2 Corintios 13:1-14
13 Caihuanga ña quimsa viajetami nijupani, quiquingunata visitangapami rigrijuni nishpa. “Imatapash cierto nijushcata o na cierto nijushcata yachangapaca ishcai o quimsa testigocunami tiana can”.
2 Aunque cai rato na chaipi cashpapash, ñucaca ña ishcai viajeta chaipi cashcashnami cani. Chaimandami, pundacuna pecadota rurashcacunaman y tucuicunamanllata cunanmandallata villajupani ñuca chaiman tigrashpaca, nalicunata rurashpa catinajujcunataca na yanga saquishachu nishpa.
3 Shina rurashpami ñucaca Cristo ñucata utilizashpa parlajujta quiquingunamanga ricuchisha. Cristoca fuerza illaca na canllu. Sino quiquingunapurapi pai ashtaca poderta charishcatami ricuchijun.
4 Ciertomi can, paitaca fuerza illa caj horasmi shuj jatun racu caspipi* huarcushpa huañuchirca. Pero cunanga Taita Diospa podermandami causajun. Imashinami paica fuerza illa carca, shinallatami ñucanchicunapash fuerza illacuna capanchi. Pero Taita Diospa poder quiquingunapi cashcamandami Cristohuan causanajushun.
5 Taita Diospi tucui shunguhuan crishpa causanajushcata o na tucui shunguhuan crishpa causanajushcata cuenta japingapaca, quiquingunallatami pensarina capanguichi. Quiquinguna imashina cashcataca quiquingunallatami pensarina capanguichi. Jesucristo quiquingunahuan shujllashna cashcataca ¿nachu cuenta japipanguichi? Taita Diospa ñaupapi nali ricurishpallami shina caitaca na ushanguichiman.
6 Ñucanchicuna Taita Diospa ñaupapi ali cashcata cuenta japichunmi munapani.
7 Quiquinguna imapash nalita ama rurachunmi Taita Diostaca mañapanchi. Pero ñucanchicuna shujcunapa ñaupapi ali ricurinamandaca na mañapanchichu. Sino, shujcunapa ñaupapi ñucanchicuna nali ricurina cashpapash quiquinguna alita rurachunmi mañapanchi.
8 Taita Diospa cabal yachachishcacunapa contra imatapash ruraitaca na ushanchichu. Sino Taita Diospa cabal yachachishcacunata apoyaitallami ushapanchi.
9 Quiquinguna fuerzayu cajpi y ñucanchicuna fuerza illashna cashpami ciertopacha cushijunchi. Quiquingunapa yuyaita cambiachunmi Taita Diostaca mañanajupanchi.
10 Chaimandami nara chaipi cashpallata quiquingunamanga escribijupani. Shinami chaiman chayashpaca, ñucanchi Señor Jesús cushca autoridadhuanga na maipash cachun quiquingunataca tratasha. Porque quiquingunata shinllichichunmi autoridadta cuhuashca y na quiquingunata llaquichichunga autoridadtaca cuhuashcachu.
11 Shinaca huauquicuna, cushilla cashpa catipaichi. Ali ñanda catipaichi, shujcuna cushichichun saquipaichi, shujlla yuyai capaichi y tucuicunahuan tranquilo ali causashpa catipaichi. Shina causajpimi, tranquilo ali causaita caraj, juyaj Taita Diosca quiquingunahuan canga.
12 Caishujhuan chaishujhuan ñavipi muchashpa* saludaripaichi.
13 Taita Diospa tucui separashcacunami* saludocunata cachamupan.
14 Quiquingunataca Señor Jesucristoca ninanda juyapachun.* Taita Diospa juyaipash y paipa espíritu santopa bendiciongunapash tucui quiquingunahuan cachunmi mañapani.
Notacuna
^ Glosariopi “jatun racu caspi” shimita ricupangui.
^ Jesuspa discipulocuna tuparishpaca shinami saludarin carca.
^ Glosariopi “Taita Diospa separashcacuna” shimita ricupangui.
^ Glosariopi “bondad inmerecida” shimita ricupangui.
