5 ЛЕКЦИЈА
Која тани е Девлескири намера е пхувјаја?
1. Соске о Девел керѓа и Пхув?
О Јехова денѓа и Пхув е манушенге. Амен џивдинаја ки лате. Значи, о прва мануша, о Адам хем и Ева, на сине керде те џивдинен ко небо — о Девел керѓа е ангелен те џивдинен адатхе (Јов 38:4, 7). Адалеске о Девел чхивѓа е прво мануше те џивдинел ко јекх бут шужо рај — и еденско градина (1. Мојсеева 2:15-17). Ко адава рај о мануша хем ленгере чхаве шај сине вечно те џивдинен ки Пхув. Читин Псалм 37:29; 115:16.
Ко почеток, само и еденско градина сине рај. О прво мануша ваљани сине те овел лен чхаве кола со ка џивдинен ки цело Пхув. Хари по хари ола ваљани сине те керен цело Пхув те овел рај (1. Мојсеева 1:28). И Пхув никед нане те овел уништими. О мануша секогаш ка џивдинен ки лате. Читин Псалм 104:5.
Дикх о видеоклипи Соске о Девел керѓа и Пхув?
2. Соске и Пхув акана нане рај?
О Адам хем и Ева на шунге е Девле хем адалеске о Јехова палдинѓа лен таро рај. Тегани о рај тари Пхув нашавдило, хем нијекх мануш нашти сине палем те керел ле. И Библија вакерела кај и ‚Пхув сине денди ко васта е лошна манушенге‘ (Јов 9:24). Читин 1. Мојсеева 3:23, 24.
Дали о Јехова откажинѓа пе тари пли намера со сине ле панда таро почеток? На! Ов тано Семоќно хем никогаш на откажинела пе (Исаија 45:18). Ка керел о мануша те џивдинен ко шукар условија, сар со мангља панда таро почеток. Читин Псалм 37:11, 34.
3. Сар и Пхув палем ка овел рај?
И Пхув палем ка овел рај џикоте о Исус ка владинел упри лате сар Цари чхивдо таро Девел. Ко Армагедон, о Исус ка водинел е Девлескере ангелен хем ка уништинел са околен со противинена пе е Девлеске. Тегани ов ка пхандел е Бенге 1.000 берша. Е Девлескоро народо ка ачховел џивдо адалеске со о Исус ка водинел ле хем ка заштитинел ле хем ка шај те џивдинел вечно ко рај ки Пхув. Читин Откровение 20:1-3; 21:3, 4.
4. Кеда ка авел крајо е мукенге?
Кеда о Девел ка цидел о лошнипе тари Пхув? О Исус денѓа јекх ‚знако‘ те сикавел кај о крајо тано паше. О авдисутне лошна условија со иси ки Пхув шај те уништинен са е манушен хем сикавена кај џивдинаја ко крајо акале сумналескоро. Читин Матеј 24:3, 7-14, 21, 22.
Ко адала 1.000 берша, кеда ка владинел о Исус таро небо ки Пхув, ов ка чхивел крајо са е мукенге (Исаија 9:6, 7; 11:9). На само со ка овел Цари, о Исус ка овел Првосвештенико хем ка косел са о гревија околенгере кола со мангена е Девле. Аѓаар, преку о Исус, о Девел ка цидел о насвалипе, о пхурипе хем о мерибе. Читин Исаија 25:8; 33:24.
5. Кој ка џивдинел ко рај?
Ки дворана шај те аракхе манушен со мангена е Девле хем мангена те сикљовен сар те служинен леске
Ко рај ка џивдинен окола со шунена е Девле (1. Јованово 2:17). О Исус бичхалѓа пле ученикон те роден е кротко манушен хем те сикавен лен сар те керен е Девлескири волја. Авдиве, о Јехова спреминела милионија манушен те шај те џивдинен ко рај ки Пхув (Софонија 2:3). Ко дворане коте со кхедена пе е Јеховаскере сведокија, бут мануша сикљовена те овен пошукар рома хем дада, те овен пошукар ромња хем даја. О чхаве хем о родителија заедно славинена е Девле хем сикљовена сар о шукар хабери шај те керел ленгоро џивдипе пошукар. Читин Михеј 4:1-4.
