Mèm si zot i fé tout zot posib pou èt ereu dan zot maryaj é an fami, in maleur i pe arivé. Dan sé moman la, i pe èt difisil pou zot pou gard zot joi (Éklézias 9:11). Kan nou rankont bann situasion difisil, Bondieu i soutien a nou avèk amour. Si zot i mèt an pratik bann prinsip biblik an d’sou la, zot fami é zot mèm i poura surmont bann situasion le plu dur.

SÈK LA BIB I ANSÈGN : « Rejèt tout zot traka su li, parske li sousi a li in bonpe pou zot » (1 Pièr 5:7). Oubli jamé ke Bondieu i anvoiy pa bann zépreuv (Jak 1:13). Si ou fé out posib pou aproch a ou koté Bondieu, li va èd a ou le mieu posib (Izai 41:10). « Dévid out keur devan li » (Psom 62:8).

Ou va gingn osi la konsolasion kan ou va lir é étudié la Bib tou lé jour. Ou va rann a ou kont ke Jéova « i konsol a zot dan tout zot bann zépreuv » (2 Korintien 1:3, 4 ; Romin 15:4). Bondieu i promèt donn a ou la « pé » ki vien de li, « ki dépas tout pansé » (Filipien 4:6, 7, 13).

KOSA OU PE FÈR :

• Pri Jéova pou ke li apèz out keur é ke li èd a ou avoir léspri plu klèr.

• Pran le tan pou réfléchi su bann posibilité ke i prézant devan ou, aprésa choizi sak lé méyeur pou ou.

SÈK LA BIB I ANSÈGN : « Le keur de lom intélijan i gingn la konésans, é zorèy bann saj i rod la konésans » (Provèrb 18:15). Ésèy konèt égzakteman kosa chak pèrson dan la fami i resan é kosa li la bezoin. Koz avèk zot. Ékout a zot (Provèrb 20:5).

É si in moun ke ou ièm lé mor ? I fo pa ke ou la peur di sak ou resan. Rapèl a ou ke mèm Jézu « la pleuré » (Jan 11:35 ; Éklézias 3:4). Lé inportan bien repozé é bien dormir (Éklézias 4:6). Tousa i èd pou tenir debout dann in situasion ke lé dur.

KOSA OU PE FÈR :

• Atann pa ke néna in maleur i ariv pou prann labitud koz avèk chak pèrsonn dann out fami. Si bann problèm i ariv, zot va santi a zot a lèz pou koz avèk ou.

• Koz avèk domoun ke la viv le mèm situasion ke ou.

SÈK LA BIB I ANSÈGN : « In vré kamarad i ièm toultan é sé in frèr ke lé né pou lé jour difisil » (Provèrb 17:17). Out bann zami i ve èd a ou, mé petèt zot i koné pa kosa i fo fèr. Ézit pa ésplik a zot sak ou la vréman bezoin (Provèrb 12:25). Chèrch osi lèd éspirituèl avèk bann pèrsonn ki konpran la Bib. Zot bann konsèy bazé su la Bib va èd a ou (Jak 5:14).

Ou va gingn le soutien ke ou la bezoin kan ou frékant toultan bann domoun ke néna vréman la foi an Bondieu é ki kroi son bann promès. Ou va trouv osi bokou de rékonfor kan ou va ankouraj dot pèrsonn ke la bezoin. Fé konèt banna la foi ke ou néna pou Jéova é pou son bann promès. Rès okupé pou èd lé zot, é rès proch bann pèrsonn ki èm a ou, é ki sousi a zot pou ou (Provèrb 18:1 ; 1 Korintien 15:58).

KOSA OU PE FÈR :

• Rouv out keur avèk in ami ke lé proch de ou é lès a li èd a ou.

• Di a li égzakteman é franchman sèk ou la bezoin.