 Chai jipami paicunaca Elim pushtuman chayarca. Chai pushtupica 12 pugyu yacucuna y 70 palmera quirucunami tiarca. Chaimi chai yacu pushtu ladopi carpacunataca shayachirca.
Notacuna
^ Hebreo shimipica “Jah” nijunmi. “Jehová” shutitami ashalla shimicunapica “Jah” nin.
^ O “amor leal”.
^ Hebreo shimipica “ungungapaj nanaicunami” nijunmi.
^ Hebreo shimipica “quiquinba herenciapa urcupimi” nijunmi.
^ Cai shutica “amargura” nijunmi.
