1 Corintios 9:1-27
-
Como apostolca Pabloca shuj alipacha ejemplomi carca (1-27)
9 ¿Nachu ñucaca imagutapash rurangapaj libre capani? ¿Nachu ñucaca apóstol capani? ¿Nachu ñucaca, ñucanchi Señor Jesusta ricushcani? ¿Nachu ñuca villachishcamanda quiquingunaca Señor Jesusta rijsishcanguichi?
2 Shujcunapa na apóstol cashpapash quiquingunapaca apostolmi capani. Porque quiquingunami Señor Jesuspa apóstol ñuca cashcataca ricuchinajunguichi.
3 Ñucata nalicachishpa rimajcunataca nipanimi,
4 ¿nachu imagutapash micuna, imagutapash ufiana derechota charipanchi?
5 ¿Nachu ñucanchipash Señor Jesuspa huauquicunashna, Pedroshna* y chaishuj apostolcunashna Jesusta catij huarmiguhuan cazarashpa, pai cumbajpi purina derechota charipanchi?
6 ¿O Bernabé y ñucallachu mantiniringapaca trabajashpa catina capashcanchi?
7 ¿Maijan soldadota paipa gastocunata paillata pagashpa cuartelpi can? ¿Pita uvasta tarpushpaca, chai uvas fucushcataca na micun? ¿Pita llamagucunata michishpaca, paipa llamagucunapa lechetaca na ashagutallapash ufian?
8 ¿Caicunataca gentecunapa yuyaita catishpachu shina nijuni? ¿Nachu Leypica chashnacunatallata nijun?
9 Moisesman Cushca Leypica “shuj jari huagra granota trillajujpica, jari huagramanga na bosalta churachinachu can” nishpami escribishca tiajun. ¿Taita Diosca jari huagracunamanda preocuparishpachu shina mandarca?
10 ¿O ñucanchimanda preocuparishpachu shina escribichirca? Ari, ñucanchimandami shina escribichirca. Porque yapuj runapash y trillaj runapash granoguta japina yuyaihuanmi trabajana can.
11 Imagutapash tarpunshnami Taita Diospa shimitaca quiquingunapa shungupi tarpupashcanchi. Shinaca ñucanchi minishtirishcagucunapi quiquingunapa ayudata chasquinaca ¿nalichu canman?
12 Shujcuna quiquingunamanda imagutapash chasquina derechota charijpica ¿nachu ñucanchicarin ashtahuan derechota charipanchi? Chashna derechota charishpapash, ñucanchica na imagutapash quiquingunataca mañapashcanchichu. Ashtahuangarin, Cristomanda ali villaicunata ama imahuanbash jarcangapami tucuita aguantapashcanchi.
13 Templo huasipi ruraicunata rurajcunami, templo huasipi tiaj micunataca micun. ¿Nachu chaitaca yachapanguichi? Shinallata ¿nachu yachapanguichi altarpi* sirvijujcunapash, altarpi ofrecishca cosascunamanda ashaguta paicunapa chasquijta?
14 Jesuspash mandarcami, ali villaicunata predicajcunaca, ali villaicunamanda micuchun nishpa.
15 Shinapash quiquingunataca, nimata na mañapashcanichu. Ñucaman imagutapash cuchun nishpaca, na escribijupanichu. Imatapash na mañashpa villachishcamandami cushijupani. Cai cushijuitaca pipash na quichuhuangachu.
16 Pero ali villaicunata predicashcamandaca na jariyajunichu. Porque ali villaicunataca maimandami predicana capani. Ali villaicunata na predicashpaca, aij imachari tucuiman.
17 Ali villaicunata tucui shunguhuan predicashpaca, bendiciai tucushami. Y na predicangapaj munashpapash, predicanami capani. Porque chaita rurachunmi Taita Diosca ñucamanga mingahuashca.
18 Shinaca ¿ima bendiciondata chasquisha? Ali villaicunata gratis predicai ushana bendiciondami chasquisha. Pero ali villaicunata predicaimanda imaguta mañana derechota charishpapash na mañapashachu.
19 Ñucaca nipipa esclavopash na capanichu. Shinapash, ashtaca gentecuna Cristopa ñanda catichun ayudangapami, paicunapa esclavoshna tucupashcani.
20 Judiocuna Cristopa ñanda catichunmi judiocunashna tucurcani. Leyta* catijcuna Cristopa ñanda catichunmi, ñucaca leyta na catijushpapash leyta catijcunashna tucurcani.
21 Leyta na catijcuna Cristopa ñanda catichunmi, leyta na catijcunashna tucurcani. Shinapash Taita Diospa leytaca catinimi. Cristopa leytapashmi catini.
22 Na shinlli cajcuna Cristopa ñanda catichunmi, na shinlli cajcunashna tucurcani. Tucui clase o tucui laya gentecunata ayudangapami, tucuita rurapashcani. Huaquin gentecunallapash salvarichunmi shina rurapashcani.
23 Ali villaicunata shuj gentecunaman compartingapami tucuita rurajupani.
24 Carrerapi calpajcuna, gulpi calpashpapash premiota shujlla japijtaca ¿nachu yachanguichi? Shinaca premiota ganangapami tucui fuerzahuan calpana capanguichi.
25 Carrerapi calpajcunaca tucuicunami, paicunallata tucuipi controlari ushashcata ricuchin. Paicunaca anguyanalla coronata chasquingapami shina ruran. Pero ñucanchica na anguyanalla coronata chasquingapami tucuipi controlarinchi.
26 Chaimandami ñucaca maiman chayanata yachashpa calpajuni. Shinallata, huairata huactanshnapash na macanajunichu.
27 Ashtahuangarin, ñuca cuerpota controlashpami* ñuca cuerpotaca esclavotashna mandajuni. Na shina rurajpica, shujcunaman predicajujpipash Taita Diosca na ñucataca chasquihuanmanllu.
Notacuna
^ Griego shimipica “Cefashna” nijunmi. Cefasca apóstol Pedropa chaishuj shutimi carca.
^ Caipica “Moisesman Cushca Leymandami” parlajun.
^ Griego shimipica “huactashpami” nijunmi.
