Са повише мануша понашинена пе лошно. Нервозна пациентија викинена е докторенге, о мануша ко ресторанти грубо понашинена пе е келнеренцар, бунтовна патникија нападинена е персонале ко авиони, о чхаве понашинена пе лошно ки школа аѓаар со лена ки хајгара е наставникон, заканинена пе ленге хем нападинена лен, хем несаве политичарија керена буќа коленцар со шокиринена е јаверен, а јавера трудинена пе те истакнинен кај тане бут шукар.

 И Библија шај најшукар те вакерел аменге сој тано шукар понашибе. Ој исто аѓаар објаснинела соске бут мануша авдиве на понашинена пе аѓаар.

 Ко цело свето дикхјола кај са похари мануша понашинена пе шукар.

•   Спрема јекх анкета таро Галуп со сине керди сигенде, о Американција мислинена кај ко последна 22 берша о морална мерилија е манушенгере ки Америка акана тане најтикне.

•   Ки јекх јавер анкета коте со учествујнѓе повише таро 32.000 мануша ко 28 државе, 65 отсто лендар вакерѓе кај никогаш на дикхле добором бут о мануша те на поштујнен пе хем те на понашинен пе шукар.

 И Библија пророкујнѓа сар ка понашинен пе о мануша авдиве.

•   „Ко последна диве ка овел бут пхаро време. Соске о мануша ка манген коркори пес, ка манген о паре, ка овен чалмџие, ка икерен пе ко барипе, хулителија, нане те шунен пле родителен, нане те овен благодарна... нане те манген пле фамилија, [хем ка овен] сурова (2. Тимотеј 3:1-3).

 Те шај те дознајне повише башо адава сар исполнинела пе акава пророштво, читин и статија „Дали навистина живееме во последните денови?“

 Ко акава свето коте со о мануша са похари понашинена пе шукар, бут мануша халиле кај ки Библија иси најшукар советија башо шукар понашибе. Ки лате иси советија башо морал колен со иси лен „цврста темелија, акана хем засекогаш“ (Псалм 111:8). Те дикха некобор примерија:

•   Со вакерела и Библија: „Са со тумен мангена о мануша те керен туменге, тумен да мора те керен ленге“ (Матеј 7:12).

   Со значинела акава: Ваљани те понашина амен е јаверенцар љубезно хем те сикава ленге поштовање, исто сар со мангаја ола те понашинен пе аменцар.

•   Со вакерела и Библија: „Акана, кеда цидинѓен тумендар о ховајбе, сарине вакерен о чачипе јекх јекхеске“ (Ефешања 4:25).

   Со значинела акава: Ваљани те ова чесна ко са со вакераја хем кераја.

 Мангеа ли те дознајне повише баши акаја тема?

•   Читин и Стражарско кула е насловеа „Сој шукар а сој лошно — Кој шај те вакерел аменге“

•   Читин и статија „Со вакерела и Библија баши толеранција?“