YAĆHACHICUY 40
Limpium cananchic lluy imaćhupis
Juc mama cuyacü wawinta bañächin, limpio mudanawan ćhulachin escuelaman linanpä. Chaymi wawin sanulla can’a juccunactapis licachin’a maman taytan allicta cuyaśhanta. Taytanchic Jehovapis chaynümi cuyamanchic, pay munan cuerpunchic, cawsayninchic limpio cananta. Limpio captinchic Jehovapimi allinta limapäcun’a ñatac ya’anchicpäpis allinmi.
1. ¿Imacunactam lulananchic limpio cananchicpä?
Jehová nimanchic “chuya capäcuy” (1 Pedro 1:16). Chuya cananchicpä limpium cananchic cawsayninchicćhu, cuerpunchicćhu. Siemprem bañacunanchic, taśhacunanchic, wasinchicpis pichaśham canman, carrunchicpis limpium canman. Utunacunanchic wasićhupis yanapananchicmi pichayta. Limpio captinchicmi nunacunaca Jehovata alawapäcun’a (2 Corintios 6:3, 4).
2. ¿Imacunactam mana lulaśhunchu limpio cananchicpä?
Bibliaćhumi nimanchic: ‘Limpiacuśhun cuerpunchicta śhun’unchictapis anlachïcunapi’ (2 Corintios 7:1). Chaymi mana lulananchicchu juyu lulaycunacta mana dañamänanchicpä cuerpunchicta o mentinchicta. Jehovawan cuyachicuyta munal’a manam lulananchicchu nï piensananchicchu juyu lulaycunacta (Salmo 104:34). Ñatac anlacunacta manam limananchicchu (liguicuy Colosenses 3:8).
Jehová munan sano cananchictam. Chaymi nimanchic cigarructa mana fumanapä, cocacta mana ćhäćhanapä, mana shincanapä ñatac mana drogacunapä. Jehovata cäsuculmi, cuidacuśhun respetaśhun cawsayninchicta. Chaypi’a cawsayninchicćhu limpio cananchicpä manam masturbación nishanta lulanachu, nï pornografía nishanta licanachu. (Salmo 119:37; Efesios 5:5). Ayveces sasam canman caćhaycunayquipä, pero Jehovami yanapaśhunqui (liguicuy Isaías 41:13).
MASTA YAĆHAYCUŚHUN
Cayćhumi yaćhaśhun imapïmi cuerpunchic, wasinchicpis limpio canan ñatac juyu lulaycunata caćhaycunanchic.
3. Jehová munan limpio cananchictam
Unay tiempućhu Jehová mandala siervuncunacta limpio cananpämi. Cananpis jinallam Jehová munan limpio cananchicta. Liguiśhun Éxodo 19:10 ñatac 30:17-19, ñatac limaśhun caypi:
-
¿Imanuypam yaćhanchic Jehová munaśhanta siervuncuna limpio cananta?
-
¿Imacunactam lulananchic limpio cananchicpä?
Limpio cananchicpä tiempunchacuśhunmi, callpanchacuśhunmi. Masqui waccha calpis o rico calpis limpium caśhun. Licaśhun VIDEUCTA ñatac limaśhun caypi:
-
Diospi willacul limpiulla liptinchic, ¿respetanmanchućh nunacunaca Jehovata?
4. Caćhaycunanchicmi ima viciuctapis
Jehová yanapamachwanmi ima viciuctapis caćhaycunanchicpä.
Ichapis cocacta ćhäćhanqui, cigaructa fumanqui o tragucta upianqui, sasam canman caćhaycunayquipä. Pero piensapacuy dañucta lulaśhunayquita, yanapaśhunquim. Liguiśhun Mateo 22:37-39, ñatac limaśhun caypi:
-
¿Ima viciuyqui captinpis Jehovawan amistanïqui allinchućh canman?
-
¿Allinchun cawsanquiman viciuyqui captin familiayquicunawan o juccunawanpis?
Piensay imacunactam lulanquiman viciuyquita caćhaycunayquipä. a Licaśhun VIDEUCTA.
Liguiśhun Filipenses 4:13 ñatac limaśhun caypi:
-
Bibliata liguiptiqui, utunacuycunaman liptiqui ñatac oracuptiqui, ¿yanapaśhunquimanchun ima viciucunactapis caćhaycunayquipä?
5. Anla lulaycunata ñatac anla piensaycunata caćhaycuśhunmi
Liguiśhun Colosenses 3:5 ñatac limaśhun caypi:
-
Pornografiaca, masturbacionca ñatac anla-lulaycunacta mensajip apachinacüca, ¿imanuypam yaćhanchic Jehovapä caycuna anla caśhanta?
-
Jehová mandamäśhanchic cawsayninchicćhu limpio cananchicpä, ¿allinchun?
Jayćhumi yaćhanqui anla piensamientucunacta caćhaycunayquipä. Licaśhun VIDEUCTA.
Jesusmi yaćhachila imanuypa caćhaycunanchicpä anla-lulaycunata. Liguiśhun Mateo 5:29, 30 ñatac limaśhun caypi:
-
Jesús manam nilachu rasunpa ñawinchicta o maquinchicta julucunanchicpächu, aśhwanpa nila mana allin lulayninchicta caćhaycunapämi. Chayurá, ¿imacunam yanapamäśhun anlacunacta manaña piensanapä? b
Ña callpanchacuyaptiqui caćhaycunayquipä anla piensaśhayquicunacta, chay lulaśhayquipi Jehová allictam valoran. Liguiśhun Salmo 103:13, 14 ñatac limaśhun caypi:
-
Callpanchacuptiqui ima viciuctapis caćhaycunayquipä, ¿yanapaśhunquimanchun cay textuca?
Yapa viciuyquiman palpulul ¡Ama rendicuychu!
Juc viciucta caćhaycunayquipä callpanchacuyal yapa palpulul ninquimanmi: “Manañam caćhaycuyta atipamanchu”. Pero piensay cayman. Cürrita-llallinacul pilataculul manam ninmanchu manañam cürriśhachu, aśhwanpa śhalcüculmi jinalla cürrin’a. Chaynümi viciuman palpulul manam ninquimanchu: “Ya’a manañam atipamanchu caćhaycuyta”. Jehovapa yanapayninwan atipanquim ima viciuctapis caćhaycuyta.
WAQUINCUNA NIPÄCUN: “Unayñam cay viciuta lulä, ya’a manam atipamanchu caćhaycuyta”.
-
¿Ima textuctam Bibliapi liguinquiman chay nunata, Jehovapa yanapayninwan tantiaculul caćhaycunmanmi viciunta?
IMACTAM YAĆHALUNCHIC
Jehovata cushichiśhunmi cuerpunchic, mentinchic limpio captin ñatac lluy lulayninchic limpio captin.
Yalpaśhun
-
¿Imapïmi puydin limpio cananchic?
-
¿Imacunactam cada muyun lulananchic limpio cananpä wasinchic ñatac quiquinchicpis?
-
¿Imacunactam lulananchic anla-lulaycunacta mana piensananchicpä ñatac chaycunaman mana palpunanchicpä?
MASTA YAĆHANAYQUIPÄ
Mayćhu yaćhalpis, ¿imanuypam limpio cachwan? Licay videucta.
¿Imam yanapaśhunquiman cigarructa mana fumanayquipä? Chayta yaćhanayquipä liguiy.
¿Imapïmi mana licananchicchu pornografiacta? Chayta yaćhanayquipä liguiy.
“La pornografía: ¿inofensiva o perjudicial?” (La Atalaya, 1 de agosto de 2013)
¿Imactam lulala juc hombre manaña licananpä pornografiacta? Chayta yaćhanayquipä liguiy.
“Sufrí muchas recaídas hasta que lo logré” (La Atalaya, núm. 4 2016)
a “Masta yaćhanayquipä” nishanćhu, cay yaćhachicuycäćhu cayan viciucunacta caćhaycunayquipä “¿Cómo dejar de fumar?”.
b Masturbación viciuta caćhaycunapä, liguiy Lo que los jóvenes preguntan. Respuestas prácticas (volumen 1) nishan, libruta 25 capitulućhu “¿Podré vencer el hábito de la masturbación?” nishanta.
