Santiago 4:1-17
4 ¿Imamandata quiquingunapuraca pliturishpa, culirarishpa causanajupanguichi? ¿Nachu quiquingunapa shungupi nali munaicunamanda shina causanajupanguichi? Chai nali munaicunamandami quiquingunapa shungu ucupica shuj macanajuipishna causanajunguichi.
2 Quiquingunaca munashpapash na charinguichichu. Huañuchishpa y ashtahuan charingapaj munashpami causanajunguichi. Shinapash quiquinguna imata munashcataca na charita ushashcanguichichu. Culirarishpa, pliturishpami catinajunguichi. Quiquingunaca na mañaimandami na charinguichi.
3 Quiquingunaca quiquingunapa munashcatalla rurangapaj nali munaicunahuan mañanajuimandami, mañashpapash na chasquinguichi.
4 Quiquingunaca Taita Diosta jichushpa saquijcunami canguichi.* ¿Nachu yachanguichi, cai mundohuan amigo tucushpaca, Taita Diospa contra tucunajushcata? Porque cai mundohuan amigo tucungapaj munajcunaca, Taita Diospa contrami tucunajun.
5 ¿Taita Dios escribichishca shimipica yangachu nijun yanguichi: “Ñucanchi shungumandami envidiana munaicunata charinchi. Chaimandami shuj shuj cosascunata ansia munanchi” nishpa?
6 Shinapash Taita Diospa ninan juyaimi* envidiana munaitapash yali can. Chaimandami Taita Dios escribichishca shimipica cashna nijun: “Cridoyajcunataca Taita Diosca nimamanda na ricunayachinllu. Pero humilde gentecunataca ninanda juyashpami tratan” nijunmi.
7 Shinaca, Taita Diostami cazuna canguichi. Y Diablopa contrami shayarina canguichi. Shina rurajpimi Diabloca quiquingunamanda caruyashpa anchuringa.
8 Taita Diosmanmi quimirina capanguichi. Chaimi paipash quiquingunapamanga quimiringa. Pecadorcunami capanguichi. Chaimi quiquingunapa nali ruraicunamandaca, limpiarina capanguichi. Quiquingunaca dudanata yachajcunami capanguichi. Chaimi quiquingunapa shungutaca limpiana capanguichi.
9 Quiquingunaca llaquirina y huacanami capanguichi. Asijunaca quiquingunapaca na ali canllu. Sino huacajunami ali can. Shinallata, cushilla canaca quiquingunapaca na alichu can. Sino llaquilla canami ali can.
10 Jehová* Diospa ñaupapica humildemi cana capanguichi. Chaimi paica quiquingunataca alipi churanga.
11 Huauquicuna, caishujmanda chaishujmanda nalicunata parlanataca saquinami capanguichi. Maijanbash paipa huauquimandallata nalicunata parlashpa o paipa huauquita juzgashpaca, leytami nali can nishpa rimajun y leytallatami juzgajun. Shinaca, leyta juzgashpaca, juez tucushpami leytaca na pactachijun.
12 Leycunata Churadorca shujllami tian, Juezpash shujllami tian. Paimi salvaitapash, tucuchitapash ushan. Cutin quiquinga, quiquinba projimota* juzgangapaca ¿pita canguiyari?
13 Quiquingunaca cashnami ninata yachanguichi “cunan o cayaca shuj llactaman rishpami huata enterota chaipi cagrini. Negociocunata rurashpami culquita ganasha” nishpa.
14 Quiquingunaca, caya punlla quiquingunata ima pasanatapash na yachashpatami shina ninata yachanguichi. Quiquingunapa causaica, asha tiempogutalla ricurishpa jipamanga chingarijlla fuyushnami can.
15 Chaipa randica cashnami nina canguichi, “Jehová* Dios munajpica causashunmi. Y caita o chaitami rurashun” nishpa.
16 Pero quiquingunaca cridoyashcacunami canguichi. Y quiquingunamandallatami alabarinajunguichi. Chashna alabarijunaca nali canllu.
17 Shinaca, pipash alita ruranata yachashpata na rurashpaca, ñami pecadota rurajun.
Notacuna
^ Griego shimipica “cazarashca jahua shujhuan causajcunami canguichi” nijunmi.
^ Glosariopi “bondad inmerecida” shimita ricupangui.
^ Caipi prójimo nishpaca “na solo ñucanchipa rijsicunamandallachu parlajun. Sino gulpi gentecunamandami” griego shimipica parlajun.
