O Jehovas kamel, kaj te sprindžaras leskeri fameľija andro ňebos. Andre adi fameľija hine tiš aňjela. Hin pal lende phendo, hoj hine „le Devleskere čhave.“ (Jób 38:7) So mek phenel e Biblija pal o aňjela? So keren le manušenca? Hine savore aňjela ča lačhe?

1) Ko hine o aňjela?

O Jehovas kerďa le aňjelen mek sigeder sar kerďa e phuv. Avka sar le Jehovas aňi len našťi dikhas, bo dživen andro ňebos. (Hebrejom 1:14) Hine odoj milijoni a dojekheske hin aver natura. (Zjavenie 5:11) „Šunen [le Jehovaskero] hlasos a keren oda, so lenge phenel.“ (Žalm 103:20) Andre phurikaňi doba varekana o Jehovas bičhavelas le aňjelen, kaj le manušenge te phenen leskere lava abo kaj te pomožinen leskere niposke. Adaďives o aňjela ľidžan le Devleskere nipi ko džene, so kamen te sprindžarel le Devles.

2) Ko hino o Satan the leskere demoni?

Na savore aňjela ačhile verna le Jehovaske. Peršo aňjelos, ko narokom kerďa pre choľi le Jehovaske, sas „o Satan Beng, so pal caľi phuv scirdel tele pro nalačho drom calo svetos.“ (Zjavenie 12:9) O Satan kamelas te el raj upral avrende. Kerďa upre le Adam la Evaha the aver aňjelen, kaj te na šunen le Jehovas. Ala aňjela, so pes visarde le Devlestar, pes vičinen demoni. O Jehovas len čhiďa andal o ňebos tele pre phuv. Na predžala but a ela pal lende. (Pregen Zjavenie 12:9, 12)

3) Sar o Satan the demoni diliňaren le manušen?

Satan the demoni amen kamen te chudel prekal o špiritizmus. Ale džungale dromeha cirden le manušen, kaj te vičinen avri le duchen. Paľis o manuša phiren pal o vražkiňi (bosorki), pal ola, so pokeren, so džanen te phenel suno a so genen le hvjezdendar. Varesave pes tiš kamen prekal o špiritizmus te sasťarel, abo hine diliňarde avka, hoj paťan, hoj vakeren le mulenca. Aľe o Jehovas phenel: „Ma phiren pal ola, so pokeren, aňi pal o vražkiňi“! (3. Mojžišova 19:31) Ov amenge phenel ala lava, bo na kamel, kaj amen o Satan the o demoni te pricirden pre peskeri sera. On našťi avri ačhen le Devles a kamen amenge te kerel bari dukh.

 DODŽAN TUT BUTER

6) Upral o Satan the demoni pes del te vihrajinel

Le demonen ľidžal o Satan. Aľe le vernen aňjelen ľidžal o archaňjelos Michael, so hin aver Ježišoskero nav. Savi zor hin le Michael? Pregen Zjavenie 12:7–9 a paľis vakeren jekhetane:

• Ko hin zoraleder? O Michael the leskere aňjela abo o Satan the leskere demoni?

• Mišľines tuke, hoj kampel, kaj le Satanostar the leskere demonendar te daras?

Upral o Satan the leskere demoni šaj vihrajines. Pregen Jakub 4:7 a paľis vakeren jekhetane:

• So šaj keres, kaj tut o Satan the leskere demoni te na pricirden pre peskeri sera?

 SO SIKHĽIĽAM

Verna aňjela amenge pomožinen. Aľe o Satan the leskere demoni našťi avri ačhen le Jehovas a prekal o špiritizmus cirden le manušen pre peskeri sera.

So bi phenehas

• So keren le Jehovaskere aňjela, kaj o manuša te sprindžaren le Jehovas?

• Ko hin o Satan the leskere demoni?

• Soske kames, kaj tut ňič te na chal le demonenca, čiže le špiritizmoha?