Nane amen rašaja abo pastora, so zaroden o love. Avka, sar le perše kresťanen the amen hin kresťanska pastira, so laskaha den pozoris pro zboros le Devleskero. (Skutky 20:28) Ala murša kamen le Devles a hin len but skusenosťi. On ľidžan a starinen pes pal o zboros: Na vašoda, hoj len andre oda vareko ispidel... na vaš o love, ale vašoda, hoj... [ada] kamen [andal o jilo]. (1. Peter 5:1-3 NZ) So keren prekal amende?

Starinen pes a den pozoris pre amende. Sikaven amen andal e Biblija a pomožinen amenge te ačhel le Devleha. Džanen, hoj kadi buťi len diňa o Del. On nane raja upral amende, ale keren savoro, kaj pes te šunas mište andro zboros a rado te služinas le Devleske. (2. Korinťanom 1:24) Avka, sar o pastiris pes starinel pal dojekh bakroro, the o kresťanska pastira kamen te sprindžarel dojekhe dženes andro zboros. (Príslovia 27:23)

Sikaven amen te kerel, so o Del kamel. Sako kurko ľidžan o zhromažďeňa, kaj te zoraľaren amaro paťaňiben. (Skutky 15:32) Ala verna murša thiš organizinen e služba. Phiren amenca te zvestinel e lačhi sprava a sikaven amen, sar te el feder zvestovaťeľa.

Sakones amendar kamen te del zor. Pomožinen amenge, kaj pes furt te ľikeras le Jehovastar. Khere abo pro zhromažďeňe, len amenge tele pal o jilo o pharipen, bo phenen amenge lačho lav andal e Biblija. (Jakub 5:14, 15)

On pes na starinen ča pal o zboros, mušinen thiš te phirel andre buťi, te starinel pes pal e romňi the pal o čhave. Pre ada peske mušinen te arakhel thiš časos. Amen ľikeras ajse buťakere phralen! (1. Tesaloničanom 5:12, 13)

• Savi buťi hin le staršen andro zboros?

• Sar o starši sikaven, hoj pes pal amende starinen?