Carita, huarmita apishca huashaga, chican tunu huiñashcamanda, chican yuyaita charishcamanda piñanacunguichimi. Imasaibiga cungaimanda cuintuguna shamucpi piñanacui tianga.

Yanga rimashcagunata mana uyashachu nishahuas, Bibliaga ninmi piñanacuita uctalla alichinata (Mateo 5:​23, 24). Biblia cunaigunata cadsushaga imatas sumaglla alichinguichimi.

BIBLIAGA NINMI: ‘Cuintanacungahua lugar tianmi’ (Eclesiastes 3:​1, 7). Llaquigunata charishaga cuintangui; ishcandi imasa sintirishcata cuintanacunguichi. Ama yanga llullaichu (Efesios 4:​25). Rabianaita rimacpihuas, ama cushniyacta rimaichu. Ali shimihuan rimashcaga piñanacusha catinata saquichin (Proverbios 15:4; 2 Timoteo 2:24).

Ishcandi yangami ningui ninacushahuas, llaquinacunata, balichinata ama saquichichu (Colosenses 4:​6). Piñanacushas uctalla aliyanacuichi, cuintanacunatas ama saquichichu (Efesios 4:​26).

CAITA RAI:

• Piñanacushaga cungailla aushcai cuintanacuichi

• Camba huarmi, camba cari rimaupiga uyailla. Huinda rimacpi cambas rimanata ushangui

BIBLIAGA NINMI: “Pariumanda llaquinacuichi, quiricpura pariumanda balichinacuichi” (Romanos 12:10). Camba huarmi, cari imata yuyasha rimashcata intindisha uyana ali anma. “Pariumanda llaquinacusha causaichi, shuccunata yanapanata yuyarisha causaichi” (1 Pedro 3:8; Santiago 1:19). Ama uyauc shina raichu. Imata raushahuas camba cari, huarmi ima nishcata uyangahua lugarta surcui, manashaga unanicpi cuintanacungahua chapai ni. Camba carita, huarmita cuntarta shina ricuna randiga, camba amigota shina ricui, chimi imata nicpihuas mana ucta piñaringa (Eclesiastes 7:9).

CAITA RAI:

• Can mana munashcata rimacpihuas uyana mangui

• Imaraicu chasna nishcata intindisha uyai. Imasa ñahuihuan rimashcata musiari

BIBLIAGA NINMI: “Mana sambayasha aligunata rasha catishaga pallana punzhacuinta pactashcai aligunata japingaraunchi” (Gálatas 6:9). Ishcandi imata rasha nishaga pactachina manguichi. Pactachishaga cushi causanguichi (2 Tesalonicenses 3:13). Pariulla imatas racpiga Yaya Diosmi bindisianga (Eclesiastes 4:9).

CAITA RAI:

• Imatas alichingahua ñaupa punda imasa rasha nisha yuyari

• Caran uras imaibi cambiashcata ricuichi