Andre savore naboženstva hine varesave lačhe manuša. Lačho hiros hin, hoj o Del pal lende džanel a nane leske jekh, so pes lenca kerel. Amenge hin igen namište te dikhas, hoj o naboženstva pes použivinen te kerel but nalačhipena. (2. Korinťanom 4:3, 4; 11:13–15) Šunas but hiri, hoj varesave naboženstva hine zamišimen andro terorizmus, maribena, murdaren le manušen angle ada, hoj hine aver the zňeuživinen le čhaven. Lačhe manušenge, so pačan andro Del, hin pharo, sar dikhen, so pes kerel. Pregenen Matúš 24:3–5, 11, 12.

Čačikano naboženstvo bararel le Devles. Falošna naboženstva keren ladž le Devleske. Napriklad, klaminen pal o Del the pal ola, so mule. O Del kamel, hoj o manuša te sprindžaren o čačipen pal leste. Pregenen Ezechiel 18:4; 1. Timotejovi 2:3–5.

O Del narado dikhel ajse naboženstva, so ča vakeren, hoj kamen le Devles, ale pritom kamen o svetos, so ľikerel zorales o Beng andre peskre vasta. (Jakub 4:4) O naboženstva, so na sikaven čačipen pal o Del, hin andre Biblija vičimen Baro Babilon. Soske? Čirleder sas jekh phurikano foros, so pes vičinlas Babilon. Odari pes chudňas pal e potopa te rozľidžal o klamišagi pal o Del. Ov so neksigeder zňičinla o naboženstva, so le manušen cirden kijo nalačho drom the keren lenca namište. Pregenen Zjavenie 17:1, 2, 5, 16, 17; 18:8.

O Jehovas na bisterel pro lačhe manuša, so hine andro falošna naboženstva. Sikavel o čačikano drom, so ľidžal ke leste. Pregenen Micheáš 4:2, 5.

O Jehovas pes starinel pal ola, so kamen o čačipen the o lačhipen. Phenel lenge, hoj te omukhen o falošno naboženstvo. Ko kamel le Devles andal calo jilo, ada rado kerela, hoj te el leske pre dzeka. Pregenen Zjavenie 18:4.

Andro peršo storočije, sar dživenas o apoštola, sas but manuša, so šunenas lačho hiros pal o Del a lengre jile radisaľonas. Sikhľonas, savo dživipen hin pre dzeka le Jehovaske a sar pes te zmeňinen, hoj te dživen feder. Sas bachtaleder, bo arakhle nekfeder drom, sar te dživel. Keren ada thiš! Šunen o lačho hiros a den le Jehovas pro peršo than andre tumaro dživipen. Pregenen 1. Tesaloničanom 1:8, 9; 2:13.

O Jehovas rado dikhel andre peskri fameľija le manušen, so omukhle o falošno naboženstvo. Te dživena avka, sar o Jehovas kamel, šaj aven leha lačhe kamarata a šaj tumen el nevi lačhejileskri fameľija the dživipen pro furt. Pregenen Marek 10:29, 30; 2. Korinťanom 6:17, 18.

Ada hin lačho hiros, hoj o Jehovas so neksigeder zňičinela falošna naboženstva. Imar na kerna nalačhipen. Imar na ela ňiko, ko bi amen cirdelas pro nalačho drom, ňiko ko sikavel, hoj o nipi te džan jekh pre aver. Savore manuša pre caľi phuv služinena jekhetane džide Devleske. Pregenen Zjavenie 18:20, 21; 21:3, 4.