Apocalipsis 21:1-27
21 Chai jipaca, shuj mushuj cielota y shuj mushuj alpatami ricurcani. Porque punda cielopash y punda alpapash ñami chingashcarca. Mar yacupash ñana tiarcachu.
2 Shinallata, Taita Diospa separashca llactatapashmi ricurcani. Chai llactaca Mushuj Jerusalenmi carca. Chai llactaca Taita Dios tiajuj jahua cielomandami urai shamurca. Cusa tucunahuan cazarangapaj ña arreglarishcalla noviashnami carca.
3 Chai jipaca, mandangapaj tiarina pushtumandami* shinllita cashna nijta uyarcani: “Ricui, Taita Diospa tabernáculo carpa huasiguca gentecunahuanmi can. Taita Diosca paicunahuanmi causanga y paicunapashmi Taita Diospa llacta canga. Taita Diospachami paicunahuanga canga.
4 Paimi gentecunapa ñavimandaca tucuilla viquita fichachinga. Huañuipash nunca más ñana tiangachu. Ima llaquipash, huacaipash, ima nanaipash nunca más ñana tiangachu. Ñucanchita sufrichishca cosascunaca ñami tucurishca” nircami.
5 Mandangapaj tiarinapi tiajuj Taita Diosca nircami: “Ricui, tucuitami mushujta rurajuni”. Shinallata nircami: “Cai shimicunata escribipai. Porque cai shimicunapica confiaita usharinmi y cai shimicunaca ciertopacha shimicunami can”.
6 Chai jipaca nihuarcami: “Cai shimicunaca ñami pactarishca. Ñucami Alfa y Omega* cani. Ñucami principio y fin cani. Yacunayachijujcunamanga ñucami causaita cuj yacutaca pugyumanda gratis carasha.
7 Cai mundota mishajcunaca tucui chaicunatami herenciatashna japinga. Ñucami paicunapa Taita Dios casha y paicunaca ñuca huahuacunami canga.
8 Shinapash cobarde gentecuna, na feta charijcuna, mapa millanai cosascunata ruraj gentecuna, huañuchidor* gentecunaca azufrehuan ninanda rupajuj nina lagunamanmi shitai tucunga. Shinallata huainayana juchapi* urmajcuna, brujeriata* rurajcuna, santocunata adoraj gentecuna y llullata nij tucui gentecunaca azufrehuan ninanda rupajuj nina lagunamanmi shitai tucunga. Chai lagunaca cati huañuitami* ricuchijun” nircami.
9 Chai jipaca, último 7 plagacunahuan junda, 7 tasongunata charijuj 7 angelcunamanda shuj ángel shamushpami cashna nihuarca: “Noviata ricungapaj shamui. Paimi Maltun Llamagupa huarmi tucunga” nircami.
10 Taita Diospa espíritu santota utilizashpami jatun, alto urcuman angelca apahuarca. Chaipimi, Taita Diospa separashca Jerusalén llactata ricuchihuarca. Chai llactaca Taita Dios tiajuj jahua cielomandami urai shamurca.
11 Taita Dios punchapamba cashcamandami chai llactaca punchapamba carca. Shuj juyailla rumigushnami brillajurca. Ushashcata* brillajuj jaspe nishca rumigushnami carca.
12 Chai llactaca jatun, alto muyundi pircacunatami charirca. Shinallata 12 pungucunatami charirca. Chai pungucunapica 12 angelcunami tiarca. Chai pungucunapica, Israel llactapa 12 jatun familiacunapa shuticunami escribishca carca.
13 Indi llujshimuj ladomanga quimsa pungucunami tiarca. Jahua ladomanga quimsa pungucunami tiarca. Ura ladomanga quimsa pungucunami tiarca. Indi huashajuj ladomanbash quimsa pungucunami tiarca.
14 Shinallata, chai llactapa muyundi pircacunapa cimientoca 12 rumicunatami charirca. Chai rumicunapica Maltun Llamagupa 12 apostolcunapa shuticunami escribishca tiajurca.
15 Ñucahuan parlajuj angelca, chai llactatapash, chai llactapa pungucunatapash, pircacunatapash midingapami oro sucusta* charijurca.
16 Chai llactaca cuadradomi carca. Anchopash, largopash lo mismotami midijurca. Chai llactata sucus nishcahuan midijpica, más o menos 2 mil 200 kilometrocuna* tantomi carca. Largo, ancho y altopash lo mismotallatami midijurca.
17 Chai llactapa muyundi pircacunatapashmi midirca. Gentecunapa medidapica 64 metrocunatami* midirca. Ángel midijpica, chashnatallatami midirca.
18 Chai llactapa muyundi pircacunaca jaspe rumishnami carca. Chai llactaca alipacha orohuan rurashcami carca. Vidrioshna claro claromi carca.
19 Chai muyundi pircacunapa cimientocunaca tucui clase o tucui laya juyailla rumicunahuan rurashcami carca. Primer cimientoca jaspe nishca rumihuan, cati cimientoca zafiro nishca rumihuan, tercer cimientoca calcedonia nishca rumihuan, cuarto cimientoca esmeralda nishca rumihuan rurashcami carca.
20 Shinallata quinto cimientoca sardónica nishca rumihuan, sexto cimientoca sardio nishca puca rumihuan, séptimo cimientoca crisólito nishca rumihuan, octavo cimientoca berilo nishca rumihuan, noveno cimientoca topacio nishca rumihuan, décimo cimientoca crisoprasa nishca rumihuan, chaipa cati cimientoca jacinto nishca rumihuan y último cimientoca amatista nishca rumihuan rurashcami carca.
21 Chai llactapa 12 pungucunaca 12 perlas rumicunami carca. Cada pungumi shuj perlas rumiguhuan rurashca carca. Chai llactapa calle principalca alipacha orohuan rurashca y vidrioshna claro claromi carca.
22 Chai llactapica ni shuj templo huasipash na tiarcachu. Porque Tucui Ushaita Charij Jehová* Diospash y Maltun Llamagupashmi chai llactapa templo huasishna carca.
23 Chai llactaca indipash, lunapash punchayachichunga na minishtinllu. Porque Taita Diosmi punchapamba caimanda chai llactataca punchayachijun. Shinallata Maltun Llamagumi chai llactapaca lamparagushna can.
24 Chai llactapa michamandami, gentecunaca purita ushanga. Cai alpapi reycunapash paicuna punchapamba cashcataca chai llactamanmi cunga.
25 Chai llactapa pungucunaca punlla enteropash na vicharingachu.* Porque chaipica na tutayangachu.
26 Gentecunaca Taita Diostapash, chai llactatapashmi respetanga.
27 Mapa cosascunapash, millanai cosascunata rurajcunapash y llullacunapash nunca na chai llactamanga yaicungachu. Para siempre causanata villajuj Maltun Llamagupa libropi anotashcacunallami chai llactamanga yaicunga.
Notacuna
^ Griego shimipica “tronomandami” nijunmi.
^ O letra “A” y letra “Z”. Alfa shimica griego abecedariopa primer letrami can. Y Omega shimica griego abecedariopa último letrami can.
^ O “asesino”.
^ Griego shimipica “pornéia” nijunmi. Glosariopi “huainayana jucha” shimita ricupangui.
^ O “espiritismota”. Glosariopi “espiritismo” shimita ricupangui.
^ Caipica “para siempre huañunatami” shina nijun.
^ O “pudishcata”.
^ O “carrizota”.
^ Griego shimipica “12 mil estadiocuna” nijunmi. Shuj estadioca 185 metrocunatami midin carca.
^ O “vichicaringachu”.
