Bibliaca yanga librocunashnaca na canllu. Bibliapimi Tucuita Ruraj Diospa consejocunata tarinchi (2 Timoteo 3:16). Diospa consejocunami ñucanchi causaipi ayudaita ushan. Chaimandami Bibliaca cashna nin: “Taita Diospaj Shimica causaj cashpami, ninan ushaita charin” nishpa (Hebreos 4:12). Bibliaca, cai ishcai yuyaicunahuanmi ñucanchi causaipi ayudan: Ñucanchi causaipa consejocunata cushpa, Diosta ali rijsishpa pai imatalla ruranata ali yachachishpa (1 Timoteo 4:8; Santiago 4:8).

Ñucanchi causaipa consejocunata cun. Bibliaca cada unoman consejocunata cushpa, shuj shuj yuyaicunatapashmi yachachin.

•   Shujcunahuan ali llevarichun (Efesios 4:31, 32; 5:22, 25, 28, 33).

• Quiquinba salud ali cachun (Salmo 37:8; Proverbios 17:22).

• Ima ali cajta ima nali cajta yachajuchun (1 Corintios 6:9, 10).

• Culquita ali utilizanata yachajuchun (Proverbios 10:4; 28:19; Efesios 4:28). a

Asia llactamanda joven cusahuarmicunaca Bibliapi consejocuna ali cashcatami ricurca. Paicunaca chaira cazarashca caimandami na intindirishpa, ishcandi aliguta parlarinatapash na ushanajurca. Shinapash Bibliapi imata liijushcatami paicunapa causaipi pactachi callarirca. Paicunahuanga ¿imata pasarca? Vicentca ninmi: “Bibliata liinami cusahuarmi causaipi ima llaquicuna tiajpipash juyaihuan chimbapurachun ayudahuarca. Bibliapi consejocunata pactachishpami cushilla causanchi” nishpa. Paipa huarmi Annalouca ninmi: “Bibliapi ejemplocunata liinami ñucataca ayudahuashca. Cunanga ishcandillata Diosta sirvina yuyaita charimandami cushilla sintirini” nishpa.

Diosta ali rijsichunmi ayudan. Ashtahuanbash Vicentca ninmi: “Bibliata liijushcamandaca, Jehová b Diosman ashtahuanmi quimirishcani” nishpa. Imashinami ricunchi: Bibliata liinaca Taita Diosta quiquin ashtahuan ali rijsichunmi ayudan. Bibliapi consejocunatallaca na yachajunguichu, Diospa ali amigo caitapashmi ushangui. Shinallata Diospa shimipica shamuj punllacunapi juyailla ali causai tianata, chaipi para siempre cushilla causanatapashmi yachachijun (1 Timoteo 6:19). Shina yachachishcacunataca maijan libropash na yachachinllu.

Bibliata lii callarishpa, liinata na saquishpaca cunanbi ali causashpami, Taita Diostapash ashtahuan ali rijsita ushangui. Shinapash liijushpaca imacunatapash nachari intindingui. Shina pasajpica 2 mil huatacuna huashaman Etiopía llactamanda shuj runagu ima pasashcata yaripangui. Paica Diospa Shimimanda ashtaca tapuicunatami charirca. Jesusta catij Felipeca ¿imata liijushcata intindinguichu? nishpami tapurca. Chaimi Etiopiamanda runaguca cashna contestarca: “Pipash na yachachijpica ¿imashnata yachashayari?” nishpa. c Shina nishca jipaca Felipe paita yachachishpa ayudachunmi saquirca (Hechos 8:30, 31, 34). Quiquinbash Bibliamanda ashtahuan yachajungapaj munashpaca, Internetpi jw.org/qvi direccionman yaicushpa datocunata jundachipangui o cai revistapa ima dirección ashtahuan ladolla cajta ricushpa escribipangui. Shinallata quiquin causaj pushtupi testigo de Jehovacunahuan parlanallami capangui. Na cashpaca testigo de Jehovacunapa Tandanajui Huasiman rinallami capangui. Ashtahuanbash uchalla shuj Bibliata charichunmi animapanchi. Shinami quiquinba causaica ashtahuan ali caita ushanga.