Jehová a Diosmi Adanda Evataca cazarachirca. Bibliapica ninmi: Taita Dios punda huarmita rurashpaca Adanbamanmi aparca nishpa. Chaimandami Adanga ninanda cushijushpa, cashna nirca: “Cunangarimbash, paica ñuca tullumanda rurashca ñuca tullullatami. Ñuca aichamanda rurashca ñuca aichallatami” can nishpa (Génesis 2:22, 23). Jehová Diosca, cunanbipash tucuilla cazarashcacuna cushilla causachunmi munan.

Cazarashpaca, nunca na problemacunata charishunllu nishpami huaquingunaca yuyan. Shinapash, ninanda juyarishpa cazarashcacunapashmi problemacunata charin (1 Corintios 7:28). Cai folletopica Bibliamanda huaquin yuyaicunatami ricupashun. Bibliapi yachachishcacunata pactachishpaca cusahuarmi, huahuacunapash cushilla causachunmi ayudanga (Salmo 19:8-11).

BIBLIAPICA NINMI: Familiataca cusami uma cuenda ñaupaman pushana, cuidana can nishpa (Efesios 5:23).

Familia ucupi quiquin cusa cashpaca, Jehová Dios munashcashnami huarmigutaca juyashpa, cuidashpa charina capangui (1 Pedro 3:7). Huarmigutaca quiquinda cumbachunmi Jehová Diosca cushca. Chaimandami juyaihuan, ali tratachun Jehová Diosca munan (Génesis 2:18). Shinallata huarmiguta ninanda juyashpaca, quiquinlla ali canataca na yuyanachu capangui. Chaipa randica huarmigu ima nishcata, ima minishtishcatapash valichinami capangui (Efesios 5:25-29).

Cutin huarmiguca, Jehová Dios munashcashnami cusataca tucui shunguhuan respetashpa, familiata ali cuidachun ayudana capangui (1 Corintios 11:3; Efesios 5:33). Quiquinba cusa imatapash ruragrijujpica ali modos, respetohuanmi cusata ayudana capangui (Colosenses 3:18). Shina rurajpica Jehová Diospash, quiquinba cusapash ninandami alicachinga (1 Pedro 3:1-6).

CAITA RURAPANGUI:

• Cusahuarmicunaca randimanda ali tratarishpa, ayudaringapami parlarina capanguichi. Ishcandimanda maijanbash parlajujpica ali uyashpa, parlarishcaguta pactachingapaj juerzaripaichi

• Ama ñapash culiranguichichu, randimanda ali intindiringapaca tiempomi minishtirin

BIBLIAPICA NINMI: Cusapa o huarmipa munashcatalla ruranapaj randica, ishcandillata ima munashcata ali yarishpami causana capanguichi nishpa (Filipenses 2:3, 4). Jehová Diosca munanmi, paita sirvijcunaca cada punlla ali tratarichun. Chaimandami ishcandi ali tratarina capanguichi (2 Timoteo 2:24). Imata nigrijushpapash ali pensarishpa, juyaihuan parlapanguichi. Bibliapica ninmi: Huaquingunaca imata parlashpapash, espadahuan chugrichinshnami parlan. Cutin alipacha yachajushcacunapa shimica, jambigushnami can nishpa (Proverbios 12:18). Aliguta, juyaihuan parlachunga Jehová Diospa espiritumi ayudanga (Gálatas 5:22, 23; Colosenses 4:6).

CAITA RURAPANGUI:

• Parlajushpa ama culirangapami Taita Diosta mañana capanguichi. Shinami randimanda aliguta intindirishpa parlai ushapanguichi

• Imatapash parlagrijushpaca aliguta pensarishpami parlai callarina capanguichi

BIBLIAPICA NINMI: Cazarashpaca, ishcai cashpapash, shujlla aichami tucunguichi nishpa (Mateo 19:5). Shinapash shuj shuj yuyaicunata charishpami huaquinbica na intindirin. Chaimandami cusa o huarmi imata pensashcata, imashina sintirishcataca ishcandi yachana capanguichi (Filipenses 2:2). Imatapash ruragrijushpaca ishcandimanda ali parlarishpami rurana capanguichi. Shina rurangapaca ¿imata ayudanga? Bibliapica ninmi: Imatapash ruragrijushpaca, shujcuna aliguta yarichijpimi imapash ali Ilujshinga nishpa (Proverbios 20:18). Shinaca imapash importante cosascunata ruragrijushpaca, Taita Diospa consejocunata yarishpami ishcandillata parlarina capanguichi (Proverbios 8:32, 33).

CAITA RURAPANGUI:

• Imapash cosascunamandalla parlanapa randica, ishcandi imashina sintirishcata parlaripanguichi

• Nara imatapash rurashpallatami, cusahuarmi parlarina capanguichi