Пучиба таро читателија
Кој тани и „ромни“ сој спомними ко Исаија 60:1, хем сар ој „уштела“ хем „светинела“?
Ко Исаија 60:1 пишинела: „Ушти, ромние, светин, соске али тли светлина, хем е Јеховаскири слава светинѓа упри туте!“ О контекст сикавела кај и „ромни“ сине о Сион, јавере лафенцар о Ерусалим — ко адава време и главно диз ки Јуда a (Иса. 60:14; 62:1, 2). О Ерусалим претставинела цело израелско народо. Башо акава стихо иси дуј пучиба коленге со ка одговорина. Прво, кеда хем сар о Ерусалим уштило хем светинѓа ки симболично смисла? Дујто, дали е Исаијаскере лафија иси лен побаро исполнување ко амаро време?
Кеда хем сар о Ерусалим уштило хем светинѓа ки симболично смисла? О Ерусалим хем о храми сине ко рушевине џикоте о Евреија сине ко ропство ко Вавилон 70 берш. Ама откеда о Вавилон сине освојмо таро Медијција хем таро Персијција, о Израелција со живинена сине ко различна делија таро Вавилонско Царство шај сине слободно те иранен пе ки пли пхув те шај палем те градинен о храми хем те служинен е Јеховаске (Езра 1:1-4). Почминдор таро 537 берш а.а.е., несаве таро верна Израелција таро са о 12 племија иранѓе пе ко Ерусалим (Иса. 60:4). Ола почминѓе те ден е Јеховаске жртве, те славинен о празникија хем палем те градинен о храми (Езра 3:1-4, 7-11; 6:16-22). Е Јеховаскири слава почминѓа палем те светинел упро Ерусалим, јавере лафенцар упро е Девлескоро народо. А ола, уле светлина е народонге, кола со сине ки духовно темница.
Ама, ко адава време, е Исаијаскере пророштвија на исполнинѓе пе целосно. Побаро дело таро Израелција чхинавѓе те овен послушна е Девлеске (Неем. 13:27; Мал. 1:6-8; 2:13, 14; Мат. 15:7-9). Покасно, ола чак отфрлинѓе е Месија — е Исус Христосе (Мат. 27:1, 2). Ко 70-то берш а.е., о Ерусалим хем о храми сине палем уништиме.
О Јехова пророкујнѓа кај адава ка случинел пе (Дан. 9:24-27). Јасно тано кај лескири намера на сине те исполнинен пе целосно о пророштвија баши обнова таро 60-то поглавје таро Исаија упро Ерусалим со сине ки пхув.
Дали е Исаијаскере лафија иси лен побаро исполнување ко амаро време? Оја, ама упри јавер симболично ромни — „о упруно Ерусалим“. О апостол Павле баши лате пишинѓа: „Ој тани амари дај“ (Гал. 4:26). О упруно Ерусалим тано о небесно дело тари е Девлескири организација коте сој о верна духовна ангелија. О „чхаве“ таро упруно Ерусалим тане о Исус хем о 144.000 помазиме христијања, кола со исто сар о Павле иси лен надеж те живинен ко небо. О помазиме христијања тане јекх „свето народо“ — „е Девлескоро Израел“ (1. Пет. 2:9; Гал. 6:16).
Сар о упруно Ерусалим, јавере лафенцар и „ромни“ „уштили“ хем „светинѓа“? Ој керѓа адава преку пле помазиме чхаве сој ки пхув. Споредин адава со ола доживинѓе адалеа со сине пророкујмо ко 60-то поглавје таро Исаија.
О помазиме христијања ваљани сине те „уштен“ адалеске со сине ки духовно темница кеда ко дујто веко тари а.е. ширинѓа пе о отпадништво кова со сине пророкујмо (Мат. 13:37-43). Аѓаар, ола уле робија е Баре Вавилонеске — о светско царство е ховавне религијакоро. О помазаникија ачхиле ко адава ропство са џи „ко последна диве акале светоскере“ — периоди кова со почминѓа ко 1914 берш (Мат. 13:39, 40). Кратко пало адава, ко 1919 берш, ола сине ослободиме хем одма почминѓе те светинен ко духовно поглед аѓаар со сине целосно зафатиме е проповедибаја. b Ко са адала берша па џи акана, о мануша таро са о народија џана ки адаја светлина, коте сој вклучиме хем јавера да таро е Девлескоро Израел — о царија сој спомниме ко Исаија 60:3 (Отк. 5:9, 10).
Ки иднина, о помазиме христијања ка ширинен и светлина таро Јехова ко јекх панда побаро начин. Сар? Кеда ка завршинен пло живото ки пхув, ола ка овен дело таро „Нево Ерусалим“, јавере лафенцар е Христосескири бори колате сој о 144.000 царија хем свештеникија со ка владинен заедно е Христосеа (Отк. 14:1; 21:1, 2, 24; 22:3-5).
О Нево Ерусалим ка овел ле важно улога џикоте исполнинела пе о пророштво таро Исаија 60:1. (Споредин Исаија 60:1, 3, 5, 11, 19, е стихонцар таро Откровение 21:2, 9-11, 22-26.) Исто сар со о Ерусалим ки пхув сине тхан коте со сине и влада таро пурано Израел, аѓаар о Нево Ерусалим хем о Исус Христос ка овен и влада е неве светоскири. Сар о Нево Ерусалим „хулела таро небо таро Девел“? Аѓаар со ка керел буќа со ка влијајнен упри пхув. Мануша таро са о народија, кола со хор поштујнена е Девле, „ка џан ки лескири светлина“. Ола чак ка овен ослободиме таро грево хем таро мерибе (Отк. 21:3, 4, 24). О крајно резултати тано адава со ка обновинен пе са о буќа со о Девел вакерѓа лен преку о Исаија хем о јавера пророкија (Апо. 3:21). Акаја бари обнова почминѓа кеда о Исус уло Цари, а ка завршинел ко крајо таро милја берша коте со ка владинел ов.
a Ко Исаија 60:1, ко Превод Нево свето користинела пе о лафи „ромни“ наместо „Сион“, или „Ерусалим“, соске о хебрејска глаголија башо „ушти“ хем „светин“ тане ко женски род, исто сар о хебрејско лафи сој преведимо сар „туте“. О лафи „ромни“ поможинела адаленге со читинена те хаљон кај керела пе лафи баши јекх симболично ромни.
b И духовно обнова, која со случинѓа пе ко 1919 берш, исто аѓаар тани опишими ко Езекиел 37:1-14 хем ко Откровение 11:7-12. О Езекиел пророкујнѓа кај са о помазиме христијања ка доживинен духовно обнова пало јекх бут баро периоди ко ропство. О пророштво таро Откровение керела лафи башо симболично иранибе ко живото јекхе тикне групакоро таро помазиме пхраља кола со водинена сине о проповедибе откеда јекх кратко периоди сине неактивна адалеске со сине чхивде ко затвор бизи нисави причина. Ко 1919 берш, адала пхраља сине чхивде те служинен сар „верно хем мудро робо“. (Мат. 24:45; дикх ко лил Конечно сарине ка славинен е Јехова!, стр. 118 ки српско чхиб.)
