Bibliapica imapash shimicunata mirachishca o anchuchishcacha can nishpami huaquin gentecunaca tapurin. Taita Diosmanda villaj Isaiasca “Taita Diospaj Shimica, causaita causaicaman causajunllami” nircami (Isaías 40:8). Taita Diospa nishcacuna Bibliapi nima na cambiashcataca ¿imashinata yachapanchi?

Biblia tiashpa catichun, shinallata pipash Bibliapa imapash shimicunata ama cambiachunmi Taita Diosca ricurian. Punda tiempopica copistas nishca jaricunaca paicunallata escribishpami Bibliapa copiacunataca ruran carca. Chai jaricunaca Bibliapa copiacunapi ama imatapash mirachingapaj o anchuchingapami letracunata cuentan carca. Shinapash tucuicuna juchayu caimandami chai copistas nishca jaricunapash huaquin cambiocunata rurashpa pandarishca.

Punda tiempopi Bibliapa rurashca ashtaca ashtaca copiacunami cunanbica tian. Shuj copiapi shuj palabra na cabalshnalla ricurijpica shuj copiacunahuan ricushpami chai palabra ali cajta o nali cajta yachai usharin (Caimanda ashtahuan yachangapaj munashpaca Internetpi español shimipi, jw.org paginapi “¿Se ha cambiado o manipulado la Biblia?” nishca tapuimanda yachajupangui).

Por ejemplo, 1947 huatapimi Rollos del mar Muerto nishca pillushca papelcunatami shuj utujupi gentecunaca tarirca. Chaitaca mar Muerto nishca pushtupimi tarirca. Chai Rollos del mar Muerto nishca pillushca papelcunapimi Bibliamanda huaquin partecuna escribishca can. Shinallata chai rollocunaca dos mil yali huatacuna huashamanmi escribishca can. Alipacha estudiashca jaricunaca Rollos del mar Muerto nishcata, Bibliahuan comparashpa ricushpami tauca alipacha yuyaicunata tarishca.

Chai alipacha estudiashca jaricunaca ñucanchi charishca Bibliaca cabalpacha cashcatami cuenta japirca. a Cunanbi ñucanchi charishca Bibliata, punda tiempomanda Bibliahuan ricushpaca Taita Diospa shimi nima na cambiashcata, cabalpacha cashcatami ricuchin. Shinaca Taita Diosllatami paipa nishcacuna cunan punllacunacaman imapash ama cambiachun ricuriajushca.

Shinaca Bibliata liijushpa chaipi nishcacuna tucui cabal cashcata cuenta japipanchi. Shinallata Taita Diosmanda villajcuna imacunatalla rurashcata ricupashunchi.