Tout sak domoun la fé pou ésèy mèt la pé dan lo monn la pa marché, é jamé zot va gingn fé sa. Akoz sa ? Néna bonpé rézon :

•   « Lom k’i march, lé pa li i doi dirij son bann pa » (Jérémi 10:23). Bondié la pa fé bann zom èk lo kapasité ni lo droi dirij azot zot mèm. Donk zot va jamé gingn mèt la pé pou toultan.

•   « Fé pa konfians bann chèf monn-la. Sé rienk bann zom, banna lé pa kapab sov pèrsone. Kan zot i mor, zot i rotourn dan la tèr, é jour-la, zot lintansion i mor èk zot » (Psom 146:3, 4, Parole de Vie). Bann chèf gouvèrnman, mèm sak néna bann méyèr zintansion, i gingnra pa règ pou d’bon bann problèm la gèr.

•   « Dan bann dèrnié jour, nora bann pèryod difisil pou suporté. Parské bann domoun sra[...] kruèl, va pa èm fé lo bien, va aji an trèt, nora la tèt dur, nora in ta lorgèy » (2 Timoté 3:1-4). Nou viv bann « dèrnié jour » lo monn mové koméla, in lépok ousa lo fason pansé domoun i èd pa viv an pé.

•   « Malèr pou la tèr é la mèr, parské lo Diab la désand koté zot èk in gran kolèr, parské li koné i rès ali inn ti pé d’tan » (Révélasion 12:12). La jèt lo Diab, lènmi Bondié, koté la tèr é li gingn pa sort tèr-la. Dépi s’tan-la, li pous domoun aoir in mantalité ranpli èk la èn, kom li. Tank li sra lo « chèf lo monn », sra pa posib mèt la pé (Jan 12:31).

•   « [Lo roiyom Bondié] va kraz tout bann roiyom-la [ké lé kont Bondié] é li va dégrèn azot, é li tousèl va rès pou toultan » (Danièl 2:44). Sé rienk lo roiyom Bondié ké va kontant nout lanvi d’viv dan in monn an pé, é pa bann gouvèrnman koméla (Psom 145:16).