Jariyashca cashpaca na tucuicunata igual tratashunllu. Jariyashca gentecunaca shujcunata yalimi canchi yuyanmi. Chaimandami shuj laya gentecunataca yanga gentecunatashna ricun. Na cuidarishpaca ñucanchipashmi shinallata yuyai callarinchiman. Encyclopædia Britannica nishca libropica: “Ashtaca gentecunaca paicunapa crishcacuna, costumbrecuna, churajunacuna, micunacuna ashtahuan ali cajtami yuyan” ninmi. Ama shina yuyangapaca ¿imatata rurana capanchi?

“Ashtahuangarin paimi ñucatapash yali ashtahuan ali yashpami, na jariyashpa tucuicunatallata alicachina canguichi” (FILIPENSES 2:3).

¿Imatata ningapaj munan? Ama jariyashcacuna cangapami esforzarina capanchi. Ñucanchi na jariyashcacuna cashpaca shujcuna ñucanchimanda yali imatapash ali rurajtami cuenta japishun. Maijan costumbrecunata charishpapash tucuicunami igual canchi.

Stefan shuti jarica comunista nishca llactapimi viñarca. Chaimi paica shuj llactamanda gentecunataca na ricunayachin carca. Shinapash jipamanga chai yuyaicunataca saquita usharcami. Paica ninmi: “tucuicunata igual ali tratangapaca shujcuna ñucanchimanda yali cashcata pensanami ayudan. Shinallata tucuicunamanda yachajui ushashcatapash pensanami ayudan” ninmi.

Tucuicunallata imapipash pandarij cashcata, shujcunapash ñucanchita yali imatapash ali rurajtami yuyana capangui. Shuj persona nali cajpillaca na tucuicunami shinallata canga yashpaca na pensanachu capanchi.

Shuj gentecunamanda nalicunata pensajunapa randica, cai cati tapuicunapi pensaripashunchi:

• ¿Chai personaca ciertopachachu nalicunata rurajun? O ¿diferente caimandallachu chai personataca nalicachishpa ricujuni?

• ¿Nacha paicunapash ñucapa pandarishcacunata ricujunga?

• Chai personaca ¿ima cosascunapita ñucata yali ali can?

Cai tapuicunapi aliguta pensarishpaca tucuicunatami igual tratai ushapashun. Shinallata chai personapa ali ruraicunatapashmi ricuita ushapashun.