Èske Bondieu lé partou é dan tout zafèr ?
Sak la Bib i di
Bondieu i pe voir tout zafèr é i aji partou ousa li ve (Provèrb 15:3 ; Ébreu 4:13). Mé la Bib i ansègn pa ke Bondieu lé partou é dan tout zafèr. Olèrk sa li ésplik ke Bondieu lé vréman kèlkin é ke li abit dann in landroi éspésial.
Ala koman Bondieu i lé : Bondieu lé in léspri (Jan 4:24). Bann zumin i gingn pa voir ali (Jan 1:18). Dan la Bib, kan i voi Bondieu dann bann vizion, toultan i mont ali dan in landroi éspésial é pa kom kèlkin ke lé partou (Izai 6:1, 2 ; Révélasion 4:2, 3, 8).
Landroi ousa Bondieu i abit : Bondieu i rès dan le monn invizib ke lé pa parèy le monn vizib. Dann monn invizib la, Bondieu néna in « landroi ousa [li] abit dann sièl » (1 Roi 8:30). La Bib i rakont ke dann in lokazion, bann zanj « la rant pou plas azot devan Jéova a », dann in sans, sa i amont ke Bondieu i rès dann in landroi éspésial (Job 1:6).
Si Bondieu lé pa partou é dan tout zafèr, èske li pe fé in kont èk moin ?
Oui. Bondieu i inkièt ali vréman pou chak moun. Mèm si li abit dann in monn invizib, Bondieu i voi sak i ve vréman fé plézir ali su la tèr é li èd azot (1 Roi 8:39 ; 2 Kronik 16:9). Alon gard ansanm koman Jéova i amont ke li fé in kont èk bann domoun sinsèr ki ador ali :
Kan zot i pri : Kan zot i di zot priyèr, tout suit mèm, Jéova i antan sak zot i di (2 Kronik 18:31).
Kan zot moral lé atèr : « Jéova lé a koté sak néna le keur déchiré ; li sov sak lé abatu » (Psom 34:18).
Kan zot la bezoin in gid : Jéova « va èd aou bien konprann lé choz é [li] va ansègn aou » gras son Parol la Bib (Psom 32:8).
Sak désèrtin i pans kan i di ke Bondieu lé partou é dan tout zafèr
Sak domoun i pans : Bondieu lé dan tout sak li la kré.
An vré : Bondieu i abit pa su la tèr, é li abit pa non plu dan lunivèr ke li la kré (1 Roi 8:27). Lé vré ke bann zétoil é dot zafèr ke li la kré « i kri bien for la gloir Bondieu » (Psom 19:1). Mé, lé pa parske in moun la pinn in tablo ke li abit dedan, parèy Bondieu i abit pa non plu dan sak li la kré. In tablo i pe kan mèm di anou désèrtin zafèr su le moun ke la pinn ali. Parèy mèm, le monn vizib i amont le bann « kalité invizib » le Kréateur, kom son puisans, son sajès èk son lamour (Romin 1:20).
Sak domoun i pans : I fo ke Bondieu lé partou é dan tout zafèr pou ke li koné tout zafèr é pou èt toupuisan.
An vré : Léspri sin Bondieu, ou bien son fors ki aji, lé la puisans Bondieu ke li ansèrv pou fé in bonpe zafèr. Avèk son léspri sin, Bondieu i pe voir é fé tout zafèr, partou é toultan, mèm si li lé pa la an vré (Psom 139:7).
Sak domoun i pans : Bann parol ke néna dann Psom 139:8 i amont in fason klèr ke Bondieu lé partou é dan tout zafèr. Nou lir anndanla : « Si mi té mont dann sièl, ou sré la, é si mi té fé mon li dan la tonm, agard, ou sré la mèm. »
An vré : Pasaj la i koz pa su landroi ousa Bondieu i abit. Li ésplik kom dann in poèm, ke Bondieu i gingn fé kékchoz pou nou ninport kèl landroi ousa nou lé, mèm si nou lé loin.
a Jéova lé le non Bondieu ke nou trouv dann la Bib.
Agard sa osi…
BANN KÉSTION LA BIB I RÉPONN
Èske Bondieu i abit dann in landroi éspésial ?
Ousa Bondieu i lé ? Èske Jézu li viv le mèm landroi ? Kosa la Bib i di ?
BANN KÉSTION LA BIB I RÉPONN
Kosa i lé léspri sin ?
Pou in bon rézon la Bib reprézant léspri sin kom le bann « min » Bondieu.
