1, 2. a) Jehová carashca regaloca ¿imacunatallata ricuchin? b) Cai temapica ¿ima tapuicunamandata yachajupashun?

 JEHOVÁ DIOSCA ñucanchita ninanda juyaimandami, paipa juyashca Churi cai Alpapi huañuchun cachamurca (Juan 3:16; 1 Juan 4:9, 10). Jesuspa causaica tucui cosascunamanda ashtahuan valishca regalomi can. Chaimandami apóstol Pabloca nirca, chai regaloca ‘na parlai ushanallata caramushcami’ can nishpa (2 Corintios 9:15). ¿Imatata apóstol Pabloca ningapaj munarca?

² Apóstol Pablo nishca shinaca, Jesús ñucanchimanda huañushpami Jehová Diospa tucui shimicuna pactarinata ricuchirca (2 Corintios 1:20, liingui). ‘Na parlai ushanallata caramushca’ shimicunaca, na Jesuspa causaitallachu ricuchijun. Jehovapa juyaita, Jehová imashina ñucanchita bendiciashcatapashmi ricuchijun. Cai valishca regalo imashinapacha cashcata parlaitaca na atinanchichu. Shinaca ¿imashinata cai valishca regalomanda  agradicishcata ricuchi ushanchi? Jesús Huañushcata Yarina Punlla ña chayamujushcata yachashpaca ¿imatata rurana canchi? Cai huataca, Jesús Huañushcata Yarina Punllataca miércoles 23 de marzotami canga.

3, 4. a) Shuj regalota chasquishpaca ¿imashinata sintiripanchi? b) Huaquin regalocunaca ¿imashinata ñucanchi causaita cambian?

³ Ñucanchiman shuj regaloguta carajpica ninandami cushijunchi. Huaquin regalocunacarin ñucanchi causaita cambianmi. Pensaripai, shuj jatun nalita rurashcamanda huañunami cangui nishcanman. Shina nishca jipalla quiquin na rijsishca gente, quiquinba randi ñuca huañusha nijpica ¿imashinashi sintiringuiman?

⁴ Shina pasajpica, nali ruraicunata saquishpachari cambiangapaj munanguiman. Shinallata juyaita ricuchingapaj, imagutapash carangapaj, quiquinda nali tratajcunatapash perdonangapachari esforzaringui. Ashtahuanbash, na rijsi gente quiquinba randi huañushcamandaca tucui causaipimi agradicinguiman.

 5. ¿Imamandata ninchi, Jehová Diosmi tucuita yali valishca regalota carashca nishpa?

⁵ Jehová ñucanchicunaman carashca regaloca, tucui regalocunata yali ashtahuan alimi can (1 Pedro 3:18). Juchayucuna caimandaca tucuicunami huañuna tucunchi (Romanos 5:12). Shinapash, ñucanchita ninanda juyaimandami Jehová Diosca paipa Churita ñucanchicunapa randi huañuchun cachamurca (Hebreos 2:9). Jesús huañushcamandami shuj punllacarin huañuipash tucuringa (Isaías 25:7, 8; 1 Corintios 15:22, 26). Jesuspi feta charijcunaca huaquingunaca jahua cielopi, cutin ashtacacunaca cai Alpapimi cushilla, tranquilo para siempre causanga (Romanos 6:23; Apocalipsis 5:9, 10). Shinapash ¿imashinata Jehová carashca regaloca ashtahuan ayudan?

 6. a) Shamuj punllacunapica ¿ima bendiciongunatata charipashun? b) Jehovapa regalomanda agradicishcata ricuchingapaca ¿imatata rurana capanchi?

⁶ Jehová Diospa valishca regalomandami cai Alpaca shuj paraíso tucunga. Ungüicunapash ñana tiangachu. Huañushcacunapash causaringami (Isaías 33:24; 35:5, 6; Juan 5:28, 29). Cai valishca regalomandaca Jehovatapash, Jesustapash ninandami agradicinchi. Agradicishcata ricuchingapaca ¿imatata rurana canchi? Pundapica, Jesuspa ejemplotami catina canchi. Shinallata, ñucanchi huauquipanicunata juyanami canchi. Ashtahuanbash, shungumandami perdonana canchi.

7, 8. a) Ñucanchita juyaimanda Jesús imata rurashcata agradicishpaca ¿imashinata sintirishun? b) Jesusta agradicishpaca ¿imatata rurashun?

⁷ Jehová Diospa juyaimi tucui ñucanchi causaipi Jesusta alicachichun ayudan. Apóstol Pabloca nircami: “Cristopaj juyaimi, ñucanchitaca ninanda cashna yarichimujun” nishpa (2 Corintios 5:14, 15, liingui). Apóstol Pablo nishca shinaca, ñucanchita juyaimanda Jesús imata rurashcata agradicishpaca, Jesusta juyashpa paita alicachingapami munashun. Shinallata, Jehová ñucanchimanda imata rurashcata ali intindishpaca Jesús munashcashnami causashun. Shinaca ¿imashinata causana canchi?

⁸ Ñucanchicunaca Jesuspa chaquita catishpami “paishnalla” causana canchi (1 Pedro 2:21; 1 Juan 2:6). Jehovatapash, Jesustapash  cazushpami paicunata juyashcata ricuchinchi. Jesusca nircami: “Ñuca mandashca shimicunata chasquishpa pactachishpa causajllami, ñucataca juyahuan. Paitaca, ñuca Taitapash juyangami. Ñucapash paitaca juyashami, paimanmi ricurisha” nishpa (Juan 14:21; 1 Juan 5:3).

 9. ¿Imamandata huaquin tapuicunataca yaipi charina capanchi?

⁹ Jesús Huañushcata Yarina Punlla chayamujujpica, imashinata causajuni nishpami tapurina canchi (“¿Imatata nisha nin?” nishca recuadrota ricupangui). Shinallata cashna pensaripashun: “¿Imacunapillata Jesuspa chaquita catijuni? ¿Imapipash mejoranachu cani?” nishpa. Cai mundopi gentecunashna ama causangapami cai tapuicunataca yaipimi charina canchi (Romanos 12:2). Na yaipi charishpaca famoso gentecuna, alipacha yachajushca gentecuna, imapash deportecunapi ganashca gentecunapa ruraicunatami ñucanchicunapash rurai callarishun (Colosenses 2:8; 1 Juan 2:15-17). ¿Imashinata cai ruraicunamandaca jarcarita ushanchi?

10. a) Jesús Huañushcata Yarina Punlla chayamujpica ¿imapita pensarina capanchi? b) ¿Ima cambiocunatata rurana capanchi? (Callari dibujocunata ricupangui).

¹⁰ Jesús Huañushcata Yarina Punlla chayamujujpica, ñucanchi ropata, musicata, peliculacunata, celularta, tabletpi o computadorapi imacunatalla charishcatami ali ricuna canchi. Pensaripai: “Ñuca churajushca ropata Jesús ricujpica ¿pinganayachishacha?” (1 Timoteo 2:9, 10, liingui). “Ñuca churajushca ropahuanga ¿Jesuspa chaquita catijushcatachu ricuchini? Ñuca peliculacunata, musicacunataca ¿Jesusca alicachinmanlla? ¿Ñuca tabletta o celularta Jesusman mañachimanllacha? Ñuca gushtashca videojuegocunata Jesusman ricuchishpa ¿imamanda gushtashcata nita ushaimanlla?” nishpa. Jehovata juyashpaca, imapash nali cosascunataca mashna valijpipash saquinami canchi (Hechos 19:19, 20). Jehovaman mingarishpaca Jesuspa ejemplotami catishun nircanchimi. Chaimandami, Jesuspa chaquita catinata imapash jarcachunga na saquina canchi (Mateo 5:29, 30; Filipenses 4:8).

11. a) Jehovata, Jesusta juyashpaca ¿imatata rurana capanchi? b) Congregacionbi shujcunata ayudangapaca ¿imatata rurana capanchi?

¹¹ Jehovata, Jesusta juyaimandaca ¿imatata ashtahuan rurai ushanchi? Tucuicunamanmi cushijushpa villachina, yachachina canchi (Mateo 28:19, 20; Lucas 4:43). Shinallata Jesús Huañushcata Yarina quillacunapica, precursor auxiliarcuna tucushpami 30 ó 50 horascunata villachi ushanchi. Shuj ejemplota ricupashun. Shuj viudo huauquiguca 84 huatacunata charimanda, irquilla caimandami precursor auxiliar caitaca na ushashachu yarca. Shinapash, paipa ladollapi causaj precursor huauquicunami carropi apashpa, alillata territoriopi villachichun ayudashunllami nirca. Shina rurashcamandami, chai mayorlla huauquiguca shuj quillaca 30 horascunata villachita usharca. ¿Ñucanchipash marzo, abril quillapi congregacionmanda pitapash precursor auxiliar cachun ayudaita ushashunlla? Huaquinbica na tucuicuna precursor tucuita ushanchichu. Shinapash ñucanchi tiempota, fuerzatami Jehovata ashtahuan sirvingapaj utilizai ushanchi. Shina rurashpaca, apóstol Pabloshnami ñucanchicunapash Jesusta agradicishcata ricuchishun. Jehová Dios ñucanchita juyashcamanda agradicishcata ricuchingapaca ¿imatata ashtahuan rurana canchi?

12. Jehová ñucanchita juyachunga ¿imatata rurana capanchi?

¹² Jehovapa juyaica ñucanchi huauquipanicunata juyachunbashmi ayudan. Apóstol  Juanga nircami: “Juyashca crijcuna, ñucanchitaca Taita Diosmi ninanda juyajushca. Shinamandami ñucanchipash, caishujhuan chaishujhuan ninanda juyarishpa causana canchi” nishpa (1 Juan 4:7-11). Jehová Dios ñucanchita juyachun munashpaca, ñucanchicunapashmi huauquipanicunata juyana canchi (1 Juan 3:16). ¿Imashinata huauquipanicunata juyashcata ricuchi ushanchi?

13. ¿Ima ali ejemplotata Jesusca saquirca?

¹³ Jesusca paipa ejemplohuanmi gentecunata juyanataca yachachirca. Chaimandami, cai Alpapi cashpaca humilde gentecunata ashtahuanga ayudarca. Shinallata suchucunata, ungushcacunata, ñausacunata, sordocunata, na parlaita ushajcunatami jambirca (Mateo 11:4, 5). Jesusca chai tiempopi religiongunata ñaupaman pushajcunashnaca na carcachu. Gentecuna Taita Diosmanda yachajungapaj munajpica, Jesusca cushijushpami yachachin carca (Juan 7:49). Shinallata humilde gentecunataca ninandami juyan carca (Mateo 20:28).

14. Huauquipanicunata juyashcata ricuchingapaca ¿imatata rurana capanchi?

¹⁴ Jesús Huañushcata Yarina quillacunapica, congregacionbi huauquipanicunata ashtahuanbachaca mayorllacunata imashina ayudanatami pensarina canchi. Imapash micunaguta apashpa, huasipi ima ruranacuna tiajpipash ayudashpa, tandanajuiman, villachinaman pushashpa, visitagrishpami ayudaita ushanchi (Lucas 14:12-14, liingui). Jehová ñucanchita juyashcamandaca ñucanchi huauquipanicunatapash juyanami canchi.

15. ¿Imatata tucuicuna yarina capanchi?

¹⁵ Jehovapa juyaica huauquipanicunata perdonachunbashmi ayudan. Tucuicunallatami Adanba huahuacuna caimandaca juchayucuna cashpa huañuna tucunchi. Chaimandami pipash na nita ushan, Jesús salvachunga na minishtinichu nishpa. Jehovata tucui shunguhuan sirvijcunapashmi Jesús huañushpa salvachun minishtin. Ashtaca dibita perdonashca cuendami Jehová Diosca ñucanchitaca perdonashca. ¿Imamandata tucuicuna chaita yarina canchi? Cai tapuita intindingapaca Jesuspa shuj chimbapuraita ricushun.

16, 17. a) Shuj rey ashtaca dibita perdonashcamanda parlashpaca ¿imatata Jesusca yachachingapaj munarca?

¹⁶ Jesusca shuj esclavomandami parlarca. Cai esclavoca shuj reymanmi 60 millón culqui monedacunata dibirca. Shinapash, cai reyca ashtaca culqui cajpipash chai esclavotaca perdonarcami. Jipamanga, chai esclavoca paiman 100 culqui monedacunatalla dibij esclavotami tuparirca. Ashtaca culquita dibishcata rey pernonashcamanda agradicishpaca, ashalla culquita dibij esclavotaca perdonanmanmi carca. Shinapash chai esclavoca na perdonarcachu. Ashalla dibita na perdonashcata rey yachaj chayashpaca ninandami culirarca. Chaimandami, reyca chai nali esclavota cayashpa cashna nirca: “Can ñucaman cunata charishcata cungapaca, ashaguta shuyapai  nishpa mañajpica, saquinguilla nishpami candaca cacharircani. ¿Nachu cambash, cambaj cumbataca chashnallata llaquina carcangui?” nishpa (Mateo 18:23-35). ¿Imatata Jesusca cai ejemplohuanga yachachingapaj munarca? Jehová Dios ñucanchi juchacunata perdonashpaca, ashtaca culquita dibishcatashnami perdonashca. Shina perdonashcata agradicishpaca ¿imatata rurana canchi?

¹⁷ Jesús Huañushcata Yarina Punlla chayangacamanga cashna pensaripashunchi: “¿Pipash nali tratahuashcachu? ¿Perdonaita ushashcanichu?” nishpa. Jehová Diosca perdonangapaj listomi shuyajun. Ñucanchicunapash paipa ejemplota catishpami ‘nalita rurashcata cungashpa’ perdonana canchi (Salmo 86:5; Nehemías 9:17). Jehová perdonashcata agradicishpaca, shungumandami ñucanchicunapash tucuicunata perdonashun. Shinallata, Jehová ñucanchicunata juyashpa perdonachunga, huauquipanicunata juyashcata ricuchishpami perdonana canchi (Mateo 6:14, 15). Perdonashpapash ima pasashcataca na cambiai usharinllu. Shinapash, shamuj punllacunapi cushilla causachunmi ayudan.

18. Shujcunapa pandarishcacunata aguantachunga ¿imata Lily panigutaca ayudarca?

¹⁸ Huaquinbica huauquipanicunapa pandarishcacunata aguantanaca na facilchu can (Efesios 4:32; Colosenses 3:13, 14, liingui). Lily shuti ^[1] panigupa ejemplota ricupashun. Paica Carol shuti viuda panigutami tucui ladocunaman cumbashpa, comprascunata rurashpa, shuj cosascunatapash rurashpa ayudan carca. Shina cajpipash Carol paniguhuan ali llevarinaca ashata shinllimi carca. Shinapash, Lily paniguca Carol panigupa ali cualidadcunata ricungapami esforzarin carca. Shinami Lily paniguca Carol panigu irquiyashpa huañungacaman tauca huatacunata cuidarca. Lily paniguca ninmi, Carol causarishpa jucha illaj cashcata ricungapami ninanda munani nishpa. Jehová ñucanchita juyashcata agradicishpaca, ñucanchipashmi huauquipanicuna pandarijpipash aguantashpa catina canchi. Ashtahuanbash, Jehovapa juyaimi tucuicuna jucha illaj cashpa imapipash na pandarishpa causana punlla chayamungacaman shuyachun ayudanga.

19. Jehová Dios ñucanchiman valishca regalota carashcamandaca ¿imatata rurana capanchi?

¹⁹ Imashinami ricunchi, Jehová Diosca shuj ninan valishca regalotami ñucanchimanga carashca. Shinaca, Jesús Huañushcata Yarina quillacunapica Jehovapash, Jesuspash ñucanchimanda imacunatalla rurashcapi pensarishunchi. Shinallata, cada punlla paicunata agradicishcata ricuchishunchi. Ashtahuanbash Jesuspa ejemplota catishpa, ñucanchi huauquipanicunata juyashunchi, shungumanda perdonashunchi.