Dapré lo buro fédéral amérikin pou kontrol é prévien bann maladi, plis la moitié bann domoun èk kisa banna la poz kèstion ant 15 é 19 an, la di ké zot la fine utiliz la bouch pou bann rolasion sèksuèl (félasion é kunilingus). Sharlene Azam, sak la ékri lo liv Les relations buccogénitales : la nouvelle façon de se dire bonne nuit (angl.), i èsplik : « Si zot i koz èk bann jèn dési bann rolasion sèksuèl èk la bouch, banna va di azot ké sa lé pa grav dutou. An vré, pou zot, sa lé pa vréman in rolasion sèksuèl. »

•  Kosa ou pans ladsi ?

•  Kosa lé vré ladsi ?

•  Poukosa sa lé inportan

 Répond bann kèstion la par oui oubien par non :

1.   Èské in fi i pé tonb ansint akoz in félasion ?

   1.   Oui

   2.   Non

2.   Èské nou pé trap in maladi kan nou utiliz la bouch pou bann rolasion sèksuèl ?

   1.   Oui

   2.   Non

3.   Èské utiliz la bouch pou lo sèks, i fé parti vréman bann rolasion sèksuèl ?

   1.   Oui

   2.   Non

 Konpar out bann répons èk sak i vien apré :

1.   Èské in fi i pé tonb ansint akoz in félasion ?

    Répons : Non. É sé pousa mèm k’in bonpé domoun i pans ké bann rolasion sèksuèl èk la bouch lé san danjé.

2.   Èské nou pé trap in maladi kan nou utiliz la bouch pou bann rolasion sèksuèl ?

    Répons : Oui. In moun k’i utiliz son bouch pou bann rolasion sèksuèl i pé gingn bann bouton su zot sèks, zot i pé trap in lépatit (A ou B), in blénoraji, in lèrpès, la sifilis oubiensa lo sida.

3.   Èské utiliz la bouch pou lo sèks, i fé parti vréman bann rolasion sèksuèl ?

    Répons : Oui. Tout kalité zaksion ousa i touch lo sèks in moun — kom bann rapor sèksuèl, bann rapor èk la bouch, la sodomi (sèks par dèrièr) é masturb in not moun — tousa i fé parti bann rolasion sèksuèl.

 Ala plizièr vèrsé la Bib k’i koz dési bann rolasion sèksuèl èk la bouch :

 Sak la Bib i di : « Parské ala sak Bondié i vé : [...] ké zot i évit tout kalité péché sèksuèl » (1 Tésolanisien 4:3).

 Kan la Bib i koz dési bann « péché sèksuèl » sa i vé dir tout kalité rolasion sèksuèl ant dé moun ké lé pa marié. Anndan la néna bann rapor sèksuèl, bann rapor èk la bouch, la sodomi (sèks par dèrièr) é masturb in not moun. In moun k’i pratik bann péché sèksuèl, sa va fé tonb ali dan bann zafèr ké lé grav ; lo pir sé ké sa i gat son lamitié ansanm Bondié (1 Pièr 3:12).

 Sak la Bib i di : « Sak i fé bann péché sèksuèl i pèch kont son prop kor » (1 Korintien 6:18).

 Bann rolasion sèksuèl èk la bouch i pé aoir in mové léfé su lo kor in moun, son spiritualité, é dan son tèt. Lo liv Comment parler de sexualité avec vos enfants (angl.) i di : « Kan ou rogrèt, kan ou san aou fèb oubien kan ou san ké la abuz dési ou, sa sé pa bann santiman ké ou rosan sèlman apré in rapor sèksuèl. Tout bann zémosion k’i fé mal, ké nou pé rosanti apré in rapor sèksuèl ké nou la mal viv, i pé èt rosanti apré ninport kèl kalité rolasion sèksuèl ké nou la mal viv. In rolasion sèksuèl sé in rolasion sèksuèl. »

 Sak la Bib i di : « Moin, Jéova, mi lé out Bondié, sak i amont aou tout zafèr pou out bien » (Izai 48:17).

 Èské ou kroi ké bann loi Bondié dési bann rolasion sèksuèl lé vréman pou out bien ? Oubien èské ou kroi k’i anbar out libèrté ? Pou èd aou répond bann kèstion la, majine in rout ousa néna in ta sirkulasion èk in ta pano tout lo lon : sak i limit la vitès, pano stop é dot ankor. Èské ou pans ké so bann pano la i anpèch aou èt lib oubien zot i protèj aou ? Kosa va arivé si aou oubien dot konduktèr, i fé pa in kont èk bann pano la ?

 Nou pé réfléchi parèy èk bann prinsip Bondié. Si ou fé pa in kont avèk, ou va ramas sak ou mérit (Galat 6:7). Lo liv La sexualité intelligente (angl.) i di : « Plis ou lès dési koté out kroiyans èk out bann prinsip, pou fé bann zafèr k’i fé santi aou mal, moin ou nora rèspé pou ou. » Parkont, si ou rèspèk bann prinsip Bondié, ou va fé mont ké ou gingn défand out foi. É pli inportan ankor, out konsians va rès pur (1 Pièr 3:16).