Ко 19 мај 2022 берш, о Совет баши безбедност ко Обединета нацие добинѓа извештај таро повише таро 75 функционерија сој ки бари положба кај „и пандемија таро КОВИД-19 хем о климатска промене више керѓе те овел криза баши храна, ама и војна ки Украина керѓа адаја криза те овел панда побари хем адалеске иси ризик ко несаве тхана те овел бокхалипе“. Кратко пало адава, ко списание The Economist пишинела сине кај ко свето, коте со више иси бут проблемија, и војна ка керел панда повише мануша те овен бокхале. И Библија англедер вакерѓа кај ка овел асавки криза ко амаро време, ама исто аѓаар поможинела аменге те икљова ко крајо лаја.

•    О Исус вакерѓа: „Ка уштел народо против народо, хем царство против царство, хем ка овел бокхалипе“ (Матеј 24:7).

•    О библиско лил Откровение керела лафи башо штар симболична јавачија ко граста. Јекх лендар претставинела и војна. Пали лесте авела јавер јавачи кова со претставинела о бокхалипе — време кеда нане те овел доволно хајбаске хем и храна ка овел бут скупо. Ко Откровение 6:5, 6 пишинела: „Дикхљум јекх кало грас хем лескере јаваче сине ле вага ко вас. Шунѓум јекх гласо сар вакерела: ’Похари таро јекх кило гив коштинела цело дивескири плата. Похари таро трин киле јачмен коштинела цело дивескири плата‘“.

 Адава со вакерѓа и Библија башо бокхалипе исполнинела пе ко амаро време кова со и Библија викинела ле „о последна диве“ (2. Тимотеј 3:1). Ако мангеа те дознајне повише башо „последна диве“ хем башо штар јавачија таро Откровение, дикх о видеоклипи О свето менинѓа пе таро 1914 берш хем читин и статија „Што претставуваат четирите јавачи?“

•    Ки Библија иси практична советија со шај те поможинен аменге те икљова ко крајо пхаре ситуациенцар, сар на пример кеда бајрона о цене баши храна хем кеда иси криза баши храна. Асавке советија шај те аракхе ки статија „Како да раководиш со парите“.

•    И Библија исто аѓаар дела надеж кај о условија ки пхув ка овен пошукар. Ој ветинела кај ка авел време кеда „ки пхув о гив бут ка бијанел“ хем саринен ка овел лен бут хајбаске (Псалм 72:16). Ако мангеа те дознајне повише башо адава сави надеж дела и Библија хем соске шај те верујне ки лате, читин и статија „Патот до среќата — надеж“.