Dan la Bib i trouv pa le mo etanazi a. Mé sak la Bib i di su la vi é la mor lé rézonab. Nou doi pa tué in moun, mé lé pa oblijé gard ali an vi atoupri alor ke li lé antrèn mor.

 La Bib i ésplik ke « le komansman la vi », i vien de nout Bondieu ke lé nout Kréateur (Psom 36:9 ; Akt 17:28). Pou li, la vi na in bonpe la valeur. Sé pousa, ki soi tué anou nou mèm oubien tué in not moun, Bondieu lé pa dakor èk sa (Égzod 20:13 ; 1 Jan 3:15). An plus ke sa, la Bib i amont ke nou doi pran bann prékosion rézonab pou protèj nout vi é sak lé zot (Detéronom 22:8). Lé sur, Bondieu i ve ke bann domoun i akord in gran valeur la vi ke li la donn azot.

É si in moun malad lé pa loin pou mor ?

 Dapré la Bib i doi pa mèt fin la vi in moun, mèm si li lé pa loin pou mor é ke i gingn pa anpèch sa. Nou konpran bien se lidé la avèk sak la ariv Saul, in roi le peup Israèl. Pandan in batay, alor ke li lété blésé a tèl poin ke li té sar mor, li la demann son sèrviteur èd ali pou mor plu vitman (1 Samuèl 31:3, 4). Le sèrviteur té ve pa fé sa. Mé in pe d’tan apré, in not bonom, la fé kroir ke li lavé fé sak Saul lavé demandé. David la di ke bonom la, lété koupab la mor Saul. Par la, David té mont bien ke li lavé le mèm pansé ke Bondieu su késtion la (2 Samuèl 1:6-16).

Èske nou doi gard atoupri in moun an vi alor ke li sar mor ?

 Kan in moun lé pré pou mor la Bib i oblij pa gard ali an vi atoupri. Le fason d’pansé ke nou trouv dan la Bib lé rézonab. Kom nou lé pécheur, la mor lé nout plu gran lénmi (Romin 5:12 ; 1 Korintien 15:26). Nou ve pa mor mé la mor i fé pa peur anou, parske Bondieu i promèt redonn la vi bann mor (Jan 6:39, 40). In moun ke na réspé pou la vi, i rod bann méyeur fason pour pran soin son santé. Mé sa i ve pa di ke in moun, lé oblijé choizi bann moyin ke va seulman gard ali an vi plu lontan, alor ke li lé pré pou mor.

Kan in moun i tu ali, èske sa lé in péché ke na poin pardon ?

 Non, la Bib i di pa ke kan in moun i tu ali, sa sé in péché ke na poin pardon. Lé vré ke kan in moun i mèt fin son vi sa lé in péché grav b, mé Bondieu i konpran tout le bann rézon ke i pe pous in moun avoir bann zanvi pou suisid ali. Par égzanp i pe èt in maladi mantal, in gro strès é osi in problèm santé ke néna dan la fami é ke li la ganié (Psom 103:13, 14). Gras la Bib, Bondieu i aport in soulajman pou sak lé an soufrans. An plus ke sa, la Bib i di : « Nora in rézuréksion otan pou bann moun jus ke pou bann moun injus » (Akt 24:15). Sa i mont anou ke sak la fé bann zéreur ke lété grav, par égzanp léreur suisid azot, banna na léspoir arni a la vi.