TURISTACUNACA punda Belén llactata visitashpa purinajushpami chai llacta micunata malingapaj munarca. Shuj turistaca falafel nishca micunata shuj restaurantepi jatujujtami ricurca. Falafeltaca garbanzo granota cutashpami chaipica tomateta, cebollata o imagucunatapash chapushpa pita nishca tandapi churan. Chai micunaguta micushpami turistacunaca cutin fuerzata japishpa Belén llactata rijsishpa catirca.

Chai turistacunaca na yachashpapash Belén llactapi ashtahuan rijsishca tandatami micunajurca. Belén llactamanda gentecunaca punda tiempomandallatami tandata ruran carian (Rut 1:22; 2:14). Ashtahuangarin pita nishca tandatami Belén llactapica ashtahuan alicachishpa micun.

4 mil huatacuna huashaman Belén llacta ura ladopi ima pasashcata ricushunchi. Abrahanba huarmi Saraca cungashcapi quimsapura visitangapaj shamujpimi ‘tandata’ rurashpa cararca (Génesis 18:⁠6). Paica ali trigo jacuta o cebada jacuta uchalla masashpami tal vez rumipi cusashpa tandataca carajushcanga (1 Reyes 19:⁠6).

Imashinami ricunchi, Abrahanba familiaca paicunallata tandata rurashpami micun carian. Paicuna viñashca Ur llactapi gentecuna jornota charijpipash paica shuj shuj ladocunapi causaimandami jornotaca na charirca. Maiman rishpapash chai llactapi tiashca granota molinopi cutashpa o rumipi huactashpami jacuta rurashpa tandataca micun carca.

400 huatacuna jipaca Taita Diosca israelitacunataca mandarcami, cutana rumitaca na prenda japinachu canguichi nishpa (Deuteronomio 24:⁠6). Cutana rumica minishtirishcapachami carca. Chaihuan cutashpa micuna cajpimi Taita Diosca na prenda japinachu cangui nishpa mandarca. (“ Israelitacunapa punllacunapica ¿imashinata tandataca ruran carca?” nishca recuadrotapash ricupangui.)

Ñaupa tiempocunapica tandaca minishtirishcapachami carca. Chaimandami Bibliapica cutin cutin tandamandaca parlan. Bibliata escribijcunaca tandamanda parlashpaca huaquinbica micuna nishpami churashca. Jesuspash paipa catijcunataca Taita Diostaca cashna mañanguichi nircami: “Ñucanchi micunagutaca, cunan punllapash carahuailla” nishpa (Mateo 6:11). Shinami Jesusca yachachirca, cada punlla micunaguta Taita Dios caranata confiachun (Salmo 37:25).

Tanda o micuna minishtirishcapacha cajpipash Jesusca nircami: ‘Gentecunaca na tandahuanlla causangachu. Taita Dios rimashca tucuilla shimicunahuanmi causanga’ nishpa (Mateo 4:⁠4). Jesusca israelitacunata Taita Dios ayudashca punllacunamandami parlajurca. Israelitacuna ima pasashcata yaripashun. Israelitacunaca Egipto llactamanda rishpami quilla enterota Sinaí nishca chaquishca pambacunapi causanajurca. Micunapash tucurijujpimi paicunaca yarjaimandami huañugrinchi yashpa ninanda quejarishpa nirca, Egipto llactapica ‘tandatapash na ushangacamanmi micunajurcanchi’ nishpa (Éxodo 16:​1-3).

Egiptomanda tandaca micunayaimi cashcanga. Egiptopica ali panaderocuna tiashpami shuj shuj tandacunata ruran carca. Egiptomanda llujchishpapash Taita Diosca israelitacunaman micunata carashpa catingapami munarca.  Chaimandami paicunataca nirca: ‘Jahua pachamandami tandata tamiachimusha’ nishpa. Taita Dios nishca shinaca, cada tutamandami ‘shuj uchilla, jamzi, yuraj’ muyugushnalla jahua cielomandaca tamiamurca. Chaita ricushpami israelitacunaca ‘¿caica imata can?’ nirca. ‘Shina ninajujpimi Moisesca nirca: Canguna micuchun, Mandaj Dios carashca tandami’ can nishpa. Shina nijpimi Taita Dios carashca tandagutaca maná nishpa israelitacunaca shutichirca. Maná tandagutami israelitacunaca 40 huatacunata micurca (Éxodo 16:​4, 13-15, 31). *

Maná nishca tandaguca balun mishquihuan rurashca ñutu ñutu tandagushnalla, micunaimi carca. Tucuicunapami pactarca (Éxodo 16:18). Chaimandami israelitacunaca alicachishpa callaripica micurca. Shinapash jipamanga Egiptopi micunata na cungashpami nirca: “Caipica, maná shuti granollamari ricurin” nishpa (Números 11:⁠6). Jipamangarin ninanda culirashpami nirca: “Ñucanchi shungupica cai yanga micunataca, ña amishcami canchi” nishpa (Números 21:⁠5). Ashtahuangarin, Taita Dios carashca tandagutaca millanayachitapachami millanayachirca (Salmo 105:40).

Ashtaca gentecunaca micuna cashcamandallami tandataca micun. Shinapash Bibliapica shuj ali tandamandami parlan. Chai ali tandatami Jesusca israelitacuna millanayachishca maná tandaguhuan chimbapurarca. Chai ali tandagumandami unai unaicaman ashtaca bendiciongunata chari ushashun.

Jesusca nircami: ‘Ñucami causaita caraj tandagu cani. Cangunapa ñaupa taitacunaca, jichushca pambacunapi maná shuti micunaguta micushpapash tucuillami huañurca. Ñucami jahua pachamanda shamushca tandagu cani. Cai tandata maijanbash micushpaca causaitami causagringa. Ñuca carana tandaguca, ñuca aichagumi [can]. Ñucami cai pachapi causajcunaman causaita carangapaj huañusha’ nishpa (Juan 6:​48-51).

 Ñuca carana tandaguca, ñuca aichagumi can nijujpica ashtaca gentecunaca na intindircachu. Shinapash tandahuan, aichahuan chimbapurashpa parlanaca alimi carca. ¿Imamandata ali carca? Judiocunaca tandatami cada punlla micun carca. Israelitacunapash maná tandaguta micuimandami 40 huatacunata chaquishca pambacunapi causai usharca. Taita Dios carashca tandaguta micushpapash israelitacunaca huaquin huatacunatallami causai usharca. Cutin Jesús ñucanchimanda huañushcapi feta churashpaca unai unaicamanmi causai ushashun. Imashinami ricunchi, Jesusmi ‘causaita caraj tandagu’ cashca.

Yarjajpica tucuicunallatami pedazo tandagutallapash mascashpa Taita Diostaca pagui cai punllagupash micunata carashcamanda ninchi (Mateo 6:​11). Tandata micujushpaca, causaita caraj tandaguta siempre yaripashunchi.

Israelitacuna maná nishca tandaguta na agradicishca cajpipash ¿imashinata causaita caraj tandaguta agradicishcata ricuchi ushanchi? Jesusca nircami: “Ñucata juyashpaca, ñuca mandashca shimicunatami pactachina canguichi” nishpa (Juan 14:15). Shinaca Jesuspa mandashcacunata cazushpaca unai unaicamanmi tandaguta micuna bendiciondapash charishun (Deuteronomio 12:⁠7).