Lo Kolèj santral lé in ti group krétien mur k’i gid bann Témoin Jéova su tout la tèr. Ala sak lo Kolèj santral i fé :

•   Zot i prépar lo manjé spirituèl ké néna dan bann liv, bann rénion é bann lékol Témoin Jéova (Luk 12:42).

•   Zot i okip la prédikasion su tout la tèr é osi koman bann zofrann lé utilizé.

 Dann tan promié sièk, lavé in ti group « bann zapot èk bann zansien » dann Jéruzalèm ké té i pran bann désizion inportan pou tout bann krétien (Akt 15:2). Lo Kolèj santral i suiv lo mèm légzanp. Kom bann bonom fidèl dann tan avan, sak i fé parti lo Kolèj santral lé pa bann chèf nout lorganizasion. Zot i lès la Bib gid azot, é zot lé dakor pou di ké Jéova la mèt an plas Jézu Kris kom lo chèf pou lasanblé (1 Korintien 11:3; Éfézien 5:23).

 An parmi lo Kolèj santral néna Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, é David Splane, and Jeffrey Winder. Banna i travay dur dann buro mondial la ba Ouarwik (léta Nou York).

 Lo Kolèj santral la mèt an plas sis komité pou jèr diféran laktivité bann Témoin Jéova. Chak frèr lo Kolèj santral i fé parti inn ou plizièr komité la.

•   Komité bann kordinatèr : Li okip bann zafèr la justis é li èd bann Témoin Jéova lé dan bann situasion grav kom bann katastrof naturèl ou bann pèrsékusion akoz zot kroiyans é pou dot zafèr ankor.

•   Komité pou lo pèrsonèl : Li okip bann désizion i konsèrn bann volontèr i travay dur dan bann buro nasional.

•   Komité pou lédision : Li okip lo fabrikasion é li anvoy lo bann publikasion biblik, li fé konstrui osi bann landroi pou ladorasion, bann buro la traduksion é bann buro nasional.

•   Komité pou lo sèrvis : Li organiz la prédikasion « lo gayar nouvèl lo roiyom » (Matié 24:14).

•   Komité pou lamontraj : Li lé rèsponsab prépar lo bann manjé spirituèl ké néna dan bann rénion, dan bann lékol é dan bann program odio é vidéo.

•   Komité pou rédaksion : Li prépar lamontraj, ké nou pé trouv dan in vèrsion ékri oubien su lo sit intèrnèt ofisièl bann Témoin Jéova. Li okip osi lo travay pou la traduksion.

 An plis travay dur dan bann komité la, lo Kolèj santral néna in rénion chak somèn pou koz dési bann bézoin ké bann Témoin Jéova néna su tout la tèr. Dan bann rénion la, bann frèr lo Kolèj santral i gard sak la Bib i di é zot i lès lèspri sin gid azot pou ésèy tonb dakor pou pran lo mèm désizion (Akt 15:25).

 Sé bann krétien ké nou pé fé konfians k’i èd lo Kolèj santral dan bann komité (1 Korintien 4:2). Zot lé gabié dan lo bann zaktivité ké lo komité ké zot i travay ansanm i fé. Zot i partisip lo rénion la somèn èk lo komité. Mèm si la pa zot i désid, zot i done bann konsèy é bann ransègnman inportan. An plis ké sa, zot i travay pou mèt an plas bann désizion lo komité é zot i rogard lo bann rézulta é lo bann progré. Lo Kolèj santral i pé osi anvoy azot vizit bann Témoin Jéova dann diféran landroi su la tèr é zot i partisip bann lévènman kom bann zasanblé jénéral ké néna tou lé zan èk bann romiz diplom pou lékol biblik Galaad.