Cazarashca jipaca imapash problemacunami tian, taitamama imashina viñachishcamanda, na igual pensashcamandami shina pasan.

Problemacunaca imacunamandapash, cungashcapi ricurinllami. Imapash problema tiajpica yangata cunganallaca na canllu. Bibliapica ninmi, ima pasajpipash parlarishpami ayudarina canguichi nishpa (Mateo 5:23, 24). Bibliapa consejocunata pactachishpallami ali causaita ushapanguichi.

BIBLIAPICA NINMI: Parlaringapajpash tiempo tianmi nishpa (Eclesiastés 3:1, 7). Shina nishpaca ima problemacuna tiajpipash imashina sintirishcata ishcandimanda imatapash na pacashpa, na llullashpa parlarinatami nijun (Efesios 4:25). Parlanajushpa culirari callarishpapash, pliturinataca aguantarinami capanguichi. Imata parlanajushpapash aliguta pensarishpa tigrachijpica, ushashcata culirarinamandapash jarcari ushanguichimi (Proverbios 15:4; 26:20).

Imapipash ishcandimanda na igual yuyashpapash, na shimi cacharishcata nishpa, juyaihuan respetohuanmi, parlarina capanguichi (Colosenses 4:6). Imamandapash culirarishpaca uchalla parlashpami ali tucuna capanguichi (Efesios 4:26).

CAITA RURAPANGUI:

• Imapash problemacunamanda parlangapaca, ishcandi ali cashcahurasmi parlana capanguichi

• Ishcandimanda maijanbash parlajujpica, na satirishpa parlachun saquinallami capangui. Jipaman quiquinbash parlai ushapanguimi

BIBLIAPICA NINMI: Huauquipanipurashnami, “aliguta juyarina canguichi. Paimi, ñucatapash yali ali yashpami, caishuj chaishuj alicachirina canguichi” nishpa (Romanos 12:10). Ishcandimanda aliguta uyana, intindirinaca minishtirishcami can. Tucui shunguhuan llaquishpa, juyashpa, na jariyashpami cusa o huarmi ima nijujtaca ali uyana capanguichi (Colosenses 3:12; Santiago 1:19). Cusa o huarmi parlajujpica na uyaj tucushpalla, imata rurajushcata saquishpami ali ali uyana canguichi. Na usharijpica nacha jipaman parlarishunlla nishpa tapunallami capangui. Cusata o huarmita contrata cuenda ricunapa randica, quiquinba cumbagutashnami ricuna capangui. Shina rurashpaca, ishcandillatami na ñapash fiñaringapaj aguantaripanguichi (Eclesiastés 7:9).

CAITA RURAPANGUI:

• Quiquinba nali uyarijujpipash, cusa o huarmi ima nijujtaca alimi uyana capangui

• Quiquinba cusa o huarmi imata ningapaj munajushcata intindingapami juerzarina capangui. Imashina parlajujta, imashina paipa ñavi cajtami ali ricuna capangui

BIBLIAPICA NINMI: “Tucui imata rurashcamandapash, japina tianmi. Ashtahuangarin yanga parlotalla parlashpa causajcunaca, imapash illajmi tucunajun” nishpa (Proverbios 14:23). Ima problemata charishpapash ñami parlashcanchi nishpallaca na quedanachu can. Ashtahuangarin parlashcata pactachingapami juerzarina capanguichi. Shina rurashpaca ninandami cushijupanguichi (Proverbios 10:4). Cusahuarmi ishcandillata aliguman tucuita rurangapaj juerzarishpaca cushillami causanguichi (Eclesiastés 4:9).

CAITA RURAPANGUI:

• Problemacunata charishpa ali tungapaca, cusapash huarmipash imata ruranatami pensarina capanguichi

• Ali cangapaj imatalla rurajushcataca parlarinami capanguichi