9 ТЕМА
Служинен е Јеховаске сар фамилија
„Поклонинен тумен околеске со керѓа о небо хем и пхув“ (Откровение 14:7).
Сар со сиклиљан тари акаја брошура, ки Библија иси бут советија со шај те поможинен туке хем те фамилијаке. О Јехова мангела те овен бахтале. Кеда ка овел туменге најважно те служинен леске, ов ветинела кај са о јавера буќа „ка овен туменге денде“ (Матеј 6:33). Ов чаче мангела те ове лескоро амал. Адалеске кер са со шај те ове попаше амал леа. Адава тано нешто најшукар со шај те овел јекхе мануше (Матеј 22:37, 38).
1 ОВЕН ПАНДА ПОПАШЕ Е ЈЕХОВАЈА
СО ВАКЕРЕЛА И БИБЛИЈА: „,Ме ка овав тумаро дад, а тумен ка овен ме чхаве хем ме чхаја,‘ вакерела о Јехова“ (2. Коринќаните 6:18). О Девел мангела те ове лескоро паше амал. Јекх бути со ка поможинел ту ко адава тани и молитва. О Јехова мангела редовно те молине ту леске (1. Солуњаните 5:17). Ов тано спремно те шунел со мислинеа хем со мучинела ту (Филипјаните 4:6). Кеда заедно молинеа ту те фамилијаја, ола ка дикхен кобор сиан паше е Јеховаја.
На ваљани само те молине ту е Девлеске, него ваљани те шуне ле да. Адава шај те кере ако проучинеа и Библија хем о лила со печатинена е Јеховаскере сведокија (Псалм 1:1, 2). Размислин хор башо адава со читинеа (Псалм 77:11, 12). Исто аѓаар, шај те шуне е Девле ако редовно џаја ко состанокија со икерена лен е Јеховаскере сведокија (Псалм 122:1-4).
Те шај те ове паше амал е Јеховаја, бут тано важно те кере лафи јаверенцар баши лесте. Кобор побутер кереа адава, одобор попаше ка ове леа (Матеј 28:19, 20).
СО ШАЈ ТЕ КЕРЕ:
-
Одвојн туке време секова диве те читине и Библија хем те молине ту.
-
Сар фамилија, чхивен ко прво тхан о буќа со ка анен тумен паше е Девлеа, а на и разонода или несави занимација.
2 САР ФАМИЛИЈА СИКЉОВЕН БАШО ДЕВЕЛ
СО ВАКЕРЕЛА И БИБЛИЈА: „Овен паше е Девлеа, хем ов ка овел паше туменцар“ (Јаков 4:8). Ваљани те одвојнен туменге време кеда сар фамилија ка сикљовен башо Девел хем те икерен тумен ко адава (1. Мојсеева 18:19). Ама, ваљани панда нешто те керен. О Девел ваљани секова диве те овел дело таро тумаро џивдипе. Тумен сар фамилија ка овен попаше е Девлеа ако керена лафи баши лесте ‚кеда бешена кхере, кеда пхирена ко дром, кеда пашљовена хем кеда уштена‘ (5. Мојсеева 6:6, 7). Ов сар о Исус Навин со вакерѓа: „А ме хем ми фамилија ка служина е Јеховаске“ (Исус Навин 24:15).
СО ШАЈ ТЕ КЕРЕ:
-
Керен туменге плани секова курко те сикљовен тари Библија хем биринен теме со ваљанена секаске ки фамилија.
