Mèm si la Bib i di pa gran choz ladsu, li di pa ke lé mal mèt makiyaj, port bijou, ou mèt dot zafèr su nou pou fé joli. An vré la Bib i fémont ke sak lé le plu zinportan sé pa nout laparans, mé sé in « léspri dou é ki rod la pé », é sé sa ke va rann anou « joli pou toultan » (1 Pièr 3:3, 4).

•   La Bib i koz su bann madam ke lavé foi an Bondieu é ke té fé azot joli. Rébéka, le madam Izaak, lavé in zano an or dann né, li té port bann braslé an or èk dot bijou ke lété chèr. Tousala té bann kado ke son bopèr Abraam lavé donn ali avan li maryé (Jenèz 24:22, 30, 53). Lé parèy, Éstèr li, li la aksèp ke té fé ali bann soin ke té rann plu joli, é sa té rienk pou bann madam ke té choizi pou èt rèn su tout le Roiyom Pèrs (Éstèr 2:7, 9, 12). Lé posib ke dann se bann soin la té utiliz « bann zafèr té i san bon é ke té i pran soin la po » oubien « pluzieur kalité makiyaj » (New International Version ; Easy-to-Read Version).

•   Bann zégzanp dan la Bib ousa i parl an bien bann bijou. Par égzanp, li konpar in moun ki donn bann bon konsèy a « in zano an or » « pou le zorèy ki ékout ali » (Provèrb 25:12). Lé parèy, Bondieu li mèm la konpar son konportman ansanm le nasion Israèl èk le fason in mari i konport ali èk son madam, kan li mèt bann braslé, bann kolié èk bann zano an or su èl. Avèk tout se lansanm la, le nasion lété « devnu vréman tré joli » (Ézékièl 16:11-13).

 Sak domoun i pans : Le mové rèn Jézabèl té « fard son zieu ». Sa i mont ke lé pa bon in moun i makiy ali (2 Roi 9:30).

 An vré : Sé pa akoz son makiyaj ke Jézabèl lété koupab, mé parske li té fé bann mové zafèr, li té i joué èk le sor é li té tué domoun (2 Roi 9:7, 22, 36, 37).