Со мислинеа, пхаро ли тано те керен пе шукар буќа?— Бут мануша мислинена кај тано пхаро. И Библија вакерела аменге башо јекх чхаво со сине леске бут пхаро те керел адава со и шукар. Ама, ле сине ле шукар амала со поможинена ле сине те керел шукар буќа. О анав адале чхавескоро сине Јосија. Ајде те сикљова побутер баши лесте хем лескере амала.

Е Јосијаскоро дад сине о Амон, ов сине цари ки Јуда. О Амон сине бут лошно мануш хем служинела сине јавере девленге. Кеда ов муло, о Јосија уло цари ки Јуда. Тогаш сине ле само офто берш! Со мислинеа, сине ли лошно ов да сар по дад?— На, на сине!

Панда сар тикно, о Јосија мангела сине те шунел е Јехова. Адалеске, ов дружинела пе сине само адаленцар со мангена е Јехова. Ола поможинена ле сине те керел шукар буќа. Кој сине лескере амала?

 Јекх лескоро амал сине о Софонија. Ов сине пророко хем вакерела сине е манушенге тари Јуда кај лошно ка накхен ако служинена јавере девленге. О Јосија шунела сине е Софонија хем служинела сине е Јеховаске, а на е јавере девленге.

Панда јекх лескоро амал сине о Еремија. Ола сине паше ко берша хем сине бут шукар амала. Кеда о Јосија муло, е Еремијаске сине бут пхаро. Ов чак пишинѓа гили те сикавел кобор фалинела леске о Јосија. О Еремија хем о Јосија поможинена пе сине јекх јекхеа те керен шукар буќа хем те шунен е Јехова.

Со шај те сикљове таро Јосија?— Панда таро тикнипа о Јосија мангела сине те керел шукар буќа. Ов џанља кај лескере амала ваљани те манген е Јехова. Аракх туке амала со мангена е Јехова хем со ка поможинен ту те кере шукар буќа!