Jonás 4:1-11
4 Chaita ricushpaca Jonasca ninandami culirarca.
2 Chaimi Jehová Diostaca cashna nishpa mañarca: “Jehová Dios, ñuca llactapi cashpaca shina pasanataca yacharcanimi. Chaimandami Tarsis llactaman pacajushpa rircani. Porque ñucaca quiquin ali ali cajta, llaquijta, pacienciata charijta,* ashtacatapacha juyajtaca* yachaparcanimi. Shinallata, pitapash na llaquichingapaj munashcatapash yachaparcanimi.
3 Aij Jehová Dioslla, ama shinagu cashpa huañuchitarapash huañuchihuai. Causashpa catinapa randica, mejor huañushparapashmi ali caiman”.
4 Shina nijpimi Jehová Diosca Jonastaca nirca: “Shinapacha culirashpaca ¿alitami rurajuni yanguichu?”.
5 Chai jipami Jonasca chai llactamanda llujshishpa, indi llujshimujuj ladoman rishpa shuj carulla pushtugupi tiarirca. Chaipimi chai llactahuan ima pasajta ricungapaj shuj chujllata rurashpa, chai chujlla sombrapi tiarirca.
6 Chaipimi, Jehová Diosca Jonasta sombrayachichunga shuj yurata* viñachirca. Chai yura sombrayachijpimi Jonasca ninanda cushijurca.
7 Pero cayandi pacaripaca Taita Diosca shuj juruta utilizashpami chai yurataca chaquichirca.
8 Indimui callarishca jipallami, indi llujshimujuj ladomandaca shinllitapacha Taita Diosca huairachimurca. Ushashcata* indijujpimi Jonasca ña desmayangashna carca. Jonasca cutin cutinmi huañungapaj munarca. Chaimi paica cashna nijurca: “Causashpa catinapa randica mejor huañushparapashmi ali caiman”.
9 Chaimi Taita Diosca Jonastaca cashna nishpa tapurca: “Cai yuramandalla shinapacha culirashpaca ¿alitami rurajuni yanguichu?”.
Shina nijpimi Jonasca nirca: “Razonhuanmi ñucaca culirani. Culiramandaca mejor huañungapami munani”.
10 Shina nijpimi Jehová Diosca cashna nirca: “Canga chai yuragutaca ninandami llaquishcangui. Pero chai yuragutaca ni tarpuitapash na tarpurcanguichu, ni viñachitapash na viñachircanguichu. Chai yuraguca shuj tutapillami viñarca y shuj tutapillami huañurca.
11 Shinaca ¿nachu ñucaca jatun Nínive llactata y chaipi ashtaca animalcunatapash llaquina cashcani? Chaipica 120 mil yali gentecunami causan. Paicunaca ima ali cajta ima nali cajtapash* na yachanllu”.
Notacuna
^ O “na ñapash culirajta”.
^ Chai yuraca más o menos zapallotashna fucuj yurami carca.
^ O “pudishcata”.
^ O “maijan ali lado maqui cajta o maijan lluqui lado maqui cajtapash”.
