7 LEKCIJA
So hin le Devleskro kraľišagos?
1) So hin le Devleskro kraľišagos?
Savo hino o Ježiš kraľis? (MAREK 1:40–42)
Le Devleskro kraľišagos hiňi e vlada andro ňebos. Kerela, hoj o manuša preačhena te vladňinel a andro ňebos the pre phuv pes kerela oda, so kamel o Del. Oda, so kerla le Devleskro kraľišagos, hin igen lačho hiros. Le manušenge kampel lačhi vlada a le Devleskri vlada ajsi hiňi. Kada kraľišagos kerla, hoj o manuša pre caľi phuv te dživen sar fameľija. Pregenen Daniel 2:44; Matúš 6:9, 10; 24:14.
Andro kraľišagos mušinel te el kraľis. O Jehovas thodžas kraľiske peskre čhas le Ježiš Kristus. Pregenen Zjavenie 11:15.
Dikh o videjo So hin le Devleskero kraľišagos?
2) Soske hino o Ježiš oda nekfeder kraľis?
O Ježiš hino nekfeder kraľis. Les hin lačho jilo the zorales zaačhel vaš o čačipen. (Matúš 11:28–30) Les hin bari zor te pomožinel le manušenge, bo vladňinla andal o ňebos. Sar sas o Ježiš uštado andal o meriben, geľas andro ňebos. Ode užarelas paš o Del. (Hebrejom 10:12, 13) Paľis leske o Jehovas diňas zor, hoj te vladňinel. Pregenen Daniel 7:13, 14.
3) Ko vladňinla le Ježišoha?
Vajkeci džene vladňinena andro ňebos le Ježišoha. On pes vičinen svata. (Daniel 7:27) Perša svata sas le Ježišoskre apoštola. On peskre dživipnaha sikavnas, hoj kamen le Jehovas the le Ježiš andal calo jilo. Ajsen muršen the džuvľen o Jehovas kidel avri dži akana. Sar merna, o Del len uštavla andal o meriben a dela len ajse duchovna ťela sar diňas le Ježiš. Pregenen Ján 14:1–3; 1. Korinťanom 15:42–44.
Keci manuša džana andro ňebos? O Ježiš phendžas cikno stado. (Lukáš 12:32) Savore ena 144000. On le Ježišoha vladňinena. Pregenen Zjavenie 14:1.
4) So pes ačhiľas, sar o Ježiš chudňas te vladňinel?
Le Devleskro kraľišagos chudňas te vladňinel andro berš 1914. * Akor o Ježiš ačhiľas kraľis. Peršo, so kerdžas sas, hoj čhidžas andal o ňebos le Benges the leskre demonen, pašes paš e phuv. O Beng choľisaľiľas a kerel pal caľi phuv bare nalačhipena. (Zjavenie 12:7–10, 12) Akorestar barile o pharipena, o maribena, o bokhaľiben, o nasvaľiben the aver nalačhipena. Alestar dičhol, hoj le Devleskro kraľišagos so neksigeder kerela porijadkos pre phuv. Kala savore pharipena ada kraľišagos odčhivla. Pregenen Lukáš 21:7, 10, 11, 31.
5) So le Devleskro kraľišagos kerla?
Vašoda, hoj pes vakerel pal o Devleskro kraľišagos savore manušenge pal caľi phuv, o manuša andal o but narodi šaj služinen le Jehovaske sar jekh bari fameľija. Milijoni lačhejileskre manuša priile le Ježiš sar peskres kraľis a ena zachraňimen akor, sar le Devleskro kraľišagos zňičinla kada nalačho svetoskro sistemos, so hino ade pre phuv. Kamľanas, hoj tumen olestar te el chasna? Ta sikhľon, sar te dživel, hoj te aven pre dzeka le Ježišoske, bo ov hino tumaro kraľis. Pregenen Zjavenie 7:9, 14, 16, 17.
O kraľišagos kerla tel o 1000 berš oda, so kamelas o Del peršovar te kerel le manušenca. Caľa phuvatar kerla o rajos. Paľis o Ježiš dela pale o kraľišagos peskre Dadeske. (1. Korinťanom 15:24–26) Džanen varekas, kaske kerdžanas radišagos le lačhe hiroha pal o Devleskro kraľišagos? Pregenen Žalmy 37:10, 11, 29.
^ 6. ods. O biblicko proroctvos, pal o berš 1914, arakhena andre kňižka So šaj sikhľuvas andal e Biblija? pre 217 – 220 strana.
