Kansa le roiyom Bondieu va komans dirij la tèr ?
Detroi fidèl disip Jézu té i ve konèt kansa té sar mèt an plas le roiyom Bondieu. Jézu la réponn azot ke zot té sar pa konèt le moman prési kansa le roiyom noré dirij la tèr (Akt 1:6, 7). Mé avan sa, li lavé di ke son bann disip noré vu in lansanm bann zévènman bien prési ke va réalizé an mèm tan, alor par sa, zot noré konèt « ke le roiyom Bondieu i tard pa », é ke lépok ousa le Roiyom i doi dirij le monn lé arivé (Luk 21:31).
KÈL ZÉVÈNMAN JÉZU LA ANONSÉ ?
Jézu la di : « Nasion va konbat kont nasion é roiyom kont roiyom. Nora bann gran tranbleman d’tèr é, dan in androi apré lot, nora bann faminn é bann zépidémi » (Luk 21:10, 11). Kom bann ti tré su le doi i form bann zanprint dijital, tout se bann zévènman ansanm i fé parti in sign ke nou pe pa mèt an dout. Kom in lanprint dijital i pèrmèt rekonèt in moun, lé parèy, le sign ke Jézu la doné va pèrmèt anou konprann ke « le roiyom Bondieu i tard pa ». Èske nou voi bann zévènman komsa antrèn réalizé an mèm tan partou dan le monn ? Alon voir detroi preuv.
1. BANN GÈR
Dann lané 1914 in gèr la pété, é lété le premié foi ousa in bonpe péi té pri dedan é la fé in bonpe déga. Bann domoun ke i étudi Listoir, i di souvan ke lané 1914 la pran in nouvo tournan dan Listoir, parske sé se lané la ke pou premié foi in gèr mondial la pété. Dann la gèr la, la utiliz mitrayèt, la larg bann bonm depui bann zavion, la ansèrv bann gaz ki anpoizonn, bann tank pou fé la gèr... Juskalèr, jamé lavé ansèrvi bann zarm an grann kantité pou tué domoun komsala. Aprésa, le deuzièm gèr mondial la pété é se kousi la utiliz in nouvo moiyin pou tué domoun, sé bann zarm atomik. É depui 1914, néna ankor bann gèr par si ou par la dan le monn. Bann gèr la, la tué domoun par milion.
2. BANN TRANBLEMAN D’TÈR
Dapré lansiklopédi Britannica Academic, chak lané, i anrejis in santèn tranbleman d’tèr ke lé asé for pou fé bann « gro déga ». L’Institut d’études géologiques des États-Unis i di ke « dapré bann zinformasion anrejistré su in bon pèryod (apepré depui 1900), nou doi atann anou ke néna apepré 16 gro tranbleman d’tèr chak lané ». Domoun néna tandans kroir ke néna plus tranbleman d’tèr zordi, mé dapré désèrtin sé surtou parske néna bann moiyin téknik pou détèk azot mieu. Kan mèm sa, bann gro tranbleman d’tèr i amèn la soufrans é la mor ankor plus ke avan.
3. DOMOUN I SOUF LA FIN
Si domoun na poin asé manjé dan in bonpe zandroi su la tèr, sé parske néna bann gèr, bann domoun malonèt, bann situasion ékonomik difisil, bann mové fason okup bann tèr agrikol ou ke domoun lé pa asé préparé devan bann gro problèm klima. Dapré le rapor le Programme alimentaire mondial 2018, « dan le monn, néna 821 milion domoun i manj pa zot vant plin, anparmi zot néna 124 milion ke i souf la fin ». Néna 3,1 milion marmay i mor chak lané parske zot na poin manjé kom ki fo. Dann lané 2011, 45 % bann marmay dan le monn lé mor parske zot té souf la fin.
4. BANN MALADI É BANN ZÉPIDÉMI
L’Organisation mondiale de la santé la di : « Lépok 21èm sièk la finn èt touché par bann gro zépidémi ke la ravaj partou. Nou voi ke bann zansien maladi dann tan lontan i arvien (koléra, la pès é fièv jonn) é néna bann nouvo maladi i aparèt (SRAS, bann grip i répann partou, MERS, Ébola é Zika). » Le dèrnié nou la konu lé lé pandémi Kovid-19. Mèm si la sians é bann dokteur la dékouv in bonpe zafèr zot i gingn pa trouv bann trètman pou soign tout bann maladi.
5. LA PRÉDIKASION LÉ FÉ DAN LE MONN ANTIÉ
Jézu la koz su in not zafèr ki fé parti le sign li la prédi : « Bonn nouvèl Roiyom la i sra préché su tout la tèr abité kom in témoiniaj pou tout bann nasion; é aprésa, la fin va arivé » (Matieu 24:14). Alor ke néna bann gro maleur lé antrèn fé souf domoun partou, néna plus 8 milion d’moun tout nasion lapou anons le gayar nouvèl le roiyom Bondieu an plus 1 000 lang dann 240 péi é téritoir. Sa lé in nafèr inkroiyab ke nou la jamé vu !
KOSA NOU KONPRAN PAR LA ?
Tout bann zafèr ki fé parti le sign ke Jézu la fé konèt anou, lé antrèn réalizé nout lépok. Poukosa nou doi rod mieu konprann sak Jézu la di ? Parske Jézu la di : « Kan zot va voir bann zafèr la arivé, i fo zot i koné ke le roiyom Bondieu i tard pa » (Luk 21:31).
Dann pa lontan, la volonté Bondieu, sra fé su la tèr gras le Roiyom.
Gras le sign ke Jézu la doné é bann dat ke néna dan la Bib, nou gingn konprann ke Bondieu la mèt son roiyom an plas dann sièl lané 1914 a. Sé se lané la, ke Bondieu la mèt an plas son Garson Jézu Kris kom roi (Psom 2:2, 4, 6-9). I tard pa, le roiyom Bondieu va dirij le monn, li va détrui tout bann gouvèrnman ke i drès kont li é li va fé in paradi su la tèr ousa bann domoun va viv pou toultan.
I tard pa, la priyèr modèl ke Jézu la ansénié i sar réalizé : « Ke out roiyom i vien. Ke out volonté i réaliz su la tèr, kom dann sièl » (Matieu 6:10). Mé depui ke la mèt an plas le Roiyom dan lané 1914, kosa li la finn fé ? Kèl gayar lavnir nou va konèt le jour ousa le roiyom va dirij tout domoun su la tèr ?
a Pou konèt plus su lané 1914, gard le leson 32 dann liv Viv ereu pou toultan ! fé par bann Témoin Jéova, ti not no 22.
Agard sa osi…
TOUR DE GARD
Kansa la fin va arivé ? Sak Jézu la di
Èske zot i voi réalizé bann zévènman ke Jézu la profétizé ?
BANN KÉSTION LA BIB I RÉPONN
Kosa i lé lo sign k’i amont ké nou viv bann « dèrnié jour », ou « lépok la fin » ?
Nou pé konèt kosa i lé bann dèrnié jour gras sak la Bib i di.
