1, 2. a) Colosas congregacionbica ¿ima jatun llaquita tiarca? b) Apóstol Pabloca ¿ima consejotata paicunamanga curca?

APOSTOLCUNAPA punllacunapica shuj jatun llaquimi Colosas congregacionbica tiarca. Huaquingunaca Moisesman cushca Leytami catingapaj munanajurca. Cutin shujcunaca ninajurcami, Taita Diosta ali catingapaca tucuitami ladoman saquina canchi nishpa. Chai ishcai panda yuyaicuna tiajpimi apóstol Pabloca nirca: ‘Aliguta yachajunami nij tucushpara, yanga parlocunatalla parlashpa [pipash] pandachinman. Paicunaca Cristomanda na yachachishpami, runacunapa yachachishcata yachachinajun’ nishpa (Col. 2:8).

² Gentecunapa yanga parlocunata, yachachishcacunata ungidocuna catishpaca, Taita Diospa huahuacuna tucuna bendicionda na munajushcatami ricuchinman carca (Col. 2:20-23). Colosas congregacionmanda huauquipanicuna Jehová Diospa ñaupajpi ali ricurishpa catichunmi apóstol Pabloca consejarca: “Cai pachapi ima tiajtapash na yarishpami, jahua pachapi tiajtalla yarishpa  causana canguichi” nishpa (Col. 3:2). Shinaca, Jesusta catij ungidocunaca jahua pachapi imata japigrinatami yaria causana carca (Col. 1:4, 5).

3. a) Jesusta catij ungidocunaca ¿imatata yaria causan? b) Cai temapica ¿imatata yachajugripanchi?

³ Cunan punllacunapi Jesusta catij ungidocunapash Diospa Reinota pundapi churanata, Jesushuan jahua pachapi mandagrinatami yaria causanajun (Rom. 8:14-17). Shinapash cai Alpapi causana esperanzata charijcunaca ¿imatata yaria causanajun? Jahua pachapi imalla tiashcacunata yaria causanaca ¿imata can? ¿Imashinata paicunaca ‘jahua pachapi imalla tiashcata’ yaria causajushcata ricuchita ushan? (Juan 10:16.) Abrahanbash, Moisespash llaquicuna ricurijpica jahua pachapi imalla tianatami yaria causarca. ¿Imashinata paicunapa ejemplota cati ushanchi?

4. Cai Alpapi causana esperanzata charijcunaca ¿imashinata ‘jahua pachapi imalla tiashcata’ yaria causajushcata ricuchi ushan?

⁴ Cai Alpapi causana esperanzata charijcunaca jahua pachaman na rina cashpapash ¿imashinata jahua pachapi imalla tianata yaria causajushcata ricuchin? Paicunaca Jehová Diosta, paipa Reinota pundapi churashpami jahua pachapi imalla tianata yaria causanajushcata ricuchin (Luc. 10:25-27). Jesuspa ejemplota catishpami Jehová Diosta, paipa Reinota pundapi churana canchi (1 Ped. 2:21). Imashinami apostolcunapa punllacunapica panda yuyaicuna, culquita charina munaicuna, Diablopa nali yuyaicuna tiarca, shinallatami cunan punllacunapipash tian (2 Corintios 10:5, liingui). Chashna llaquicuna tiajpimi Jesuspa ejemplota catishpa rijcharia cana canchi. Imapash ruraicuna Jehová Diosmanda caruyachichunga na saquinachu canchi.

5. Ñucanchi shungu imata munajujta yachangapaca ¿imatata rurana capanchi?

⁵ Culquita mirachinamanda, ashtaca cosascunata charinamandaca ¿imatata yanchi? Ñucanchi shungu imata ashtahuan munajushcata yachangapaca ¿imatata rurana canchi? Jesusca nircami: “Maipi imata charishpapash, shungupica chaita yariashpami purinajunguichi” nishpa (Mat. 6:21). Ñucanchi shungu imata munajujta yachangapaca huaquinbi huaquinbica tapurinami canchi: ¿Ñucaca culquipilla, ali trabajota tarinapilla, negociocunapilla, samanapillachu pensajuni? Na cashpaca ¿Jehová Diospa munaita ruranapichu ashtahuan pensajuni? nishpa (Mat. 6:22). Jesusca nircami: ‘Cai pachapi charijyanatalla’ mascajcunaca Jehová Diospa ñaupajpi ali ricurishpa catitaca na ushangachu nishpa (Mat. 6:19, 20, 24).

6. Nali munaicuna ama mishachunga ¿imatata rurana capanchi?

⁶ Juchayucuna nacirishca caimandaca ñapashmi juchapi urmanchi (Romanos 7:21-25, liingui). Jehová Dios paipa espíritu santota na cujpica nali ruraicunata rurashpami, ‘manllanai fiestacunapi, machanacunapi, huainayanapi, pinganai ruraicunapi urmanchiman’ (Rom. 13:12, 13, NM). ‘Cai pachapi ima tiajtalla’ ama yaria causangapaca Jehová Diosta, paipa Reinotami pundapi churana canchi. Shinapash chaita ruranaca shinllimi can. Chaimandami apóstol Pabloca nirca: ‘Ñuca cuerpotami macanshna cazuchishpa, sirvishpa causajuni’ nishpa (1 Cor. 9:27). Shinaca Jehová Diospa ñaupajpi ali ricurishpa catingapaca, ñucanchimandallatami nali munaicunataca sapimanda llujchinshna shitana canchi. Cunanga Jehová Diosta tucui shunguhuan sirvishpa catingapaj, Abrahanbash Moisespash imata rurashcata ricupashunchi (Heb. 11:6).

7, 8. a) Jehová Diosta cazuimandaca ¿imacunatallata Abrahanbash Sarapash saquirca? b) Abrahanga ¿imatata yaria causarca?

⁷ Canba huasi ucupura familiata apashpa Canaán alpacunaman ri nijpica, Abrahanga cushijushpami Jehová Diostaca cazurca. Jehová Diospa tucui ima nishcacunata crishpa Abrahán cazujpimi Jehová Diosca nirca: ‘Canba miraimandaca, shuj jatun llactatami rurasha. Candaca bendiciashami’ nishpa (Gén. 12:2). Shina nishcamanda ashtaca huatacuna yalijpipash Abrahanga paipa huarmi Sarahuanga na huahuacunata chari usharcachu. Shinapash paicunaca, Taita Diosca paipa nishcacunata cungashcangami nishpaca na pensanajushcangachu. Shinallata Ur llactapi ali causaita saquishpa rina, huaquin familiacunata saquishpa rinaca shinllimi cashcanga. Ashtahuangarin, caru carutapacha (1.600 kilometrocuna yalita) rishpami paicunaca Canaán alpacunaman chayagrirca. Chaiman chayagringapaca yarjai pasashpa, carpa huasicunapi causashpa, saltiacunapash japinalla pushtucunatami yalirca (Gén. 12:5, 10; 13:18; 14:10-16). Chashna llaquicunapi cashpapash, paicunaca Ur llactaman tigranataca yaitallapash na yarcachu (Hebreos 11:8-12, 15, liingui).

⁸ ‘Cai pachapi ima tiajtalla’ yaria causanapa randica, Abrahanga Jehová Dios tucui ‘villashcatami crirca’ (Gén. 15:6). Ashtahuangarin, jahua pachapi imalla tianata yaria causaimandami Diospa tucui villashcacuna pactarinata crirca. Chaimandami Jehová Diosca Abrahanman ricurishpa nirca: ‘Cunanga jahua pachata ricui. Chai luzerocunata cuentai ushashpaca cuentailla nircami. Shinallata nircami: Canba miraicunapash, chai luzerocunashnami canga’ nishpa (Gén. 15:5). Jehová Dios paita na cungashpa shina nijpica, Abrahanga ninandami cushijushcanga. Tutacuna jahua pachapi luzerocunata ricushpaca Taita Diospa shimicunataca yariami ricujushcanga. Jehová Dios nishca punlla chayajpica shuj jari huahuagutami Abrahanhuan Sarahuanga charirca (Gén. 21:1, 2).

9. Abrahanba ejemploca ¿imashinata Jehovata tucui shunguhuan sirvishpa catichun ayudan?

⁹ Ñucanchicunaca Abrahanshnallatami Jehová Diospa nishcacuna pactarichun shuyanajunchi (2 Ped. 3:13). Shinapash Jehová Diosta, paipa Reinota na pundapi churashpaca paipa nishcacunaca na ucha pactarimunllu yashpami Jehovata tucui shunguhuan sirvinataca saquishun. Yaripashun. Caina huatacunapica ¿precursor regular tucungapaj o Jehovata ashtahuan sirvingapaj quiquinba munaita huashaman saquiparcanguichu? Shina rurashca cajpica cushijupanchimi. Shinapash cunanbica ¿imatata ruranajunchi? Abrahanda yaripashun. Paica shamuj punllacunapi chasquina bendiciongunata yaria causaimandami Jehovataca tucui shunguhuan sirvishpa cati usharca (Heb. 11:10). ‘Taita Diospi crijpimi’ Abrahandaca ‘[alita] rurashcatashna ricushpa Diosca chasquirca’ (Rom. 4:3).

10. Moisés joven cashpaca ¿imashina causaitata charirca?

¹⁰ Moisespash shamuj punllacunapi chasquina bendiciongunataca yariami causarca. Joven cashpaca, chai punllacunapi ashtahuan jatun llacta ‘Egiptopa yachaicunataca tucuita aligutapacha yachajushcami’ carca. Shinallata faraonba familiami carca. Egiptopi yachajushca caimandaca ‘rimangapapash, imata rurangapapash jatun ushaitami’ charirca (Hech. 7:22). Munashpaca Egipto llactapi jatun mandaj tucuita ushanmanmi carca. Shinapash Moisesca Taita Diospa munaita ruranatami ashtahuan alicachirca.

11, 12. a) Moisespaca ¿imata ashtahuan minishtirishca carca? b) Moisesca ¿imashinata ima ashtahuan minishtirishca cashcata ricuchirca?

 ¹¹ Moisés huahua cajpica paipa mama Jokebedca Jehová Diosmanda yachachijushcangami. Moisespaca Jehovamanda yachajunami minishtirishcapacha carca. Chaimandami Egiptopi mandai ushanatapash, Egiptopi ashtaca cosascunata charinatapash ladoman saquirca (Hebreos 11:24-27, liingui). Huahua cashpa Jehová Diosmanda yachajuimanda, Jehovapa tucui nishcacunata crimandami Moisesca shamuj punllacunapi chasquina bendiciongunata yaria causai usharca.

¹² Moisesca alipacha yachajushca cashpapash chai yachajushcahuan ashtahuan cosascunata charinata, Egiptopi mandanataca na mascarcachu. Bibliapica ninmi, Moisesca ‘faraonba ushipa churimi cangui ni tucungapaca na munarcachu. Paica juchata rurashpa ashacamanlla ninanda cushijushpa causangapaca, na munarcachu. Ashtahuangarin Taita Diospa gentecunahuan ninanda llaquichi tucunatami ashtahuanga munarca’ nishpa. Jipa huatacunamanga Moisés huahua cashpa yachajushcacunami Israel llactata ñaupaman pushachun ayudarca.

13, 14. a) Israelitacunata nara salvashpaca ¿imatata Moisesca yachajunara carca? b) Moisespa ejemplota catishpa ¿imatata ñucanchicunapash yachajuna capanchi?

¹³ Moisesca Jehová Diostaca ninandami juyarca. Egiptopi esclavocunashna causanajuj israelitacunatapash ninandami llaquin carca. Chaimandami Moisés 40 huatacunata charishpaca israelitacunata salvangapaj munarca (Hech. 7:23-25). Shinapash Jehová Diospa ñaupajpica Moisesca huaquin cosascunata yachajunarami carca. Llaquicunata aguantangapaca Moisesca humilde canata, na ñapash fiñarinata, tranquilo canata, jarcarinatapash yachajunarami carca (Prov. 15:33). Moisesca 40 huatacunata llamacunata michishpa purishca jiparami tucui chaicunataca yachajui usharca.

¹⁴ Chaimandami Bibliapica nirca, Moisesca ‘tucui cai pachapi causaj jaricunamanda yali ali shungu’ o na ñapash fiñarijmi carca nishpa (Núm. 12:3). Humilde caimandami Moisesca israelitacuna shuj shuj cajpipash, shuj shuj llaquicunata charijpipash aliguta ayudai usharca (Éx. 18:26). Ñucanchicunapash Moisés imashina cashcatami catina canchi. Shina rurashpallami Jatun Manllanai Llaqui punllacunamanda salvarishpa paraíso Alpagupi causai ushashun (Apoc. 7:14). Shinaca tapuripashunchi: “Ñucaca tucuicunahuanllu ali llevarini? ¿Ñapash fiñarijcunahuanbash, ñapash risintirijcunahuanbash llevarinichu? nishpa. Apóstol Pedroca nircami: ‘Tucuicunatami alicachina canguichi. [Tucui huauquipurami] juyarina canguichi’ nishpa (1 Ped. 2:17).

15, 16. a) ¿Imamandata shamuj punllacunapi chasquina bendiciongunataca yaria causana capanchi? b) ¿Imamandata aliguta causana capanchi?

¹⁵ Jatun llaqui punllacunapimi causanajunchi (2 Tim. 3:1). Chaimandami Jehovapa nishcacunata tucui shunguhuan cringapaj, rijcharishcashna causangapaca shamuj punllacunapi chasquina bendiciongunata yaria causana canchi (1 Tes. 5:6-9). Yaria causai ushangapaca quimsa yuyaicunata ricupashun.

¹⁶ Ñucanchi causaipi. ¿Imamandata aliguta causana canchi? Apóstol Pedroca ninmi: ‘Na israelitacunapa chaupipipash aliguta causapanguichi. Cangunapa rurashcacuna ali cashcata yachashpa, Diosta punchapambagumi cangui ninajuchunmi, chashna causana canguichi’ nishpa (1 Ped. 2:12). Shinaca, huasipi cashpa, trabajopi cashpa, escuelapi cashpa, samanajushpa, villachinajushpapash Jehová Diosta jatunyachishunchi. Juchayucuna caimandaca tucui rurashcacunahuan Jehovata jatunyachinaca shinllimi can (Rom. 3:23). Shinapash ñucanchi ‘crishcacunamanda macanajunshna’  causajushpaca nali munaicunataca mishai ushashunmi (1 Tim. 6:12).

17. ¿Imashinata Jesuspa ejemplota cati ushapanchi? (Callari dibujota ricupangui.)

¹⁷ Ñucanchi yuyaipi. Ali causai ushangapaca ali uyaicunatami charina canchi. Apóstol Pabloca nircami: ‘Cristo Jesús causashcashnallatami cangunapash causana canguichi’ nishpa (Filip. 2:5). Jesusca ¿imashinata carca? Jesusca humildemi carca. Humilde caimandami Jehová Diostaca aligutapacha sirvingapaj munashpa gentecunaman villachinataca yaria purirca (Mar. 1:38; 13:10). Ashtahuangarin Diospa Shimipi tucui nishcacunatami respetashpa catin carca (Juan 7:16; 8:28). Chaimandami Diospa Shimita aliguta yachajushpa intindichin carian. Pi imata nijpipash Diospa Shimipimi ricuchin carca. Jesuspa ejemplota catingapaj munashpaca ñucanchipashmi Bibliata aliguta yachajuna canchi. Villachitapash na jariyashpa, cushijushpami villachina canchi.

18. Jehová Diosta ayudangapaca ¿imatata rurai ushanchi?

¹⁸ Ayudanapi. Jehová Diosca munanmi, ‘Jesuspa shutita uyashpaca, jahua pachapi tiajcunapash, cai pachapi tiajcunapash cungurichun’ (Filip. 2:9-11). Jesusca jahua cielopi ashtaca autoridadta charishpapash paipa Taitataca na jariyashpami cazun. Ñucanchipash Jesuspa ejemplotami catina canchi (1 Cor. 15:28). Chaimandami Jehová Diosta ayudashpa cai pachapi gentecunaman yachachina canchi (Mat. 28:19). Shinallata ñucanchi huauquipanicunatapash shuj gentecunatapash imagupipash ayudai ushashpaca ayudanami canchi (Gál. 6:10).

19. Cai temaca ¿imashinata ñucanchita ayudashca?

¹⁹ Jehová Diosca cutin cutinmi yarichijushca, shamuj punllacunapi chasquina bendiciongunataca yariami causana canguichi nishpa. Shina yarichijushcamandaca ninandami agradicinchi. Shamuj punllacunapi chasquina bendiciongunata yarishpa, ali shunguhuanbacha [na shaijushpa calpashunchi] (Heb. 12:1). Jehová Diospa munaita tucui shunguhuan rurashpa causapashunchi. Shina rurajpimi Jehová Diosca ashtacata bendicianga (Heb. 6:9, 10).