¿NACHU huaquinbica quiquinbash shinallata nishcangui? ¿Nachu huaquinbica yashcangui huahuacuna intindichunga, imashinata yachachina cani, macanachu cani nishpa?

Bibliapi yachachina nishpaca, na cashtiganamandachu parlajun, ni llaquinaita macanamandapash na parlajunllu. Yachachina nishpaca, imapi pandarijujta ricuchinata, ali ñanda ricuchinatami shina nin (Proverbios 4:1, 2).

Huahuacunata aliguta intindijta yachachingapaca shuj jardinbi sisagucunata cuendami cuidana canchi. Sisagucuna juyaillaguta viñachun munashpaca, alpatami aliguta segurana canchi, nali jurucuna ama urmachunbash aligutami ricuriajuna canchi. Nali jihuacuna ama jundachunbash anchuchinami canchi. Huaquinbicarin, sisagucuna aliguta viñachunga nali hojacunatapash cuchushpami anchuchina canchi. Shinallata huahuacunata aliguta viñachingapaca aliguta intindichishpami yachachina canchi. Nali ruraicuna ñucanchi huahuacunapi nara sapiyajpillatami uchalla ricuchina canchi imamanda nali cashcata. Shinapash imashinami shuj sisagupi nali hojacuna tiajpica cuidadohuan cuchushpa anchuchinchi, shinallatami huahuacunata llaquishpa juyaihuan intindichina, yachachina canchi.

Taitamamacunaca Jehová Diospa ejemplotami cati ushapanguichi. Jehová Diosca juyaimandami paipa sirvijcunataca yachachin. Aliguta yachachijpimi paita sirvijcunapash chai yachachishcacunata juyashpa cazun (Proverbios 12:1). Imata yachajushcatapash na cungashpami yaria causan (Proverbios 4:13). Taita Diosca juyashpa, ima pasashcata ali yachashpa, imata nishcata pactachishpami paita sirvijcunataca aliguta intindichishpa yachachin. Shinaca huahuacunata  aliguta intindichishpa yachachingapaca chai quimsa yuyaicunata ricupashun.

Taita Diosca paita sirvijcunata juyaimandami aliguta intindichishpa yachachin. Bibliapica ninmi: ‘Churita juyashpa taita llaquichinshnallatami, Mandaj Diospash pai juyashcacunata llaquichin’ nishpa (Proverbios 3:12). Jehová Diosca millai, llaquichij Diosca na canllu. Paica “llaquij, juyaj, na ñapash fiñarij” Diosmi can (Éxodo 34:6). Paica imata nishpapash ‘na espadahuan chugrichinshnachu’ parlan (Proverbios 12:18).

Taita Diosca ashtaca pacienciatami charin. Chaimandami taitamamacunaca paipa ejemplota catina capanchi. Paipa ejemplota catingapaj munashpapash huaquinbica na ushashpami culiranchilla. Culirashca ratocunapica yapatami huahuacunataca llaquichinchi. Chaimandami culirashpa yachachijpica huahuacunaca na intindin. Culirashpa yachachinaca na valinllu.

Culirashca cashpapash trancarishpa, juyaihuan huahuacunata intindichijpica huahuacunapash intindingapaj munangami. Georgeta, Nicoleta cutin yaripashun.

Georgeca ninmi: “Ñuca churi Jordan huasiman yaicujpica ñuca huarmipash, ñucapash culiramandaca timbunajurcanchimi. Shinapash controlarishpami pai ima nijta uyarcanchi. Ashtahuangarin yapa tutami can, cayapa parlashun nircanchimi. Shinami Jehová Diosta igual mañashpa puñungapaj rircanchi. Caya punllaca ña tranquilollami carcanchi. Shinami aliguman parlashpa shunguman chayajta parlajpi paipash pandarishcanimi nishpa cazushami nirca. Antsicarinmi culirashca ratocunapi na parlana cashcata cuenta japircanchi. Culirashca horascunapi huahuacunata intindichingapaj munajpica na intindinllu. Aliguman uyashpara intindichijpimi paicunapash aliguta intindishpa yachajun” nin.

Nicoleca ninmi: “Ñuca churi paipa panita macashcata yachashpaca ninandami culirarcani. Culirashca ratopi imatapash nijunapa randica, cuartoman ri nishpami culira yalingacaman shuyarcani. Ña tranquilalla sintirishpaca aligutami intindichircani, canba panitaca na macanachu cangui, canba panica llaquillami can nishpa. Shina nijpimi paipa panitaca disculpahuai nishpa ugllarirca. Tranquila sintirishpara parlanaca alimi cashca” nin.

Shinaca huahuacunata cashtigana minishtirijujpipash, juyaihuanmi nalitami rurajungui nishpa aliguta intindichishpa yachachina canchi.

Jehová Diosca ‘llaquichina cashcatallami llaquichin’  (Jeremías 30:11; 46:28). Paita sirvijcunata intindichingapaca tucuita ali ricushpami Jehová Diosca yachachin. Shinaca ¿imashinata taitamamacunaca paipa ejemplota cati ushanchi? Stephenda cutin yaripashun. Paica ninmi: “Ninanda llaquirinajushpapash, imamanda llullajushcata na yachashpapash Natalie uchilla huahuagura cashcata, nara ali intindi ushashcatami ñucanchipash intindircanchi” nin.

Nicolepa cusa Robertpash huahuacuna imamanda nalita rurashcatami pensarin. Paica ninmi: “Primeroca pensarinimi: ¿Cunanllachu shina rurajun? ¿O chai costumbretachu japijun? ¿Shaijushcachu can? ¿Nali sintirimandachu shina rurarca? ¿Imapash problemata charishpachu shina rurajun?” nishpa.

Taitamamacunaca na mayor gentecunatashnachu huahuacunataca tratangapaj munana can. Chaimandami apóstol Pabloca nirca: ‘Ñuca huahuara cashpaca, huahuashnami parlarcani, huahuashnami yarijurcani’ nishpa (1 Corintios 13:11). Robertca ninmi: “Ama yapata culirashpa imacunatapash nijunapa randica ñuca huahua cashpa imata ruraj cashcatami yarini” nishpa.

Shinaca huahuacuna imatapash rurajpica huahuacunara cashcatami yarina canchi. Shinapash na yapata huahuayachijunachu canchi. Nali tucujujta sintishpa o imatapash nali rurajpica na yangata saquinallachu canchi. Quiquingunapa huahuacuna imashina cashcata ricushpa, imamanda imatapash rurashcata pensarishpami huahuacunataca aliguta intindichishpa yachachina canguichi.

Malaquías 3:6​pica ninmi: “Mandaj Dios ñucaca, napacha shuj tucunichu” nishpa. Jehovata sirvijcunaca Jehová Dios paipa nishcacunata na cambiajpimi paipi confiashpa seguro sintirinchi. Huahuacunapash taitamacuna imata nishcata siempre pactachijpica seguromi sintirin. Cutin, culira cashpaca shuj cosasta nijpi, ali cashpaca shuj cosasta nijpica huahuacunapash pandarishpami na cazungapaj munan.

Jesusca nircami: “Imata rurangapajpash, usharina cajpillami: ‘Ari’ nina canguichi. Na usharina cajpica: ‘Na’ ninami canguichi” nishpa (Mateo 5:37). Shinaca imatapash na pactachi ushana cashpaca mejor na ninachu can. Nalita rurajpica caitami rurasha nishpaca, chai nishcata pactachinami can.

Huahuacunata aliguta intindichishpa yachachingapaca taitamamacunaca aligutami parlarina can. Robertca ninmi: “Huaquinbica mama na permisota cujpimi huahuacunaca ñucata permisota mañangapaj shamun. Chaita yachaj chayashpaca ari nishca cashpapash ñuca huarmita apoyangapaca huahuacunataca ninimi, na permisota cunichu” nishpa. Taita o mama na de acuerdo cashpaca ishcandilla parlashpami de acuerdo churarina can.

Jehová Diospa ejemplota catishpa, huahuacunata juyaihuan, ima pasashcata ali yachashpa, imata nishcata pactachishpaca huahuacunataca aligutami viñachi ushangui. Quiquinguna imata ruranata juyaihuan yachachijpica paicunapashmi viñashpaca ima ali cajta, ima nali cajta yachashpa, imata rurana cashcata rurashpa aliguta puringa. Bibliapica ninmi: ‘Huahuataca ali causaita yachachingui. Shina yachachijpica rucuyashpapash, napacha cungangachu’ nishpa (Proverbios 22:6).