LECCIÓN 7
Diospa Reinoca ¿imata can?
1. Diospa Reinoca ¿imata can?
Jesusca ¿imamandata ali mandaj can? (MARCOS 1:40-42)
Jahua cielopi mandaj gobiernomi can. Chai gobiernomi Alpapi gobiernocunata tucuchishpa jahua cielopipash, cai Alpapipash Diospa munaita pactachinga. Diospa Reino mandajujpica gulpi gentecunami cushijushpa, aliguta causanajunga. Chai ali villaiguta uyashpaca ¿nachu cushijupangui? Daniel 2:44; Mateo 6:9, 10; 24:14, liipangui.
Jehová Diosmi paipa Churi Jesusta agllarca Diospa Reinopi mandachun. Apocalipsis 11:15, liipangui.
Taita Diospa Reinoca ¿imata can? nishca videota ricupangui.
2. Jesusca ¿imamandata ali mandaj can?
Jesusca ninanda juyaj, na llullaj caimandami ali mandaj can. Gentecunata ayudangapajpash ushaita charinmi. Paica jahua cielomandami Alpata mandanga (Mateo 11:28-30). Jesús causarishpaca, Taita Dios mandai ningacamanmi paipa ladopi shuyajurca (Hebreos 10:12, 13). Chai jipami Diosca Jesús mandachun saquirca. Daniel 7:13, 14, liipangui.
3. ¿Jesusllachu jahua cielopica mandanga?
Diosca huaquin gentecunatapashmi agllashca Jesushuan jahua cielopi mandachun (Apocalipsis 5:10). Pundapica Jesuspa apostolcunatami Jehová Diosca jahua cielopi mandachun agllarca. Cunangamanmi Diosca paita tucui shunguhuan sirvij jaricunata, huarmicunata agllajun. Chai agllashcacuna huañushpaca Jesús shinami na ismuna, espíritu cuerpohuan causarishpa cieloman ringa. Juan 14:1-3; 1 Corintios 15:42, liipangui.
¿Mashna gentecunashi jahua cieloman ringa? Jesusca nircami, ashallacunallami canga nishpa (Lucas 12:32). Jesusca 144 mil gentecunahuanmi jahua cielomanda Alpata mandanga. Apocalipsis 14:1, liipangui.
4. Jesús mandai callarijpica ¿imata pasarca?
1914 huatapimi Jesusca mandai callarirca. Chai jipami, Diablotapash nali angelcunatapash cielomanda shitamurca. a Shitamujpimi Diabloca ninanda fiñarishpa gentecunata llaquichi callarirca (Apocalipsis 12:7-10, 12). Chaimandapachami llaquicunaca mirashca. Guerracunata, terremotocunata, ungüicunata, shuj llaquicunatapash ricushpami Diospa Reino cai Alpata ñalla mandagrijujta yachanchi. Lucas 21:7, 10, 11, 31, liipangui.
5. Diospa Reinoca ¿imatata rurajun? Jipaca ¿imatata ruranga?
Mundo enteropi Diospa Reinomanda villashpami tucui llactamanda “ashtaca gentecunata” tandachijun. Ashtaca ashtaca gentecunami Jesusta cazunata yachajunajun. Chai gentecunaca Diospa Reino nali gentecunata tucuchijujpica salvaringami. Shinaca Diospa Reino ayudachun munashpaca Jesustami cazuna canchi. Apocalipsis 7:9, 14, 16, 17.
Jesús huaranga huatacunata mandajushpaca, Diospa munaita pactachishpami cai Alpata shuj paraisota ruranga. Chai jipaca Taita Dios tucuita mandachumi saquinga (1 Corintios 15:24-26). Diospa Reinomandaca ¿pimanda villangapaj munapanguiman? Salmo 37:10, 11; Mateo 5:5, liipangui.
a 1914 huatapi ima pasashcata ashtahuan yachajungapaca, ¿Imatata Bibliaca yachachin? libropi 217-220 paginacunata ricupangui.
