Diosninchic’a cushi cushillam, paypïmi śhayämun tuqui willacuyca. Pay’a llapa familiacunäpis cushi-cushi cawsananchictam munan (1 Timoteo 1:11). Paymä casaracuycäta puntacta licalichila. Diosninchic manam munanchu servinacuycata, pay’a casado cananchictam munan. Casado cal’a wawi-chulicunäta allincamactam ishpichicunchic cushi-cushi cawsapäcunampa. Cristianucunaca Diosninchicta casuculmi casaraculcan concejüćhu registrado canampa. Ashicuy Lucas 2:1, 4, 5.

Diosninchic munayan casado cananchictam. Pay’a, munan walmi-cari cuyanaculcänantam (Hebreos 13:4). Diosninchic ćhininmi laquinacuycäta (Malaquías 2:16). Umbrica mansibaculul juc walmiwan licuptin’a Jehová manam atajanchu laquinacunanta. Walmica libriñam quedan munal’a jucwan casaracunampa. Ashicuy Mateo 19:3-6, 9.

Diosninchic juc umbricta juc walmictam lulala cuscan casaracul’a yanapänaculcänampa (Génesis 2:18). Diosninchic umbrïtam encargala sumä umanu casaracul familianta mantininampa ñatac Diosninchicpi yaćhachinampa. Walminta cuyalmi umbrica walmintälami puntacta uycun’a imactapis munaśhanta. Casado caycaćhu’a cuyanacunanmi, respetänaculcänanmi. Pulanpis siempremä pantapäcun’a imallaćhupis, chayta lulal’a perdonanaculcänanmi ñatac tuquipmi cawsapäcun’a. Ashicuy Efesios 4:31, 32; 5:22-25, 33 ñatac 1 Pedro 3:7.

Casado caycäćhu’a llaquicuna captin’a pulanpipis callpanchaculcänanmi cuyanacuywan cawsapäcunampa (1 Corintios 13:4, 5). Bibliaćhu’a manamá casadocunäta laquinaculcay ninchu llaquicuyninta allichapäcunampa. Ashicuy 1 Corintios 7:10-13.

Jehová munayan wawi-chulicunapa cushilla cawsaculcanantam. Chaymi yaćhayächin Diospa nishanta wamla-walaśhcunäta allin tuqui cawsapäcunanpa. Chaymi taytanpa allin lulaśhanta licalmi yaćhapäcun’a allin umbri cayta allin walmi caytapis (Colosenses 3:20). Diosninchic munayantacmi cushi shun’ullanwan servïcunanta, paytapis chulin Jesustapis. Ashicuy Eclesiastés 11:9–12:1; Mateo 19:13-15 ñatac 21:15, 16.

Taytancuna’a trabajunwanmi chulincunacta micachin’a, mudachin’a, wasictapis lulacun’a (1 Timoteo 5:8). Manamá chayllactachu unan sinu’a Diosninchicpïpis yaćhachinanmi (Efesios 6:4). Taytancunapis alli Diosninchicta cuyacü captin’a chulincunapis taytannümi Diosta cuyacucamam capäcun’a. Bibliapita yaćhachiptin’a allin pensamientuyumi capäcun’atac chulincunapis wawincunapis. Ashicuy Deuteronomio 6:4-7 ñatac Proverbios 22:6.

Chuliquicunacta allinta lulaluptin’a cuyaycunayquim, alawaycunquim ñatac animaycunquim. Mana correjiptiqui’a ima juyu lulaycunactapis lulayan’am, chaymi siempre anyapaycunanchic ütac castigaycunanchic juyu lulaycunacta evitaculcänampa (Proverbios 22:15). Amatacmä chay castiguca nanaypa ü ishyanancamä canmantacchu. Ashicuy Colosenses 3:21.

Llapa Jehovapa testiguncuna lulayalcan achca libruncunactam taytacunäpa, chulicunäpa. Llü librucunacä Bibliapi lulaśham cayan. Ashicuy Salmo 19:7, 11.