DOREEN shuti huarmica, paipa cusa Wesley 54 huatacunatalla charijpi umapi shuj tumorta charinmi nijpica ninandami manllarirca. a Doctorcunaca huaquin quillacunatallami causanga nircami. Doreenga ninmi: “Chaitaca na cringapaj munarcanichu, huaquin semanacunatami imata ruraitapash na atinarcani. Shujcunatami shina pasajun yarcanimi. Chai llaquita imashina chimbapuranataca na yacharcanichu” nishpa.

Shina llaqui japijpica casi tucuicunami Doreen shina sintirishca. Jambirita na ushanalla millai ungüica pitapash na yashcapimi japita ushan. Ashtaca gentecunaca familia ucupi pitapash shuj millai ungüi japijpica tucui shunguhuanmi cuidangapaj arreglocunata ruran. Shina gentecunataca ninandami alicachinchi. Shinapash millai ungüita charijta cuidanaca shinllipachami can. Familia ucupi pipash shuj millai ungüita charijpi ali shimicunahuan cushichingapaj, cuidangapaca ¿imatata rurai ushan? Shina cuidajushpa ama yapata llaquiringapaca ¿imatata rurana can? Millai ungüita charishcamanda ña huañuna punlla chayajujpica cuidadorcunaca ¿imatata yuyaipi charina can? Pundapica, cunan punllacunapi millai ungüita charijcunata cuidana imamanda shinllipacha cashcata ricupashun.

Ashtaca huatacuna huashamanga jatun llactacunapipash ungüicunata mishashpa causanaca, cunanmandapash ashtahuan yali shinllimi carca. Gentecunaca ungüicunahuan o imapash pasajpimi huañunlla carca. Huaquin gentecunallami hospitalman rita ushan carca. Ashtacacunaca familiacuna huasiman apashpa cuidajpimi huasipillata huañun carca.

Cunan punllacunapica cientificocuna investigashpa llujchishca tratamientocunata utilizashpami, doctorcunaca gentecuna ashtahuan causashpa catichun ayudan. Punda tiempopi cashpaca imapash ungüi japijpi ñapash huañuna cashca gentecunami, cunanbica tauca huatacunata causashpa catita ushan. Shinapash ali tucuitapachaca na ali tucunllu. Chaimandami paicunallata ñana imatapash rurai ushajpi, paicunata cuidanaca ashtahuan shinlli, shaijushca can.

 Cunanbica, gentecunaca paicunapa huasipica casi ñana huañunllu hospitalcunapimi ashtahuan huañun. Ashtaca gentecunaca pipash ungüihuan huañuna punlla chayangacaman imashina cajtaca casi ñana ricunllu. Huaquingunallami pipash huañujtaca ricun. Chaimi pipash familia ucupurapi imapash millai ungüita charijpica na ali yachaimanda manllan, imata ruranatapash na atinashpa cuidangapapash na munan. Shina pasajpica ¿imatata rurana can?

Imashinami ricurcanchi Doreen shuti huarmica ninandami llaquirirca. Shinallatami pipash familia ucupurapi millai ungüita charijta yachaj chayashpaca ninanda llaquirin. Quiquin shina llaqui apajushpa preocuparijujpi, ima pasanata na yachashpa manllajujpi, llaqui llaqui cajpica ¿imata ayudanga? Diosta ali sirvij shuj runaca cashna nishpami Diosta mañarca: “Ñucanchi shungupi alipacha yachajushca cangapaca, ñucanchi causana punllacunata cuentanata yachachihuayari” nishpa (Salmo 90:12). Diosta mañashpami “causana punllacunata cuentanata” yachachihuan nina canchi. Shinami millai ungüihuan caj ñucanchi juyashca familiataca huañungacaman tucui punllacuna aliguta cuidashun.

Chaipaca imata rurana cashcataca uchallami ricuna can. Familia ucupi pipash millai ungüihuan cajpica parlaita ushajujpillatami, pai ñana parlai ushajpi paipa randi pi parlachun munashcata parlanalla can. Shina aliguta parlarinami ungüita charijta cuidajujpaca, jipaman imata ruragrijushpa, imata decidina cashpapash ashtahuan fácil canga. Por ejemplo, imapash aparatocunahuan causachichun, hospitalman apachun o imapash shuj tratamientocunata rurachun munanguichu nishpa parlanallami can. Callarimandapacha tucuita aliguta parlashpaca, millai ungüimanda ñana ushajujpi familiacuna imashina ashtahuan ali cuidanata yachachunmi ayudanga. Bibliapica ninmi: “Ali yuyaita pipash na cujpica, yuyaicunaca llaquimi tucun” nishpa (Proverbios 15:22).

Millai ungüihuan gentecunata cuidajcunaca paicunata ashagutallapash cushichingapami can. Shina ungüihuan cajcunaca juyanimi nichun, na canlla canguichu nichunmi minishtin. Shinaca ¿imashinata ayudaita ushanchi? Pai gushtashcata liishpa, paita cushichij musicata candashpami ayudaita ushanchi. Ashtahuanbash, shina ungüicunata charijcunaca familia ucupuramanda pipash maquimanda japishpa, aliguman parlajpimi ali sintirin.

Shinallata pipash visitangapaj rishpaca shutita villanami can. Shina ungüita charijcunata investigashca shuj informepica ninmi: “Tacarina, malina, uyana,  mutijina, ricuita ushanamandaca, uyanami ultimoman chingarin nishpa. Puñujunshnalla ricurishpapash tucuitami uyajuita ushan. Chaimandami paicunapa ñaupajpi puñujunmi yashpaca na imatapash ninallachu can.

Usharijpica paihuan Diosta mañanaca alimi canman. Bibliapica apóstol Pablo paipa cumbacunahuan ninan llaquipi cashcata, paicunapa causai peligropi cashcatami nin. Shina llaquipi cashpaca ¿imatata rurarca? Apóstol Pabloca paipa amigocunatami Taita Diosta ñucanchimanda mañapanguichi nirca (2 Corintios 1:8-11). Imapash ungüihuan cashpa, imamandapash yapata preocuparijushpaca Taita Diosta tucui shunguhuan mañanami ninanda ayudan.

Juyashca familia ña huañugrijujta yachashpaca ninandami llaquirinchi. Shina sintirinaca normalmi can. Huañungapaca pipash na munanchichu. Ñucanchicunaca huañuna munaihuanga na rurashca canchichu (Romanos 5:12). Bibliapica ninmi: Shuj “fiñaj” o contraca huañuimi can nishpa (1 Corintios 15:26). Chaimandami ñucanchi juyashca familiapuramanda pipash huañunataca pensaitallapash na pensangapaj munanchi.

Millai ungüihuan cajcuna huañuna cashcata yaipi charinami, familiacuna imata rurana cashpapash, ashata tranquilo cachun ayudanga. Imacunalla pasana cashcata yachangapaca  “huañuna punllacuna pactajujpi” nishca recuadrota ricupangui. Ña huañuna punllacuna pactajujpica na tucuicuna chai llaquicunatallataca charinllu. Shinapash casi tucuicunami chai recuadropi nishca llaquicunamanda huaquingunatallapash charin.

Familia ucupuramanda ñucanchi juyashca familia huañushca jipaca, chai llaqui punllacunapi ayudashca shuj ali amigohuan parlanami ali canman. Cuidashpa ayudashcacuna, caishuj familiacunapash llaqui punllacunaca ñami yalirca nichun, ñucanchi juyashca familiaca ñana sufrijunllu nishpa cushichichunmi minishtin. Shinallata gentecunata Ruraj Diosca juyaihuanmi cashna nin: “Huañushcacunaca, imatapash na yachanllu” nishpa (Eclesiastés 9:5).

Familia ucupuramanda pipash millai ungüita charijpi cuidajushpaca huañuna punlla ña chayajujpi, ña huañushca jipapash Taita Diospi confianaca minishtirishcapachami can. Taita Diosmi shuj gentecunapa ali ruraicunahuan, cushichij shimicunahuan ayudaita ushan. Doreenga ninmi: “Tucuicunapa ayudata chasquinatami yachajurcani. Ñucanchi yashcatapash yalimi ayudarca. Ñuca cusahuanga Jehová Diosllata ‘cangunata ayudangapaj caipimi cani’ nijushcatashnami ricurcanchi. Chaitaca nunca na cungashachu” nishpa.

Jehová Diosmi tucuicunata yali ali cuidaj can. Ñucanchicunata pai Rurashcamandami ñucanchi imashina sintirishcata ali intindin. Jehová Diosca ñucanchicuna ñaupaman catichun ayudangapaj, animangapami ushaita charin. Ashtahuanbash Jehová Diosca nishcami, huañuita para siempre tucuchishpami, ñuca yuyaipi caj ashtaca ashtaca huañushcacunataca causachisha nishpa (Juan 5:28, 29; Revelación [Apocalipsis] 21:3, 4). Chai shimicuna pactarijpica ñucanchicunapashmi apóstol Pablo nishca shina cashna nita ushashun: ‘Huañui, ¿maipita can tujsishpa huañuchinaca?’. Huañui ‘¿imashnata mishai ushanguiyari?’ nishpa (1 Corintios 15:55).