Dan la Bib, lo mo « rézurèksion » i sort dan anastasis, in mo dan la lang Grèk k’i vé dir « lévé, dobout ». In moun ké la résusité la sort dan la mor é la rovni vivan ; li rès lo mèm moun k’avan son mor (1 Korintien 15:12, 13).

 Dan bann tèks ébré k’i apèl osi Lansien Tèstaman, lo mo « rézurèksion », i égzis pa. Mé, mèm si na poin lo mo, i koz ladsi kan mèm. Par égzanp, Bondié la ansèrv Ozé pou fé promès la : « Mi va tir azot dan la tonb, mi va sov azot dan la mor » (Ozé 13:14 ; Job 14:13-15 ; Izai 26:19 ; Danièl 12:2, 13).

 Ousa domoun sra résusité ? Désèrtin sra résusité dann sièl pou dirij la tèr ansanm lo Kris (2 Korintien 5:1 ; Révélasion 5:9, 10). Sa mèm la Bib i apèl « promié rézurèksion » oubien « rézurèksion [...] ké va ariv pli bonèr ». Nou konpran par la, ké néna in not rézurèksion dèrièr i ariv (Révélasion 20:6 ; Filipien 3:11). Sadla va èspas su la tèr, ousa la plipar bann résusité va viv (Psom 37:29).

 Koman la rézurèksion va èspasé ? Bondié la done Jézu lo pouvoir résusit bann mor (Jan 11:25). Jézu va fé roviv « tout sak lé dan bann tonb » (Jan 5:28, 29). Chakèn va résusité èk son lidantité, son tanpéraman é son bann souvnir. Sak lé résusité dann sièl i gingn in kor kom bann zanj. Sak i sra résusité su la tèr va gingn in kor kom domoun, an bone santé é parfé (Izai 33:24 ; 35:5, 6 ; 1 Korintien 15:42-44, 50).

 Kisa i sra résusité ? La Bib i di ké « nora in rézurèksion kisoi pou domoun lé jus oubien pou sak lé pa jus » (Akt 24:15). Bann jus sé bann bonom é madam fidèl Bondié, kom Noé, Sara oubien Abraam (Jénèz 6:9 ; Ébré 11:11 ; Jak 2:21). Sak lé pa jus sé bann domoun la pa rèspèk bann prinsip Bondié parské té pa posib pou zot konèt.

 Parkont lé vré, néna désèrtin lé si tan tèlman malfondé ké i gingn pu fé rien pou zot. Kan zot va mor i sra pou toultan ; na pu okin lèspoir pou zot roviv (Matié 23:33 ; Ébré 10:26, 27).

 Kansa la rézurèksion va arivé ? Dapré la Bib la rézurèksion dann sièl va èspas dann tan k’i apèl la prézans lo Kris, ké la komans an 1914 (1 Korintien 15:21-23). La rézurèksion su la tèr va èspasé dan lé 1000 zané ousa Jézu Kris sra Roi, an mèm tan ké va transform la tèr an paradi (Luk 23:43 ; Révélasion 20:6, 12, 13).

 Akoz nou pé kroir la rézurèksion ? Dan la Bib i rakont koman nèf moun la résusité, é tousa, navé d’témoin pou konfirmé (1 Roi 17:17-24 ; 2 Roi 4:32-37 ; 13:20, 21 ; Luk 7:11-17 ; 8:40-56 ; Jan 11:38-44 ; Akt 9:36-42 ; 20:7-12 ; 1 Korintien 15:3-6). Kan Lazar la résusité sa té vréman romarkab, parsk’i té fé kat jour li té mor kan Jézu la résusit ali dovan in foul domoun (Jan 11:39, 42). Mèm bann zènmi Jézu té gingn pa di lo kontrèr. Sé pou sa zot la konplot pou tué Jézu èk Lazar (Jan 11:47, 53 ; 12:9-11).

 La Bib i amont ké Bondié lé kapab fé roviv domoun é li la anvi fé sa. Kom li lé Toupuisan é k’son mémoir lé san fon, li gingn rapèl tout bann détay chak moun li sa résusité (Job 37:23 ; Matié 10:30 ; Luk 20:37, 38). Bondié lé kapab résusit bann mor é li vé vréman fé sa ! Kan i koz su la rézurèksion la Bib i di k’li ‘sra vréman présé rovoir sak [li] la kréé’ (Job 14:15).

Sak désèrtin i pans su la rézurèksion

 Sak domoun i pans : La rézurèksion sé romèt ansanm lam èk lo kor.

 An vré : La Bib i amont ké lam sé lo moun an antié, é pa in parti lo moun k’i rès vivan kan li mor (Jénèz 2:7, ti not ; Ézékièl 18:4). In moun k’i résusit i rotrouv pa son lam. Kom i rofé ali, li arvien in lam vivan.

  Sak domoun i pans : Désèrtin lé résusité pou armor tout suit.

  An vré : La Bib i di ké « sak la fé bann mové zafèr » va roviv « pou in rézurèksion pou lo jujman » (Jan 5:29). Parkont, jujman la, va baz ali su sak li va fé apré son rézurèksion, é pa su sak li la fé avan mor. Jézu té sur kan li la di : « bann mor va antand la voi lo Garson Bondié, é sak la ékouté va viv » (Jan 5:25). Apré zot rézurèksion Bondié va ékri lo non sak va « ékouté » é obéi dann « roulo la vi » (Révélasion 20:12, 13).

  Sak domoun i pans : In moun k’i résusit i rotrouv lo mèm kor li lavé avan mor.

  An vré : Kan in moun i mor son kor i pouri (Éklézias 3:19, 20).